雜 絮

剩係講今日

- 一起身就睇波, CLIPPERS VS JAZZ,
clippers球員一如以往飛來飛去, 娛樂性極高,
但又繼續唔識羸波...

- 我一落街發現買唔到milk, 就知佢又送d古怪野...
原來係adidas筆記簿...
令我諗起細個puma文具曾經都紅極一時...

- 去買朋友的入伙禮物,
睇中左, 但問過幾間都冇存貨,
但聽日就要送, 咁點好?!
唯有連佢最後果件陳列品都照殺,
即場借條毛巾由頭抹到落尾先入盒.
仲借勢屈到佢俾discount我~ 嘩哈!

- love and other drugs
老土! 句號
(或者女性會覺得感人)
anne hathaway有大量裸露片段,
但早排已經上網睇過晒,
(外國竟然有人剩係盜錄呢幾場露點戲擺上網...)
連唯一亮點都冇埋...差d訓著.
不過部份對白都尚算精警.

微博小故事

一名男子帶同女友參加前度情人的婚禮,
合照時兩對共四人竟為企位而煩惱...
男子覺得企響新郎隔離比較恰當;
新娘卻又覺得男子應該企響自己隔離好D, 原因係:
"你俾你女友同D靚仔(新郎)影下相啦~"

男子恍然大悟, 曰:
"咁又係呀, 佢好耐都冇見過靚仔架喇...識左我之後."

j4jerk 解密系列1 - 一個J for Jerk的年代

與其等人爆, 不如自己爆.
當然, 爆左都唔會令我坐監的, 尋仇者可直接skip呢一篇~

首先, 要略略提下"一個 J for Jerk的年代"係點黎,
話說我細個果陣, 學英文係由A for Apple, B for Boy學起,
但而家入學前已經要先裝備好自己,
又要學定琴棋書畫, 又要做portfolio,
(有冇人諗過如果個小朋友咁勁仲點解要番學呢? 樣樣都響屋企學就得啦~)
入到去又發覺 A 已經唔係 for Apple,
變成 A for Astronaut, B for Billionaire,
呢個年代係去到咁恐怖, 返學已經冇樂趣可言.
簡而言之, "一個 J for Jerk的年代" 有個潛台詞, 叫悲劇~

好喇, 去到前排"新蚊"個專欄, 亦都沿用呢個名,
讓悲劇繼續延續, 分別只係由playground講到社會.

原本編輯叫我交張車頭相放上專欄,
我就諗住放一張扮韓寒懶憂鬱的玉照襯番個主題,
但為免浪費"新蚊"紙張包住嘔吐物,
最後都係用另一張cut頭cut尾的殘肢相.

後來編輯先生再叫我加一段文字介紹自己,
其實我係諗唔到點寫, 或者咁講, 係冇乜好寫,
我又唔係乜乜CEO, 又冇拎過十大傑青,
自我介紹得乜?
"生於十九XX年, 於二零幾幾年開始乜都冇做過..."咁樣?!

開始想歪路, 不如改歌詞啦.
就係咁, 我就用左一程車時間作左呢一段...

想平凡 / 怕大鑊 / 閒來無事最愛白撞
洗完頭 / 再直落 / 落銀龍獨對那凍檸樂
我冇街去冇得講 / A片今晚又再睇過
溝過我的得兩個 / 阿媽笑我涸過池塘

對, JACSO BLOG 果邊係打錯字的,
不過係一張jpg過, 我就懶得去改.

至於係改自邊首歌呢, 因為一直都冇人問,
所以應該冇乜人想知, 所以冇講~

綜藝館內的刺蝟

之前做野都去過青年廣場,

但去佢裡面果個綜藝館都係第一次,

個門口仲要非常隱閉,

現場好多人同我一樣蕩失路,

搵一大輪先發覺別有洞天.

開頭以為開得一場,

既無宣傳又匿埋響細場攪會冇乜人睇,

點知門口大排長龍...

為的是

魏如萱~

先講場地, 比想像的好.

音響不俗, 就算live band果個鼓佬不停鬼上身 (香港果d真係望塵莫及~),

都冇拆聲.

樓底夠高, 舞台亦都夠深,

坐位又夠舒適, 甚至有人行過都唔係好駛縮腳, 冇壽臣咁逼夾.

衰在座位有限, 規模同葵青差唔多.

不過細場有細場的好, 大家都 causal 好多,

(留意一下佢隻左腳去左邊, 有部份時間連右腳都收鬼埋)

得閒又摷下個環保袋拎份 rundown 出來睇

間場時攪下爛gag自己喪笑一輪之後, 又立即唱隻極悲慘的歌.

非常分裂~

而佢為左證明自己係才女, 仲用佢極有限的廣東話唱晒成首"才女" (...)

好耐冇試過覺得一張concert飛是如此買得抵.

感性設計展

已經唔記得係第幾年去創新科技展,

但今日加埋日本仔一齊玩, 可觀性立即大好多.

剩係講手頭上拎拎埋埋既資料, 我睇到而家都未睇得完~

- 呢個係古惑的櫃,

櫃桶可以隨意向兩邊開出,

非常適合住慣豆腐潤的香港人.

- 睇落一件組件好簡單,

但砌埋就係好睇~!

