豪情3D

港產片我自問都睇唔少,
(我連羅守耀既戲都入場睇! 如果你想屌我唔支持本土電影的話, 我唔介意你拎歷年入過場既票尾來同我比對一下邊個支持得多D),
亦成日都好想好似某網站咁, 經常推祟港產片,
但奈何, 每次睇完我都想屌...

上次"金雞"我都已經費事提, 今次"豪情"更加係挑戰底線...
唔係道德底線, 係地底泥果條線...

一開場見到852電影有份製作已經知出事...
需知道852電影係何小姐心血, 852有份參與, 即係代表何小姐將會佔戲甚重...
(黎緊郭子健的"全力扣殺", 852都係有份參與......)
而你入得場睇"3D豪情", 我諗你唔會因為想睇何超儀架可?
此乃敗筆一.

導演李公樂,
雖則近年都拍左唔少爛片, 但睇"福伯", 睇"十分鍾情"果個一個shot直落既故仔,
同埋"師奶唔易做",
睇得出其實佢係比較有heart既一個導演,
所以今次就算都係拍爛片, 佢間中都會撚幾個唯美鏡頭,
但成件事, 反而變得好唔搭調了......

(以下含劇情...... 不過你睇到呢度都唔打算入場架啦)

講番劇情, 基本上係冇乜既 (同金雞比就叫有囉),
斷截禾蟲咁一幕又一幕濕濕絮絮駁埋杜汶澤肉搏各女優,
笑位已經唔好笑, 又悶,
諗住佢會夠鹹啦, 點知仲淡過我一路睇一路流既汗,
肉搏場面可謂非常求其, 除衫露兩點 un 兩 un 就當係一場...
既然係咁, 駛乜要搵女優呢???

當然, 我知 budget 好緊要, 但我寧願你貴精不貴多囉.
搵埋成堆又老又醜又脫得扭擰咁算係點?!
香港觀眾真係咁易呃??

更可笑既係連杜汶澤都一樣只露兩點,
成鳩日著住條底褲, 籮都冇露過, 你學人話訓身?! 你知唔知醜??

最撚火滾係搵埋夕樹舞子, 佢當紅果陣(九十年代)我都已經嫌佢老,
你而家走來仲搵佢?!
okok, 我當你係乜春集體回憶, 咁你叫佢出場講兩句笑話咪算囉.....

(請自行放大呢幾隻字)
你老味做乜要叫夕樹舞子扮學生妹?!?!?!

睇住佢殘到成個阿婆咁仲響度扮活潑, 我反而有d想流淚......

到結局, 就精彩了... 杜汶澤打av怪獸,
而幾隻av怪獸就係果幾個女優笠晒怪獸頭套所扮演既......

...情節係咪覺得好熟口面呢......
冇撚錯, 呢場戲竟然係同世紀爛片"富春山居圖"同出一轍!!
又係幾個主角笠晒頭套大戰, 而你完全唔知邊個打邊個!!!
我頂你個肺, 笠左頭套你話佢係李嘉欣都得架啦!
不如搵我去拍啦, 一樣架咋

her (觸不到的她)

- 入場只有一個原因, 就是 spike jonze!

- 點解 spike jonze 咁吸引, 可能因為佢太神經吧,
例如佢在拍緊"her"既同時, 其實正在監製另一套爛片"bad grandpa"...
 (jackass 班底你大概都知係乜戲吧~)...
真係唔到你唔服!

- 或者係我期望過高, 今次係有少少失望,
雖則拎左奧斯卡最佳劇本, 但冇想像咁出色.
大概呢個故事交俾舊拍檔 charlie kaufman 的話, 會虛幻多兩倍又抑鬱多三倍~

- 雖然講唔上極品, 但戲依然亮麗,
美術鮮艷細緻, 配合冷酷的環境,
非常養眼.

- 而呢套咁冷酷既戲, 其實係在上海拍的.
留心的話, 會見到男主角在高鐵站落車~

- spike jonze 其實好鬼希治閣, 經常在自己電影裡面出現,
咁今次響邊呢? 冇錯, 就係tv game裡面經常講粗口果個大頭公仔!

- 相比剩係出聲的scarlett johansson, amy adams 演出更加可親.

- 劇本拎到奧斯卡, 但勁好聽的the moon song反而拎唔到...

