2010年3月30日 星期二

有關 志明與春嬌

(係, 我係講套戲~)

好多人一睇完套戲就雞咁腳走,
而錯過左以下呢一段:

2010年3月29日 星期一

一個故事

在那末晨光照射不到的後巷上, 春嬌遇上志明.

"小姐, 可唔可以借個火俾我?"

" 拿..."

"唔該~...
小姐妳俾個電話我丫, 等我聽日可以還番個火俾妳."

"你成日用呢招抄人牌架?"

"妳唔俾我真係還番個火俾妳既?!"

"挑...屎橋..."

" 若果我聽日真係剩係還番個火俾妳咁點先?!"

"你聽日見到我先講啦!!"

-----------------------------------------------------

是晚, 春嬌因為加班極盡疲憊, 而再到後巷打邊爐,
亦再遇上志明...

"sorry呀~ 我唔記得左聽日係假期, 所以提早而家還番個火俾妳."

"點還呀?!"

"妳...企後少少先."

志明緩緩行向垃圾桶, 燃點起早插滿在米缸上的'滴滴金',
火花四濺.

"妖...就咁咋?!" 春嬌嗤之以鼻.

"睇埋先啦~"

未幾, '滴滴金'的火屑燃起垃圾桶內的重型花火,
後巷頓時上演一幕微型的"幻彩fing噹噹".

"痴線架?!" 春嬌如是的想, 亦講埋出口.

"拿~ 我還番俾妳架喇...happy new year!"

志明轉身離開, 趕赴友人的倒數派對.

那一夜除夕, 對雙方都起了深邃的變化...

2010年3月21日 星期日

雜 絮 有關創意

- 好多人都覺得鐘錶設計係夕陽工業,
但事實係長玩長有!~




如果有人送俾我, 多好~
盛惠$3900......加幣!
- 繼之前無葉風扇之後又一傑作...
無針錶~! (不過唔係dyson生產)




- lego每次出親電影相關產品都會出事,
(starwars 除外, starwars出舊屎都會有人排隊買的...)
今次玩到即將上畫的波斯王子...
唯一值得講的, 只係lego首次出現駱駝figure...
有興趣的可到 lego.com 訂購.


btw, 遲d仲會有醜__到喊的toy story 3 lego...

- 睇素顏小姐講起 spike jonze,
呢個哥仔實在多元化到離晒譜,
今年亦都會參與3D製作, 將自己作品重拍兼立體化.
但...佢唔係3D新近的"i'm here";
亦唔係上年的"where's the wild things are";
更加唔係"being john malkovich" (雖則呢部好襯),
而係...
jackass!!!
有睇過jackass的話, 大約估到佢會3D乜野啦可?!

雜 絮

- 電影節戲飛早已收到,
但竟然唔齊, 仲要係漏左我最想睇而又幾肯定香港唔會上的
life during wartime...

- 遺撼又何止一個,
我亦都買唔到世博入場券...

- 原本有一篇'壞品味系列'想出,
果篇廣告係嬲到我一路睇一路jot note,
諗住再擺上網鞭屍,
點知成本雜誌唔見左...

- 尋晚突然得閒, 貢左入修頓睇銀牌賽,
支持我最愛的飛鷹.
奈何佢地實在海鮮得太緊要...
尾場的南華對永倫依舊...懶有火藥味...
但冇一次打得成交囉!

- 番到屋企收到網友突然身故的消息...
"RIP"之餘, 亦提醒我要做一樣拖左好耐的事:
睇中醫!

由於阿大夫只睇熟客, 所以可以慢慢詳談,
而成晚傾得最耐的題目, 竟然係
機械設計...!!
原來佢除左自己製藥之外, 亦都做埋所有生產機器...
一面執藥一面解答我對機械的疑問,
聽到O晒咀~

- 恭喜 空姐E 榮登google street view!
簡直係漆黑裡的螢火蟲一樣,
打左格都認得出呀!!
有緣人可到相關地段搜尋.

...唔係網上大hit果個擒窗裸女, ok?

2010年3月15日 星期一

關乎觀感

早排有朋友出書,
誠邀身邊所有朋友供稿, 而小弟有幸成為其中一個.
(係囉, 連我都有份, 證明好睇極有限啦~~)
而由於本書採取不記名政策,
出書之日我地大家都唔知邊篇打邊個.

某夜飯局, 有人就拎番呢本書出來講,
眾人一致裁定我就係果篇"兒時把玩衛生巾經歷"的作者....

喂...咪先咪先! 點解係我呢?