第一眼睇落會"嘩~", 然後諗真D,

呢張梳化應該用PRO-E畫5分鐘就攪掂囉~

- 之前提過的dyson風扇,

前排成日淘寶, 其中一樣就係淘呢件野....當然係山寨版.

而家內地已經出到第三代 (正版都只係剛剛出第二代),

非常前衛, 但千祁唔好買, 因為第三代質地差左好多, 仲多埋個核突handle...

- 呢盞燈冇乜特別, 純粹鐘意~

- 呢個係鏡頭...

- 會場其中一忽擺左幾十部電視,

每一部都播住一段background music一樣, 但visual完全唔同的錄像,

好似好普通, 但拍埋一齊又幾過癮~

- 呢個深得本人喜愛,

係一個簷蓬.

一塊膠板/紙板"界"幾條坑而摺成.

擋到陽光之餘, 射落地既光仲可以有pattern.

但同時我又為個sales難過,

因為呢件野, 唔怕麻煩的話,

係可以自己去五金舖買料自己"界"的...

- 每年的重頭戲, 就係睇香港發明協會,

每一年都會有"驚"喜!~
今年呢個係第二名:

簡單黎講, 係七個人玩的中國象棋,

複雜黎講......係我睇完好耐都唔知點玩的東東,

遊戲其實唔應該係咁囉!

你仲要求有七個人同時識玩先玩得成...

btw, 今年第一名係:

土製沖水廁板!!

日本仔果個要用電, 本土製呢個就連電都唔駛,

亦都唔駛開新喉, 直接插落花灑個出水位就用得....

咁...

我點解唔直接用花灑呢?

臨老入花市 最終實戰篇 下

previously on 臨老入花市...

第5-6日

天氣好差, 又濕又凍, 拍檔們好努力冒雨出去叫賣,
但檔口前面其實近乎冇人行,
我再望望身後一大袋貨,
個心真係涼左一截...

其後見冇乜生意, 原本負責收銀的我行埋出去同大家一齊打水戰,
每人拎起兩隻"虎爪"就當成拳套, 互相追打,
但咁樣自娛竟意外引起行人注視,
"嘩...佢地識得架?! 打得咁認真既?!"
反而咁樣, 我地雨中都做到幾單生意.

正當我諗住呢鑊會同隔離左右攬住一齊死果陣,
大雨竟然響晚上七點幾果陣停左.
而就係呢一下停雨, 將我地個結局完全改寫.
附近居民食完飯見冇雨就湧晒入黎, 亦由於天氣唔太穩定,
好多人捨遠取近, 選擇到就近花市而放棄維園.
一下子個場由冇乜人湧到連行都冇位行.
而我地所賣既星星咕臣直情唔夠賣要即場加價.
虎爪亦都極速幾隻幾對咁sell晒出去 (高峰時期大約一分鍾賣十幾隻)
其實未到凌晨, 我已經大約計到呢次唔駛蝕.

跟住我響呢個黃金時候竟然做左一個冇乜人會做的決定,
大叫: "食宵夜!!"
其實我地應該安份守己, 收檔先食,
但果一刻又確實係興奮,
結果我地就非常唔專業的一路食一路sell埋剩底既貨尾.
(我都不失霸氣的~)
可惜鄰檔大部份都傷亡慘重, 見到我地撩晒牙直頭想衝過打x我地,
咁我地唯有扮下好人, 幫埋隔離檔sell,
例如響A檔買野, 就可以以優惠價買B檔(即係我地)既野...之類.
玩得不亦樂乎.

到最後, 曲終人散, 傳統的交換禮物儀式開始.
每一檔都會拎自己賣剩既野去同其他檔口交換.


部份戰利品~
得番美羊羊, 照殺!



P.S.

呢張相係我上個禮拜響LOGxN果度影,

只係想講, 賣乜野都好, 最緊要係賣先過人~

如果我地而家先賣星星同埋虎爪,

就食得屎了!~

微博小故事 之 迎接外星人

(見到微博有微小說比賽, 我又手痕了)
(當然, 如果我想贏, 就會係寫"果D"而唔係寫"呢D"啦~ 飛機文我都好拿手的)

各國元首正在商討如何對付外星人: 法國那個跟意大利那個在討論外星人有沒有胸; 美國那個正盤算著強制外星人發新鈔, 齊來量化寬鬆; 中國那個忙著接太空衣的訂單不可開交; 北韓那個蹺起雙腿, 挖著鼻, 跟部下說: "到灶頭裡拿個核彈出來, 跟天空上的朋友說聲好..."

(其實我幾鍾意呢篇囉~)

雜 絮

- 盲俠行

有見到我微博的話, 大概就知我尋晚現場直播佢地點樣騷擾我訓覺.

即係, 一班人參與活動興高采烈我都明白,

但點解每一批人總有幾個會無啦啦響度 "woo~~~WOO~~" 鳩叫架呢?!

你知唔知果陣係凌晨呀? 而你又知唔知半夜三就算只係傾偈都係好應聲的?!

你知唔知呢個世界除左盲人需要幫助之外, 唔夠訓的人都好需要幫助架?!

而更加不幸的是, 樓下剛好有幾個臨時廁所...

每隔三分種就有人"砰嘭~"話俾你知佢要去廁所...

- 壞品味系列

攝於鯉魚門...

你整魚整蟹我都明,

但呢個...想點呢?

