2011年5月30日 星期一

左撇子的煩惱 ver1.2

- 經常會伸出左手來跟人握手...

- 搭地鐵果陣, 會出現撞閘既情況, 因為嘟錯隔離果度閘.
而當中又以九鐵出事率最高 (欲知原委請自行到九鐵閘口望望)

- "左撇子比較聰明的喲"
我唔覺得呢句係讚美, 甚至有點厭惡.
年中俾呢句野累死好多次.
信我, 我絕對認識過左撇的蠢貨!
極其量, 左撇只是較富創造力.

- 在八十年代既幼稚園, 用左手寫字應該同賴尿一樣屬嚴重罪行.
不然怎會被 打手板 見家長 兼罰佢用右手寫字?!
而家既左撇小朋友幸福好多, 已經唔再見到強逼小朋友用右手.
社會幸好還是進步的.

- 在學習上, 左撇子實在比有讀寫困難的小朋友還要折墮 (至少佢地仲有社工跟進),
每逢要上果D郁手郁腳既課堂, 如美勞, 音樂, 以至體育, 老師們一向只會用慣用的右手作示範,
你想學咩? 就得自行將整套動作翻譯成'左手VERSION'.
學到幾多, 就自求多福了.
社會, 其實又冇乜點進步過...

- 而家明白點解左撇較富創造力啦~?
根本唔係乜野優點, 只屬求生本能而已.

- 買鞋時, 都會先伸出左腳去試鞋, 但sales遞俾你果隻, 通常是右腳...

- 到銀行辦手續要簽名, 你總想大罵為為何條鎖鍊總是那麼短,
諗諗下又無奈要吞番啖氣, 側側身去就番筆...

- 上館子進餐時, 不論中西, 餐具都需要自己由頭執過擺位.

- 吹漲的是, 當你擺完之後, 侍應係會幫你還原...聲稱為"擺.番.好"...

- 更吹漲的是, 有時會遇上過份熱心的侍應, "擺.番.好"不特止,
還會企圖向你講解所謂真正的 table manner...

- 到你擺番好所有餐具之後, 開始有啖安樂茶飯食下,
但係左手面果位仁兄又會開始嫌你撞到佢...

2011年5月29日 星期日

若你喜歡怪人

年中總會聽到唔少人既願望係:
告別平凡生活.

而我每次聽到呢類說話, 都想衝口而出:
"我同你交換丫笨!"

自童年開始, 我去到每一個環境都太過起眼,
(正確一點的說, 是礙眼!)
無論我既內在抑或外在, 都一定成為大家話題.
然後自然被論斷為一個怪人.

從此, 我特別羨慕果d叫阿強/阿偉既同學,
亦妒忌其他擁有一副"大眾口面"既朋友,
佢地可以同其他相似既人自自然然走埋一堆,
湮沒於人海而不為人察覺,
而我, 永遠都係odd man out裡面果個odd man...

冇人比我更渴望平凡.

但你努力忘記過去, 但過去並不會把你忘記.
求其舉幾個例:

- 某著名blogger E小姐說:
"如果唔識你真人, 剩係睇你個blog, 我一定以為你係有精神病的!"

- 早前跟朋友晚飯, 席間佢送上書一大本,
再附送一句:
"呢本書好0岩你睇, 我一見到就諗到你~"
......而果本書叫做"瘋子的世界"...

- 耐唔耐都會有網友send下email俾我吹吹水,
(係呀~ 呢度有人睇架其實!)
其中一封是咁的:
(原文照錄, 唔關事的內容已變騎兵, 發件者請勿打頭~)
"哈囉Jerk生,
我是你的讀者,呢封email我好想send給你
因為我驚朋友討論會被人打
XXXX
XXXX
XXXX
係咪我有問題呢?
但我唔敢同人講
驚被人話我唔正常
咁我又覺得你可能會明白呢種感覺
所以send比你"

..........................................=.=

而又其實, 我可能暗啞底已經接受左呢種生活...

某: "有冇人話過你唔正常?"
我: "有, 好多~~"
某: "咁你有冇一刻覺得過自己真係唔正常?"
我: "條~~ 你問我都多餘既~ 你問得我, 我實覺得自己正常架.
如果我想為自己做一件事, 但係自己都覺得有問題,
我仲點解要做落去呢? 除非我有精神病架0者~"
某: "你咁肯定自己冇精神病??!!"