"因為好好笑囉~"
"因為呢篇寫得最賤~"
"因為你似會做d咁既野~"

此為誤解!

我隨即拎起本書, 揭到自己寫果一篇,
一班人頃刻起哄...

"你唔似寫d咁深既野囉..."
"都唔夠好笑..."
"你識字架咩?!..."

此為深層次誤解!!

2010年3月9日 星期二

幾個故事

1) 佢係一個中學生, 就讀屋村學校,
經常與樓上樓下的同學仔聯袂到球場踢波,
踢完波, 成班同學就例牌去些粉買杯思樂冰打躉,
打躉期間, 佢見到一個師奶, 拎住幾袋重野行過,
佢有諗過駛唔駛上前幫手,
但成班同學響面前突然做D與別不同的事係會被人取笑的,
是故, 佢別個臉抓抓頭, 走入些粉飲多一杯.
師奶繼續拖著重甸甸的背心袋前行.

晚上, 佢如常同屋企人晚飯,
見到檯上有一尾奇撚怪怪的魚, 就問阿媽
"阿媽, 呢條咩野黎架?"
阿媽淡然的說:
"咪就係你今日晏晝見到我拎住果條石斑囉..."

2) 話說母校平平凡凡, 唯獨數學科成績斐然,
唔係因為老師教得好, 而係學生個個都非常好賭.
放學第一件事就係check下邊個屋企冇人,
然後就拉隊上去打麻將,
打到父母放工就走鬼.
因為俾阿媽見到一定打到開花.
賭檯上, 我們一直過得癲沛流離...

及後, 其中一個同學仔突然叫我地上去佢屋企打牌,

"好~幾點走鬼呀?"
"唔駛走鬼架喎...我阿媽都響度."

上到去, 佢阿媽不但冇屌鬼, 仲煮埋飯俾我地食...
我地百思不得其解, 就直接請教伯母點解會俾我地上去開檯.

伯母語重深長的說:
"我個仔帶你地返來, 至少我仲知佢同乜野人玩,
點都好過佢晚晚唔返然後響出面識埋d唔知乜野人丫~"

3) 一早起身, 阿媽就開始去街市頻撲.

買魚好定買雞好?
買魚啦, 阿仔鍾意食, 但今日d魚唔新鮮喎;
但阿仔上次食飯掂都冇掂過碟雞, 應該唔鍾意食啦...
都係買牛啦!
哎呀~ 成十二點架拿, 要返去煲湯喇.
煲乜野湯好? 青紅蘿蔔?
唔得唔得, 上星期先飲完...
花旗參瘦肉? 都好丫~ 佢呢排d尿咁黃...

一直忙一直忙, 去到新聞時段先可以稍息一下,
此時電話響起
"我今晚唔番黎食呀"........嘟..........

2010年3月7日 星期日

2010年3月5日 星期五

新扑頭






呀~ 感覺清涼

2010年3月4日 星期四

臨老入花市 戰術篇

- 一定係賣無謂野, 因為實用野唔需要響年宵買.
.

- 要set一個極具競爭性的價錢 (當然大前提係我地都有賺),
一個顧客只要聽到, 唔駛點諗就會拎錢出來, 覺得'跌都跌左啦~'的價錢.
因為佢要諗的話, 諗下行遠d, 諗下又行遠d, 諗諗下佢就唔會返轉頭.
.

- 師奶可減, 情侶唔好減
因為情侶係最捨得駛錢的一群
而師奶好鍾意講價, 我地俾個希望佢企響度講,
順便可以聚集人流.
.

- counter方面, 好多人覺得擺得愈出愈好.
但咁樣其實令到條路窄左, 行人行得唔C服就會想快d走...
我地將counter擺入, 另外搵幾個人一字長蛇咁擺響出面分隔人群.
就好似入pit咁, 出面條路窄, 就會搵位走, 一見到pit(counter)有空位就會攝入來,
咁就可以營造出兩邊都係我地的現象,
方便sell野.
.

- 檔名方面, 慶幸大家都反對食字,
即係果d "虎盡金來" "雷曼虎煮"都興趣不大.

簡單點, 用"WoW"吧~

1) 既然唔食字, 就直接用叫聲取代
2) 上面提過, 希望行過的人一見到我地個價錢就會"wow~"一聲.
3) 我地係賣虎爪的, 兩邊W可以係爪, O就係買家個頭.
4) 我地有隻自製老虎做吉祥物, 個"wow"字可以直接放響隔離,
簡單易認.