- 拆 蟹

話說收到朋友送來的禮物,

不過剩係拆盒已經玩左我半粒鐘.

而家吸塑好平架咋, 點解仲要五花大綁呢?!

剩係個身已經俾7-8條線綁住...

其實佢係一隻可憐的柯柏文~

是日廣告

近期adidas重點應該係 derrick rose + dwight howard 的籃球廣告,

結果俾呢個亞洲佬搶晒鏡.

如果有睇開果d二線笑片應該會覺得佢好熟口面.

ken jeong, 韓國裔, 以癲喪浮誇見稱,

有睇"hangover"的話就知佢幾喪,

(youtube仲有其他NG片段, 一個take試幾十次, 次次都可以自爆唔同對白...~)

幾廿歲先開始做演員,

而佢做演員之前, 竟然係一名

醫生!

臨老入花市 最終實戰篇 上

previously on 臨老入花市

入貨篇

場地篇

物流篇

戰術篇

萬事俱備, 只欠開檔.

一切成敗就在幾日揭盅.

- 第 0 日

由於樣樣都要慳, 先頭部隊要自行於開檔之前做setup.

(有公司每年都會幫人開檔的, 仲會駁埋電.)

幾條友book架貨van就連人帶貨殺入去, 點知個司機唔識路,

響大埔兜左好多個圈先落到貨.

去到場地第一件事就係搭起之前講過摺埋都成個人咁高既帳蓬.

我一直都奇怪一個三米乘三米既帳篷點解可以咁重,

去到一打開就知瀨野...

原來我地借番黎果個帳篷係三米乘六米, 比我地租既場地足足大一倍!

我地總唔能夠由得佢突出三米, 食環署一定唔會放過我地,

咁我地就唯有即場拎架生拆左多出果三米 (對, 個帳篷係借番來的, 但照拆!),

殘肢就收埋響後欄, 等初一先鑲番上去.

拆左成個鐘, 仲要肯定自己冇拆錯唔會影響剩低既結構之後,

就開始砌張檯.

係, 我地買唔到符合高度的高檯, 又係自行買角鐵搭建.

唔好講笑, 之後就係呢張高檯救左我地好多~ 重要角色來的!

- 第1-4日

一般黎講, 呢幾日係冇乜生意的.

所以主力人手反而係去其他年宵場--格價~

每日我都會去維園果邊睇下人地有乜野賣, 有幾多撞貨,

人地又賣幾錢. 然後就動用"紅海戰術", 減得比佢快, 比佢狠!

至於存貨方面, 同其他好多檔口一樣,

我地每日都會有少量存貨擺響帳蓬裡面.

點知某日半夜落過一場好大既雨,

連新聞都報導好多檔口既貨被淋到濕晒.

但我地就係因為張高檯幫我地擋晒d雨, 一件貨都冇濕到!!

為左答謝佢, 我地同佢加多一層暗格, 用來放錢同埋可以匿埋食飯~

關於寫作......我想說的其實是......II

- 當然, 呢D所謂既夢想會隨著現實而改變,
同好多打工仔一樣, 畢業之後我就冇再拎過筆寫字.

- 點知多年之後, 誤打誤撞之下, 我竟然寫起專欄來.

- 每個禮拜交六百字, 對我來講可以好輕鬆,
我可以寫一堆垃圾交貨算數, 但我又唔想.
我總希望每個禮拜D人睇完會有反思,
對社會反思又好, 對自身反思也好.

- 縱使我到而家都唔知個專欄實情有冇人睇,
但就算冇人睇, 上面既基本理念係不變的.

- 有時, 攪一兩個爛gag在所難免, 畢竟"新蚊"係一本娛樂雜誌.
我希望讀者睇完就算冇反思, 都可以得到少少娛樂~
唔駛悶出個鳥來.

- "新蚊"讀者群係比較年輕的一群,
如果一開波就講一d好大既題目,
相信佢地睇完第三句就會skip.
所以, 個pattern通常都係
用一d比較貼近佢地既字眼當中,
靜靜embed比較大的題目落去.

- 寫得淺白亦都有故意的, 如蔡瀾話齋:
"寫得太深, 得自己睇得明, 有鬼用呀?!"

- 我少人睇, 唔代表我可以亂寫.
這是良知的問題.

- 原本編輯哥哥同我講只係寫四至六期,
點知寫下寫下就寫左半年.
而今日出街的, 將會係最後一篇.

- 對我來講, 呢一篇能夠出街, 簡直係完美的結局~
但很抱歉, 呢一篇係冇gag位的.
亦都相信有人會睇唔明,
唔明的可以繼續唔明, 因為冇乜損失~
但明的, 就自己會明.

- 感謝編輯Chris的包容和忍耐...與及膽識!
我到而家都覺得佢搵我寫野係一件好冒險的事.(!!)

- 對於每一個send email俾意見我的朋友,
讚又好彈又好, 都非常感謝.
實在係一個非常有趣的互動體驗.
但我總係唔明, 幾乎每一個email都會提到"好怕俾我串"...
呢個就有點無奈囉~

宅的一天

- 放工之後無無聊聊的去睇"告白",
我素來討厭日本電影,
但見口碑同賣飛情況(我去到只係買到頭幾行...),
又去睇下有幾好睇.