KANO

魏德聖繼續延續其原住民故事, 去到今次仲要挑戰很難拍的運動電影.

還要是沒有太大速度感的棒球題材, 講真, 幾牙煙.

雖則佢今次名銜是監制, 但我始終認為佢有插手部份導演工作.

至少, 在片長上, 跟上兩套, 是一樣的咁長~

近年棒球電影其實唔少, 

由掛羊頭賣狗肉的"無野之城"到講管理的"money ball"到講jackie robinson事蹟的"42"都有.

以上三套都有共通點, 就係都係主要講球場以外既故事. (都話運動電影難拍架啦~)

而KANO卻係少數講比賽的棒球電影,

竟意外拍得不俗, 某幾場的確令人熱血沸騰,

故事本身亦夠戲劇性,

但若然對棒球賽則多點補充就更好, 畢竟, 唔係每個人都睇棒球大的.

至於演員, 應該有部份本身真係運動員, 所以預左演技麻麻,
但我睇好戲份最重的曹祐寧, 有前途呀~

BTW, 香港版的主題曲幾好聽, 雖則我只懂陳柏宇而不知誰是VnP.

失憶大道 Mulholland Drive

- 一直好想講呢套戲, 但又唔知點講,
因為呢套戲實在係近代十大教材級奇片之一......

- 劇情'表面上'是咁的:
rita 交通意外之後失憶, 其後遇上女演員 betty, 然後betty熱心幫忙rita尋找記憶......

- 由於導演 david lynch 從來無對套戲作任何解釋, 全世界觀眾都陷於估估下行列,
甚至有好多人睇完成套戲都唔知佢正在做乜春......

- 但其實, 呢套戲, 係要掉轉來睇的, 因為實際劇情, 其實係咁:
成套戲既頭四分之三部份, 其實係 betty 既夢境, 而套戲最後果半粒鐘, 先係現實.
而最後果半粒鐘, 每一件道具, 每一個演員, 每一個動作,
都在解釋 betty 點解會發個咁既夢......

死未?!

由於網上有太多深入解讀, 我唯有講一d膚淺d既~

(以下含內容)

- betty 夢境內有部份演員既演技係極之浮誇, 例如 lollipop 女與及肥佬姦夫,
而呢幾個演員都有一個共通點, 就係在現實中係唔存在既,
呢樣, 亦都解釋左現實中的 betty 本身並唔係一個好出色既演員.
handle 唔到一d現實中唔存在既角色.

- 夢境內每一個電影界人仕都盛讚 betty, 表達出現實中 betty 係好渴望成為出色演員.

- 夢境內殺手錯漏百出, 證明 betty 其實對殺手並不信任.

- 夢境內有d角色收場好慘, 例如導演 adam, 因為呢d人都係 betty 現實中所憎恨的.

- 現實中 betty 提及過既跳舞比賽, 其實就在夢境的第一幕已經出現,
表達出跳舞係 betty 一生中最大的成就.

國際電影節刨馬仔時間

- (日本) 白雪公主殺人事件
中村義洋以往幾乎所有電影都未在香港上過, 而佢既紀錄亦算良好
 (因為次次都係改篇伊阪幸太郎小說), 所以相對來講係幾抵睇,
不過佢今次唔再係改篇伊阪幸太郎, 而係湊佳苗小說.

- (以色列/美國) 發條網
一套講述中國網絡成癮治療中心的紀錄片,
高登仔必睇!

- (丹麥) 性上癮 (前/反篇)
雖則呢套已肯定會在香港上畫,
不過在電影節, 就可以在同一晚睇晒上下兩集 (全片加埋四粒鐘),
但你頂唔頂得順 lars von trier 就閣下自理~

- (羅馬尼亞) 布加勒斯特夜未央
簡單來講, 就係before sunrise/sunset 的變種,
又係由開場講講講講到散場, 分別係, 導演前作鏡頭甚至唔多會郁...
估計呢套都係咁上下.
鐘意既就好鐘意, 討厭既就好討厭.

- (美國) 永生情人
jim jarmusch自上次"我係殺手年終無休"大跌watt俾人插到反艇之後,
今次又再挑戰自己, 拍殭屍片!

- (埃及) 一切從廣場開始
埃及紀錄片. 講乜? 就梗係講 莉花革命~

- (奧地利) 神乎其技漢尼卡
挑釁大師米高漢尼卡的專訪電影, 究竟佢會被導演挑死, 定係挑死個導演?