2011年5月23日 星期一

雜 絮 - 寫在等待電腦修復之時



- 唔好再問我睇過d乜野所以搞到咁...
(我知錯了)

- 前排老友結婚, 我地訓晒身去攪,
而當中, 小弟係負責統籌兄弟服裝,
幾經辛苦, 先可以襯到一set令大家睇落冇咁似酒樓部長,
畢竟, 唔係每個人著起西裝就會變 adrian brody 的!
呢個故事好似之前講過,
但冇講過的, 是我地當日萬事俱備, 然後遇上一個好鳩的攝影師...

我真係未見過一個攝影師會喝令兄弟, 喝令大忴姐, 甚至喝令親家奶奶的!

而我, 其實早於當日早上已睇唔過眼, 率先跟佢發難.
咁結果係點呢?
我今日收到佢影果d相.....
果然, 所有有我個樣的照片都係甩皮甩骨......
chok晒樣都冇用!

- 近排睇番多少少戲, 不過都係舊片多.

modern family:
第一次睇呢套電視劇, 係響飛機上面,
然後有日發硫屋企有full season, 睇下睇下就睇晒.
劇名好老套, 但劇情溫情得黎有時都幾夠賤.
尤其是戲內果個南美肥仔manny, 以細路黎講佢都可算好戲,
時而細路, 時而老人精, 拿捏得非常準確~

just go with it:
普通adam sandler式愛情片,
kill time 不俗.
但我睇完先知原來第二女主角係brooklyn decker...
唔怪之得咁熟口面...
andy roddick真係有福~

關公大戰外星人:
未睇晒, 但講真,
冇大家講到咁悶喎!
至少故事有晒脈絡 (鳩唔鳩就另外一回事),
cult片黎講都算係咁

我明白應該支持正版,
但呢套我真係忍唔住......

2011年5月19日 星期四

一個故事

某次飯聚, 席中有新朋友從事占卜工作,
朋友們即時起哄, 好雀躍推我出去試下佢功力,
因為我向來比較神秘, 冇路捉.

就咁,占卜師左計右計,
然後就彈出一句:
“你應該有好多女人架wor!!“

全場頓時鴉雀無聲...
然後各自 dup低頭默默埋首於面前的那碗飯...

2011年5月16日 星期一

壞品味系列: 來~擁抱國貨 - 匹克鞋的開箱文

(唔好傻, 冇PR會送野俾我的, 我真金白銀自己買架!!)

身為"撼祖國強盛"的一份子,
眼見世界工廠日益強大,
國貨技術應該進步不少.
為此, 唔趁早買對研究一下實在講唔過去...

OK...... 講真其實我係買厭了nike/adidas~!

先睇 匹克為shane battier所出的signature shoe:
BATTIER V
盒上印有專屬蝙蝠logo耶~


抽屜式鞋盒, 有誠意呀~

真身, 設計不俗 (雖則都係"疑似" nike 的air pippen 2)
面層膠料薄得黎都幾夠韌,
竟然比nike以前所出果d拉練鞋款優勝 (!!)


鞋舌位
金屬面emboss 大 logo
近睇ok, 遠睇非常麻麻, 唔夠metallic.
圓頭鞋帶夠靈活, 但成日甩鞋帶的...

鞋跟位
成對鞋最大敗筆
醜! 好x醜!
點解唔用番鞋舌既metallic logo呢?!
下面成條bumper咁既野又係唔知想點...

鞋底
中掌位置偷空了, 聰明 (中間紅色位置係空心的)
前掌有個十字坑, 跑果陣應該會舒服d, 但又應該幾易爛.
後掌用上自家製的cushion-3技術,
(即係"疑似"air max啦~) 跳果陣真係有cushion感覺,
仲要冇nike咁硬~


試後感
出乎意料地舒服, 可能係拉鍊款既關係,
成對腳包得好貼,
腳眼位亦加厚左, 冇咁刮腳.
亦減低扭傷機會.

不過透氣度比較低,
縱使拉鍊層下面大部份位置已換成透氣網層.