分別從幾個人把口出發去整合一個故事唔算新穎,
但做得到有條不紊都唔易,
而且電影MV感非常之重 (主題曲仲要係radiohead的last flowers, 死未~),
有別於平時又長又臭的阿婆扎腳布式日本電影.

但睇完呢套戲, 係唔會開心的. 好沉重.

- 散場之後, 未食飯好肚餓,
但油麻地食到厭, 就蕩左去佐敦搵食,
行下行下, 見到有間野幾骨子又唔貴就撞左入去.
http://www.openrice.com/restaurant/sr2.htm?shopid=38491
以佢既價錢其實我冇乜要求,
但佢既食物竟然幾有心思, 唔係求其煮.

之前openrice見有人彈'澳牛'既意粉唔夠al dente,
食澳牛都咁撚高要求.
咁我又扮下食評人講一句:
呢間d意粉真係夠al dente~
就連d蝦都好夠al dente囉!

- 返到屋企就繼續打機扮jordan,

發現原來只要完成10個challenge就可以用jordan打my player系列.

"咁有乜好玩呀?!"

er...可以踢佢去打bobcats, 同埋,
著adidas囉~

btw, 隻game某個陰暗位可以入code,
懶人請記住以下號碼,

icanbe23

關於寫作...我想說的其實是...

- 唔怕面紅的同大家講, 我小時的其中一個志願係作家(!!)
- 中學時期好得閒, 係參加過公開的徵文比賽, 仲要贏左...

- 更加唔知醜的同大家講, 當年會考果陣, 中文作文我係以文言文應戰的.

"返去磨墨啦阿伯! 而家冇左會考架喇!!"

就係而家冇左先更加要講, 好多人考過都唔知,
其實會考係可以用文言文的!
字數仲有優惠呢~ (唔記得係三百定四百字...)
咁當然, 我當年係死得好慘的...

- 曾經睇過一篇訪問, 記者問某女作家:
"妳日寫夜寫, 生活作息同一般人唔同, 有冇一刻覺得自己生活好唔正常?"

佢答:
"只要你曾經有一刻有想過以作家為職業, 呢個念頭已經好唔正常!"

(眼訓, 待續)

壞品味系列

知道係乜的唔駛我解, 唔知係乜的我都唔知點去解,

因為我發現原來我從來唔知呢舊野係點稱呼...

姑且稱佢為 "越野飛珠" 先.

.

簡單黎講, 就係一個將珠珠由起點運去終點的遊戲,

途中會經過好多障礙,

你就可以透過下方的panel去排除萬難.

(如圖中的黃色掣係控制黃色部份, 藍色捍就控制藍色部份)

年紀細的應該未玩過~

但這可是我的童年回憶之一呀~!

.

圖中呢個係迷你復刻版, 原版係大一倍以及啡+綠色的.

(小克好似曾經響專欄畫過原版, 但唔記得幾時)

而呢個復刻版一式有三款, 仲可以拼埋一齊玩.

.

係架~ 係好低能架~

但iphone果d game咪又係玩緊呢d野!!

是日短片

台灣世新大學廣電系學生的作品,
拍得很不俗~
將一個虛擬空間帶到現實的一個虛構故事 (我在說甚麼?)
平時成日上forum/newsgroup的要睇.





所以話, 上網識人真係要小心,
未到最後都唔知邊個會出賣你~

雜 絮

- 尋日睇報導, 最吸引我的除左那個敏感詞獎(近排睇得太多韓寒之過~)之外, 就係呢個, 一路睇一路忍唔住笑~



因為呢單新聞令我諗起當年網路上的趣事:
詳情可睇呢度:
http://www.wretch.cc/blog/Shadox/10005160
吐~ 2.5億算甚麼?! 人家早就賣9億了~

當年台灣耐唔耐就有一單惡攪拍賣,
貨品唔重要, 最重要的是問答環節,
大家都用一個好認真既態度去問一D好鳩既問題,
而賣家又不厭其煩引經據典的逐一回答.
大家流鬥流, 好玩過而家高登多多聲~

而咁多次惡攪之中, "二手牙簽"果條可謂最精彩,
可惜呢個冇出書...
有copy的煩請send個給我~

- 呢期電玩話題的NBA 2K11,
因為波神肖像權終於解禁而造成哄動.
玩左成晚, 波神動作都可算非常細膩,
小動作都跟到足.
仲可以用番某D 90年代強隊, 如圖中的Supersonics.
可惜大部份只得正選...後備變晒做普通電腦人.



- 又, 講開NBA,
熱身賽剛剛開打, 林書豪首次登場,
林書豪有乜咁巴閉呢?
*佢係NBA首位華裔控衛 (姚明可不是控衛來的...)
亞洲後衛面對外國人通常都會變炮灰的, 佢可算係近年對抗性最好的一個.
*佢, 係哈佛畢業的, GPA 4.2...
*哈佛讀書冇乜特別, 特別的是哈佛沒有體育獎學金呢回事,
所以一般來講, 有潛質的運動員早就被其他名校(如UNC, UCLA等等)挖走,
通常讀得哈佛都不容你考慮做職業運動員, 只能夠專心讀書~
*而對上一次哈佛出產職業籃球員, 係195X年...



- 是日好書推介:
501 things to do with a zombie

其本上, 呢本書係低能的!
插圖核突, 文字簡陋.
但係佢既中心思想又幾唔錯:
其實你我身邊都好多像喪屍一樣的人,
請多d關心身邊既人~

減 肥

如果有人咁不幸有見過我前排的玉照的話,
大概都知說我是何等的苗條.

瘦, 其實唔係天生,
而係經過多年節食與及運動而成.

我唔相信坊間果D減肥藥,
我唔相信有不勞而減的脂肪.

幾百蚊買盒藥就可以坐定定響馬桶減肥等瘦?
荒謬程度其實同幾蚊一罐聲稱飲完可以補充體力的飲品一樣,
講你都唔好信啦!

唔好同我講冇時間運動,
蒲少一陣, 又或者睇少D師奶電視劇已經夠你做幾SET.

飲少D奶,
奶, 其實係冇乜益的.

煎炸野好好食我知, 但炸舊屎都係香口架...
食少D零食啦.

肥, 其實又冇乜問題的我覺得.
但我真係好怕果D成日開口埋口話減肥,
轉頭又覺得做運動好痛苦的人.
又要減又想懶.

所以真係唔好話而家D學生番學只求貼士不問學養.
因為大人一樣係咁撚衰~

是日廣告

唔知點解,
個廣告冇扭橋冇得技, 講唔上好特別,
但我又睇得好開心~

http://www.youtube.com/watch?v=X21mJh6j9i4

戇99在廣州

廣州成日去,
但每次都趕頭趕命, 係今次有得周圍逛,
第十甫都係第一次黎...



呢度其實幾似上海~



而呢度又幾似澳門~



有冇人著過pepsi波鞋呢?
係咪同佢d汽水一樣漏氣既呢?



因為玩過左籠, 所以要搵地方過夜,
又孤寒唔想住酒店, 友人就提議搵賓館.
大約都係二百蚊一晚, 但質素就可以差好遠.
內地朋友教落登記之前一定要要求睇房,
結果我地就見識過炮房, 甚至刑房...
最後決定響呢間落腳, 算係幾唔錯的了.
至少d床舖真係乾淨訓得人.

但我地亦都響呢間賓館遇到好多騎呢事,
例如撞上三個麻甩佬同我地爭一間單人房,
冇錯, 係三個麻甩佬, 要一間單.人.房, 過夜!!

仲有就係賓館好先進用電腦匙, 但張卡係永遠開唔到門,
而管房求其一張就開到全賓館所有門,
然後我地半夜睇波果陣竟然聽到門外有人嘗試開我地度門...

當然仲有"尾房鬼故"啦,
不過唔講lu~



荔灣馳名艇仔粥,
咁去到荔灣諗住咁出名, 求其一間都唔會衰得去邊...

點知就係瀨野...
呢碗係我近年食過最削的艇仔粥!!
仲有好古怪的牛腩腸粉 (冇入鏡)
食物還是東莞的比較好, 求其坐底一間都唔差.

賓館對面有間賣魚皮的, 原本想幫襯,
但見佢upup dupdup就冇理佢,
點知原來好出名...
呢個仲要係我返香港之後先知道...

反香港亞運關注組

唔記得有冇響呢度提起過(定係舊BLOG?),
我係舉腳 反對 香港申辦亞運的.

話說好幾年前香港已經申辦過一次,
當時街上面不時有簽名活動叫市民聯署支持,
有一日就撞正有個妹妹拎支筆行埋黎叫我支持一下香港,

我就答佢: "我反對架喎..."
妹妹估唔到我不被美色所迷惑, 問番我:
"點解唔支持咁有意義既事呀? 大家都係香港人嘛~"

"妳數下香港有幾多個運動場先啦!
妳知唔知香港最有規模果個體育館響邊度?
妳又知唔知果個體育館最常辦係乜野活動?"
阿妹, 我就係香港人先唔想親眼睇住香港失禮呀~"


P.S. 呢件事亦都引發到其後專欄的其中一篇~
想重溫的話可以到呢度 (對, 我又來賣廣告了~)

又, 其實我係幾鍾意果篇的~
係少數一路寫一路笑的雜文.

是日入手

我一直對reebok呢個品牌非常感冒,

高不成低不就, 市場定位錯到離譜.

咁多年來我連(曾經)大熱的pump fury都未買過一對,

但唯獨呢對思前想後, 細個冇錢買, 大個算係還個心願.

論好著就一定冇而家果d creator乜乜 又或者 hyper乜乜 咁好架喇,

不過可以扮下佢咁囉...

始終都係橙色波波先叫正宗~

是日對話

(訴苦mode) "近排好窮, 成日要同隻狗睇醫生..."

(關心mode) "妳隻狗狗乜野事呢?"

(欲哭無淚mode) "佢扭親條腰呀..."

(毫無良心mode) "...狗條腰即係邊度? 如果度腰圍呢應該係打橫度定係打直度先0岩?"

3D 兩味

唔好以為3D只係大片專利,
而家好多B-movie都攻佔立體市場,
仲有咁盡玩咁盡.


- Piranha 3D
目標非常清晰, boobs and blood,
絕對滿足到B片觀眾需要,
笑位同嚇位到合格有餘.
不過3D效果強差人意,
大部份close up 鏡頭係睇唔到立體的其實.
(當然你會知佢close up 邊部份~)
就算我已經係坐響全場最正中果個位都睇唔到,
只係睇到影象重疊...