廣告宣稱耐磨, 則有待考證,
要著多幾次先知~

----------------------------

同場加映另一款為Jason Richardson 所出的 JR1:
造型著通, 但datails位有驚喜

鞋根位
唔講仲以為係nike出品
而JR的凹凸logo亦出奇地cool!
鞋抽位果條帶好搶眼

鞋面用上近年好hit的蛇紋,
鞋舌 跟 鞋抽一樣的九彩colorway, 低調得來又帶幾分浮誇~

鞋舌仲有Jason Richardson的簡稱及號碼: JRICH23


鞋底亦都係Cushion-3,
不過都係果句, 睇個勢好易爛...~


p.s. 由於匹克牌在香港剩係掛住上市(#1968)而忽略門市,
出去波鞋街係買唔到匹克鞋的,
有興趣者可上內地門市, 又或者去淘下寶寶~

2011年5月15日 星期日

miranda july 有新作!

冇乜幾多戲我係會睇兩次, 無論係睇碟或入場.
但當年 的 me and you and everyone we know,
我居然睇足兩次, 仲要兩次都係入場!

事隔6年, 真正才女 miranda july 終於有新戲上畫,
佢拍既戲未至於係極品,
但artistic得黎又唔算難入口,
總有一種淡然的吸引力, 讓你睇到笑住離場.

不過今次好似heavy好多...


2011年5月8日 星期日

幾個android 必裝 app

[咳咳...iphone撚請迴避]


- applanet
android最馳名的app之一,
功能係將部份market上的收費apps價錢...... 刪走!~


- app2sd
可以將部份程式的運行程序轉存到sd card,
大大減輕主機的負荷.

- lego minifig collector
well... lego 迷先有興趣.
如果你知最近lego出左好多散裝抽抽人仔包,
咁呢個app就好有用, 因為佢會教你分辨每個密封包裝內藏甚麼人仔.
唔駛再抽餐死~

- history eraser
專門刪除所有搜尋紀錄,
(係, android係不能手動刪除某些紀錄, 例如market上果d. 識得root機另計)
心虛者必備~

- dolphin browser hd
所有android原生browser都係廢的,
用過咁多都係呢個最好用.

- sms backup
好簡單, 佢會直接將機內所有sms轉到閣下之gmail之內.

- camera 360
國貨萬歲! 呢個內地開發的effect app提供多種攝影effects,
多到有排玩,
連"靈異照片"都係effects的一種...
效果不俗.

- astro
唔駛多講, 必裝.
因為冇左佢好多野都做唔到.
最好的一個file manager.
- voice search
配合埋google images一齊使用效果更佳.
只要對住電話大喝一聲 "蒼井~ 胸~~",
就有了 蒼井空~!

- advanced task killer
一click就可以剔除多餘的閒置程式.
慳位慳時間.

- picsay
執相程式,
簡單得黎又夠多功能,
直頭係android版的photoshop.


- mobo player
乜春都播到的movie player, 好強大.
連最難搞的rmvb格式都搞得掂.
仲support埋外掛字幕, 真係唔得你死~

2011年5月6日 星期五

折子戲

第一幕

人物: 西裝人甲, 時裝人乙
地點: 超市

鏡頭由貨架第一排尾部向前zoom,
zoom到中段甲同乙從左邊行出來,
再接住跟住兩人到前方.

乙: "真係唔駛買野上你屋企呀?"
甲 (四圍搵野look):
"唔駛咁客氣啦, 上黎坐下就好囉~ 呀... 尿片響邊排呢... 最近點呀? 呢排成日唔見人, 我個女出世咁耐你都冇見過."
乙: "其實...我呢排 xxxxxx(macguffin)xxxxxxx"

鏡頭close up, 甲擰轉頭望向身後的乙.

甲: "點解咁大件事你唔一早同我講呀?!"


第二幕

人物: 西裝人甲, 時裝人乙, 西裝人妻, 嬰兒
地點: 甲家

鏡頭由透明玻璃餐台底下向上炒,
開頭被所有碗碟遮蓋,
一碟一碟拿走之後,
鏡頭影住三人.

人妻(問甲同乙): "你兩個做乜神不守舍咁呀?"
甲 (指著乙): "佢... 有D事想請教妳..."
乙: "xxxxxx(macguffin)xxxxxxx"

鏡頭由窗外開始 zoom out

鏡頭一轉, close up 人妻抱起嬰兒把玩.