好期待毒蛇嚇機拍3D呀下~



- The Hole in 3D
冇乜宣傳的一套, 故事講一家人搬屋,
發現新屋地牢有個無底洞,
而自從地洞打開之後, 各人就開始輪流撞鬼...

講真, 故事係非常之咁把屁的.
亦冇乜驚嚇成份,
到結局仲直頭變左inception一樣.

不過, 佢既 3D效果可算非常出色,
幾乎每一件道具擺位都係為3D而設,
空間感強烈, 亦見心思.
唔計阿煩達的話, 呢套的3D效果應該係我睇過做得最好的.

是日廣告

屌你正呀喂~

知名blooger又一例證

拿~ 連上市公司都有留意我個blog呀!!~~

首先,

這是上年的文章

- 霸王計劃來港上市集資23億
拿~ 集資做乜先?!
會唔會開發中藥剃鬚膏又或者草藥衛生巾(係就正宗up得就up了)先?
個股價又會唔會"動L"先?
陣間你個代言人無啦啦衝出來發放股價敏感消息就唔好啦~

然後...

今日新聞摘要:
http://hk.biz.yahoo.com/100906/357/3x35q.html

全國最大中藥洗髮水製造商霸王（01338）近期深陷二噁烷泥潭，股價大跌，銷量減少，消費者信心受影響，為扭轉危機，公司首席副執行官表示，霸王 的當務之急是要恢復公眾和投資者對品牌的信心，公司將通過調整配方，儘可能降低產品中二噁烷含量，又會適當地加大宣傳推廣，並且以贈品增加促銷力度。另 外，將向多元化發展，推出草本牙膏、草本衞生巾等新產品。
公司主席陳啟源透露，計劃兩年內推出草本衞生巾，並認為中高檔女性護理用品市場有潛力。

冠名贊助

近年籃球都興賣心口廣告,
中國隊就係"中國移動"贊助, 但諷刺的是球員偏偏不太會移動...
而巴西呢, 係由"Electrobras"贊助...
唔係bra來的...electrobras係巴西的電力供應商~

而法國呢?
.
.
.
.
.
.
.
係"kinder", 冇錯, 就係出奇蛋果隻"kinder"
結果佢地尋晚出奇地贏左上屆冠軍西班牙~
巧cutecute

三十套印象深刻電影

我唔敢數三十套最好睇電影,
因為實俾人柴台,
我睇開果D的確又未必好好睇 (我知有版友經常當我係明燈~)
而且要數真係何止三十套,
唯有數下印象比較深刻果D:

trainspotting
- 冇得講, 長期第一位! 當年睇果陣太大impact.
太有型了吧!~

hot fuzz
- 笑片來講, 佢既剪接都真係出色得好緊要~

being john malkovich
- 散場果陣第一時間搵係邊個編劇, 從此愛上呢個精神分裂的人.

Reality Bite
- 90年代型片, 每個潮童都想成為戲裡面的ethan hawke/winona ryder.
而好多人都唔知呢套型片導演其實係......ben stiller~

牯嶺街少年殺人事件
- 套戲接近四粒鐘, 而我連續睇左兩次...

你哪邊幾點
- 奇! 我到而家都好想知究竟蔡明亮電影有冇攝影師架呢?
佢果種有如閉路電視式拍法真係睇到O晒咀, 但又會繼續睇...

miss little sunshine
- 我覺得呢套係可以列入劇本編寫教材的.

fight club
- 每個人心裡面都有一個tyler durden!!

the english patient
- 正宗史詩式愛情巨著! titanic行埋一邊啦!

american beauty
- 極愛佢對陰暗面的幽默, 而其實另一套題材極相似的"happiness"都正, 只係唔夠幽默.

the shawshank redemption
- 又係冇得講, 近廿年劇情片之王!
明明睇過好多次, 每次重播又會坐定定響度睇.

the clockwork orange
- 佢改變左我對世界既睇法! 噢~~

天空之城
- 細個睇果陣睇到嘩嘩聲. 而soundtrack我keep到而家.

陽光燦爛的日子
- 應該係第一套我覺得好睇的國產片,
慶幸中國終於開放, 唔再係剩係識得拍山山水水人人.

memento
- 睇年散場果陣我係呆到唔識走.
如墮五里霧中.

宅配男金色搖籃曲
- 應該係我睇過最好睇的日本電影
E阪幸太郎又係另一個神人, 可以將一大堆九唔搭八的東東連埋一齊.

變態家族
- 相反, 呢套應該係我睇過最難睇的日本電影.
完全唔撚知佢做乜!
當年響戲院全場觀眾不停喪屌, 而家諗番都好過癮~

鬼影
- 我唔怕鬼片, 但呢套真係嚇得下.
佢最成功係你每次頸緊膊痛都會諗番起呢套戲~

香港製造
- 慶幸我唔係因為老翻碟先認識呢套戲.
以緊絀成本拍出一套咁勁戲好難得.

city of god
- 點估得到巴西居然會拍得出好此好片.
簡直係巴西版的trainspotting.

藍色大門
- 一個簡單到喊的劇本, 加幾個冇名氣演員.
竟然係幾好睇!
我當時一路睇一路問: 如果F4果幾條蛋散都紅得起,
無理由呢幾個主角紅唔起架...?!

艷鬼發狂
- 個人認為, 呢套先係港產鬼片之王!
半夜睇真係睇到寒. 而其中一個做鬼的女角,
叫黃夏蕙! 驚哩~!

力王
- 因為漫畫所以入場睇, 極度血腥,
但由於佢戲中的 血液/內臟/手腳 都係假到去一個'低鳩能'的地步.
笑到收唔到聲, 仲成為一代CULT片~

論盡我阿媽
- 艾慕杜華唔玩SM唔玩畸戀, 原來都可以好好睇~

ONCE
- 又係一套刀仔鋸大樹的示範
麵好味湯好飲, soundtracks又係必買.

SAW
- 只係第一集好睇, 扭橋扭得好.

ameile
- 未必係最好睇, 但導演到劇本到演員到美術等等,
每一個範疇都係極高水準.

primal fear
- 原本的一套b-movie,
因為一個edward norton而變成為一套猛片~
從此認定edward norton接的戲, 要追!

- 天空小說
林海峰拍的戲其實唔差,
當然呢套經典在首創7-11換戲飛,
結果攪到全港7-11同埋港威淪陷一樣.
但講好睇, 其實'廢話小說'好睇d.

- delicatessen
黑色幽默經典之一!
戲中好多場面其後成為其他電影抄襲來源,
例如本地"黑玫瑰對黑玫瑰"經典的"床上ununun戲"就係抄自呢套.

第36個故事

近期最愛電影之一,

雷光夏的音樂實在功不可沒,

成套戲非常的舒暢~

桂綸鎂依舊的女神, 飾演佢個妹的林辰唏清新爽朗,


而睇番youtube先知原來佢係來自娘到爆的"我愛黑澀會".....-.-

soundtrack可是必買的~!

官方網站:
http://www.taipeiexchanges.com/

是日廣告

哈根大師!!
好鬼王家衛~

雜 絮

- 日子近來過得很爛, 心情低落, 但總要保持高昂意志...

- 友人相約到花墟打波, 驚死我唔識去,

但我其實有數年時間曾經長駐花墟鬥波.小食部換左老細,
但態度依然親切. 冰菠蘿$3; 油脾$8, 好抵食!
更衣室比以前企理, locker更加有中央管理, 仲好過室內場.
(但沖涼竟然冇凍水囉! 三十幾度, 水箱都燒滾了),
以前打波後的飯堂已經執笠...好懷念以前十幾廿人一齊行落太子食飯,
叫'送'叫到打交咁滯的日子~

- 有人千辛萬苦終於可以獨立搬出來住,
點知新居唔夠一個禮拜就鬧鬼!
而家仲要係七月...

- 話說我部親愛的android 電話有呢個鬼劃符鎖機功能.
然後我企圖創作一個好有型的開鎖符...
而結果... 我lock死左自己部機.
攪左成晚都開唔到, 第二朝死死地去維修中心,
佢一見我部機就冷冷地一句
"要洗機喎..."
!!!
就係咁,
近半年我所有新認識的電話, email, 甚至'新mon'的題材都冇晒...

一頁台北

好耐未試過俾一套戲'fake'到應一應.

由戲名到poster到男女主角都理應係愛情片格局,

但實情係:

.

入場前以為係愛情小品;

睇到中段竟然變成懸疑警匪片;

再睇多陣先發現原來係黑色幽默(!!)

.

講真, 戲真的非常一般.

但散場後導演行出來講解一輪之後,

又竟然覺得套戲好睇左 (!!)

.

簡單來講 (放心, 我唔興劇透的~)

.

- 男主角是傻的; 警察是傻的; 就連奸角都是傻的!

而女角們全部都係靚的...但一樣都是傻的!!

.

- 同志明與春嬌一樣, 套內湧現大量本土元素,

例如提及當兵, 台語劇, 夜市, 誠品等.

台灣人會睇得窩心好多.

.

- "一頁台北"係食字gag, 正音係"一夜台北",

(套戲係講男主角一夜之內所發生的瘋狂事)

而全片書店部份係於誠品拍攝, 跟 pageone 無關~

.

- 近排果個鐵達時型男楊祐寧只出了一個shot, 有心睇佢的可以慳番.

.

- 成套戲最出果個係過氣型男(?!)柯宇綸~~

睇唔明inception怎麼辦?

可以試下睇圖解
外地已經有粉絲製作mind map poster, 好好心機!

(未入場的請勿往下看)
.
.
.
.
.
.
.
.
.
.
.
.
.
.
.
(不過如果你想入場前做定功課都可以).
.
.
.
.
.
.
.
.
.
(需則我又唔覺得真係咁難明, 只係複雜少少之嘛, charlie kaufman果d仲複雜啦)
.

壞品味系列 - 神之手指

忍左好耐, 最後都係受唔住誘惑...

其實...

呢件野係用來夾薯片的~

用處係等你食薯片果陣唔會成手油

而夾完之後佢仲有個掣可以捽手指捽走D薯片碎 (!!)

如果手指尾可以拎埋出黎了牙就冇得頂喇!

當然, 呢隻手手仲可以有其他用途...

(唔係你以為係做乜?)

一個故事 - 唉...瘋...

"我尋晚去左排隊買iphone4~"

"你以前有冇試過排隊買洗衣機?"

"痴線~ 邊有人排隊買洗衣機架?!"

"咁你而家又排隊買電話?"