人妻(鬆一口氣): "哦... 我身邊都有朋友係咁~"
乙: "唔係喎, 唔止喎... xxxxxx(macguffin)xxxxxxx"
人妻(驚訝): "下?! 咁你忍耐左幾耐?"
乙: "....大約半年..."
人妻(難以置信) : "下?!!? 原來你忍左半年?! 你呢半年係點捱架?!"


第三幕

人物: 西裝人甲, 時裝人乙
地點: 私家車內

鏡頭影住正在望風景的乙, 然後pan過去zoom正在駕車的甲.

甲: "你記唔記得早兩年我消失左一輪?"
乙: "記得, 你話去讀書丫嘛"
甲: "其實唔係. 真正原因係當時我老婆都 xxxxxx(macguffin)xxxxxxx"
乙 (啞口無言): "......."
甲: "所以佢好明白你而家既情況, 因為當時佢都suffer得好緊要."
乙 (啞口無言): "......."
甲: "所以有時有野真係唔好怕, 要拎出黎講. 你唔講, 你以為得你一個面對緊;
你講出黎, 就可能發覺好多人原來都面對緊類似既問題,
真係you will never walk alone..."

---------------------------------------
延伸閱讀:

**有關何謂 macguffin, 可參閱以下維基條目:

2011年5月2日 星期一

難民遊 - 內地篇

- 呢個一睇就知堅野啦~
簡直係難民飯的極致!
rmb$25 有飯有菜有水有蕉,
仲送埋蘿蔔乾怕你冇野"送"飯 (你都知自己d野難食哩~)
而呢兜野, 係購自廣州會展...

- 晚上太過冇野做, 唯有去超市研究有乜好食,
俾我見到呢個, 一麵兩味!!
以為好特別, 點知只係比平時多包湯粉,
然後叫你用第二層兜兜裝住飲......
把屁到冇人有!!

- 第二晚學精了,
買番d穩陣品牌,
哈蜜瓜味午後紅茶冇wyman講到咁正,
我始終都係覺得紅色樽才是皇道!
青瓜味薯片就真係fresh,
fresh到唔覺係薯片, 似炸青瓜.

- 同場加映秀色可餐 racing queen!!
賣bb車都有racing queen, 問你死未?!

2011年5月1日 星期日

一個故事

那天, 我在路口呆等綠公仔向我揮手,
突然發覺身後褲袋位出現異動,
下意識倏忽醒過來轉身想來個sidekick,
轉到一半, 停下了.
眼前的不是小偷, 而是一位坐輪椅的婆婆.

那個褲袋, 就是她當時最大活動範圍之中唯一能觸碰到的.
她想要的, 不是錢包, 而是希望有人把她推到地鐵站.
沒有多餘的藉口, 只給我看看給磨損了的數根指頭.
或者, 這已是一個充分的理由.

路程頗遠, 免得大家郁悶, 便開始找話題閒聊:
她問我為何一個人在街上蹓躂?
我告訴她生活正如何失意, 只得一個人尋找轉角有沒有出路;
她跟我說出路伸一伸手, 拉一拉褲袋就會有.
縱然她看到的世界比我矮小, 但一樣找到出路, 分別在乎分憂.
我莞爾.

說著說著, 我開始問及婆婆的最終目的地:

"要過海嗎? 待會讓我找站內職員幫手好不?"

"不用了, 就在出口前停下就是了."

"妳不是要乘搭地鐵麼?"

"不...我是到那裡行乞"

她說得淡然,
但我卻不忍再推下去.
我在幹甚麼?
我正在送她去行乞?!
跟送她去死有甚麼分別?

為了整理混亂的思緒, 我獨自走到便利店,
拿上一盒牛奶, 放下, 又拿上, 再放下.
如果情緒可以跟牛奶一樣隨意放進雪櫃, 多好.

一輪掙扎之後, 我把牛奶放到她手上,
深呼吸來一句:
"來~ 我把妳推到沒有警察驅趕的地方吧"

婆婆隨即把掩蓋雙腿的毛氈卸開,
"不用怕, 傷殘人仕不怕警察的~"

這次真的不忍看下去了...
跟她相比, 我的痛苦算得上甚麼?!
但, 真的要到她那種境況才可以從容面對困難麼??