"點同呢, iphone4係最新最upgarde型號嘛"

"你知唔知屋企部洗衣機係乜野型號?"

"洗衣機點同電話?! 電話要日日拎出街用架!"

"咁你夠日日著衫啦...唔見你去upgrade下個洗衣機?!"

"洗衣機來來去去都係咁架啦"

"電話又何嘗唔係來來去去都係打出打入呢?~"

[新蚊專欄重貼] 孤獨好環保

早兩日, 午飯時間口淡淡, 就一個人貢左落去街口果間日本料理食魚生飯. 正當我好肉緊咁又吹又攪手上果碗麵豉湯果陣,
突然被侍應劃破長空的一句”輸lin媽賒”嚇到筷子都飛埋落地. 除即望向大門, 睇下邊個咁巴閉令到侍應咁興奮,
點知原來係隔離會計部果四個港女OL.

女人好得意的, 無論身在何方都係要肩並肩咁行. 可能以為自己拍緊Sex and the City, 就算身在好逼夾的料理舖之內,
撞開晒d凳都照樣平排行. 佢地撞到去我果張凳果陣, 突然停步望住我. 對我一個人響街食飯感到非常好奇, 竟然問我: “不如一齊食丫~”

你以為有四個靚女主動同你食飯好爽? 其實佢地只係見我鵪鶉, 諗住搵我entertain佢地送飯.
“乜你一個人食飯咁孤獨呀?!”

我原本實在唔想理會佢地, 但我個魚生飯又未到, 唯有胡扯一番打發佢地:
“孤獨不知幾好呀~ 夠環保丫嘛~!”

“哥仔你用緊木筷子喎! 你同我講環保?!” 港女果然不是省油的燈!

好在我都係一條滅火的消防喉:
“木筷子大部份都係用楊樹製成, 而楊樹屬於速生木, 大概幾個月就可以輪迴一次; 反而你平時用來洗筷子果d清潔劑污染海洋, 幾廿年都未必分解到喎~
再講丫, 我一個人食飯頂盡都係食剩幾粒米, 妳地幾條女就成日眼闊肚窄, 叫到成檯都係食物但只用來影相擺上facebook,
到最後總會樣樣都食剩一半, 又係邊個唔環保呢? 今日見係妳咁好傾先講多兩句咋, 平時我唔講野架, 減少炭排放丫嘛,
妳地自己有冇發覺成日講人是非會講到好’支力’個口又臭’? 就係因為過度炭排放之嘛~ “

“侍應呀… 我地想調去果邊卡位舒服d…”

如果你覺得孤獨係一件慘事, 只係你平時習慣靠人帶俾你歡樂;
但如果自己能夠製造歡樂, 唔好靠人地, 孤獨其實不太可怕, 仲可以幾好玩~

來~ 宅男宅女們, 擁抱孤獨, 為地球出一分力, 為孤獨喝采!

跟周秀娜渡蜜月

未有書睇, 睇住片先啦~

志明與春嬌現實版

這是小弟的軍火庫,

為八月實施的十九支管制作好準備,

或者到時真係對住海關唱"一支得卦"了...

是日對話

話說前排響專欄提過木筷子,
有唔止一個讀者(係~ 我係有人睇的原來) 來信(係~ 仲有來信tim, 我個email係真的, 不過我唔明點解個個來信開頭都話好驚我覺得我唔會覆, 放心喎~我個email好乖唔會咬人的, 最多只係會叫你提供credit card number助養佢~),
問既, 都係呢個問題:

[censored] 說 (下午 02:39):
"木筷子大部份都係用楊樹製成, 而楊樹屬於速生木, 大概幾個月就可以輪迴一次; 反而你平時用來洗筷子果d清潔劑污染海洋, 幾廿年都未必分解到喎~"

[censored] 說 (下午 02:45):
係唔係真架?

jerk 說 (下午 02:46):
係架~ 但呢d野, 同宗教一樣, 信則有, 不信則無.
正如ipad取代紙張係咪好環保?
其實剛剛相反, 只要ipad出到第二代,
第一代就會變成大量電子垃圾, 比廢紙更加難處理,
但你會唔會因為咁而唔買ipad丫?
唔會丫嘛~~

jerk 說 (下午 02:48):
話時話, 好耐冇見, 幾時食飯?

[censored] 說 (下午 02:55):
唔食啦, 要洗筷子架!!!

估地方 之 開估 之 OCAT

之前果幾張相係攝自高文安先生的工作室,
(留意下泳池果張側面係有高生的自拍馬賽克~)
而附近, 仲有其他值得一睇的地方:


- emoi
係, 呢個其實係內地品牌來的~
銅鑼灣有分店, 但呢間有多好多選擇.


- 真係行過幾次先見到佢唔到,
隱身於冷氣機之間.
蠻有意思的.


- 呢間其實係酒吧.


- 呢間傢私舖好野來的,
可惜件件都好大型, 我屋企冇位擺...

- 屠房一樣的外觀, 但其實係一個個藝術工作室.

- 另一邊的工作室, 由貨倉改建而成.

- 星巴克, 唔一定間間一樣樣的

其實, 以上所有, 都係來自深圳,

近排好出名果個華僑城之內的

OCAT當代藝術中心!~

上開去深圳按摩買碟食野味的話, 抽個零鐘去hea下確係不錯的~