一代神作: 天機 - 富春山居圖

(注意: 本文含嚴重劇透... 不過冇乜所謂, 含唔含都睇唔明架啦~)

呢套戲, 已經唔係就咁用一個"爛"字就可以形容.

首先講講背景先:

導演係孫建君, 編劇係孫建君, 電腦特技係孫建君, 剪接係孫建君, 投資者亦都係孫建君...

而故事其實好簡單, 只係講兩幅國寶富春山居圖同埋剩山圖俾幾班人偷來偷去,

咁劉德華飾演的香港緝私科特工(?!)就要從壞人手上拎番國寶番黎...

故事集合鬥智, 歷險, 科幻, 武打, 靚人靚景, 愛情, 甚至情慾於一身,

但每一個範疇都只能夠用錯!撚!晒!三個字去概括.

而由於荒謬位太多, 訊息量太大, 愈是分析劇情只會愈頭痛,

所以只能point by point咁約略講講:

- 好多人話opening果段極膠CG係抄james bond,
但其實係更似向the girl with the dragon tattoo致敬. (但效果當然是差九倍)

- 如果有留意八九十年代港產片, 經常會見到好多操印度口音,
得幾句對白而又同劇情冇乜關係既鬼佬茄哩啡, 我好懷疑導演很愛九十年代電影,
因為呢套"天機" 就有大量呢d鬼佬!!

- 而比呢班鬼佬更九十年代果個, 是劉德華! 佢每一個表情動作, 都極之"夏日fiesta"~
導演仲唔係向九十年代致敬?!

- 我已經唔問一個香港特工/警探點解無啦啦去大陸追查國寶了,
但有冇人可以話俾我聽點解一個特工/警探係經常要深入賊竇偷賊贓,
仲要偷唔到, 而唔係拘捕壞人?!

- 場口經常無里頭地飛來飛去, 一時外國一時大陸一時唔知響邊度,
甚至突然sharp cut,亦靠大量字幕去提醒大家而家做緊乜,
咁樣做, 原因只得一個, 就係剪接根本剪唔埋!

- 戲中的劉華經常出現在一個高科技基地裡頭, 對住一大堆虛擬螢幕篤來篤去,
甚至有時行到半路中途都要番去篤兩篤, 因為佢個高科技基地係要用來打message...
但, 佢明明身上係有電話的, 仲要係nokia贊助.
即係點?! 即係nokia電話連send message都send唔到, 要返基地篤篤篤?!
難怪nokia就黎執...

- 而戲中的林志玲及張靜初有如鬼魂一樣, 完全可謂自出自入~
無論當時場戲做緊乜, 佢兩位鍾意入鏡就入鏡,

- 例如其中一場, 講劉華偷偷摸摸千辛萬苦倒吊潛入博物館, 點知幾分鐘之後,
你又見到張靜初大搖大擺咁行入博物館, 冇錯係行!入!去! 究竟邊個先係特工呢?!

- 張靜初飾演這個保險公司保安經理, 幾幅名畫俾人偷完再偷都好似唔關自己事, 算~
自己送上門俾人捉, 都算! 而呢個保安經理去到結局突然宇宙最強變得勁好打,
仲好打過劉華你叫我點樣接受?!

- 林志玲就更加神奇, 佢有本事在劉華一面在杜拜的一間酒店房偷畫時,
在隔離個廁所浸泡泡浴...而劉華又為左睇佢沖涼, 又突然畫都唔偷...
至於點解林志玲會無啦啦響人地間房出現? 冇人知!
又點解林志玲無啦啦響人地間房沖涼? 冇人知!!

- 故事一開波就出晒飛機大炮, 甚至飛碟去搶名畫, 中途又舞刀弄槍.
點知到結局正邪大對決,劉華大戰佟大為, 係突然斯文到玩劍擊....

仲要突然換衫! 仲要戴埋面罩!!
咁, 由於劍擊衫係一式一樣,
所謂的高潮戲就變成兩條蒙面蛋散唔知邊個打邊個地互篤.........=.=

- 講完一大輪, 當你以為成套戲只係圍威喂咁拍成, 就錯了,
導演據說花了兩年製作, 耗資超過一億, 場面浩大, 加埋杜拜實景拍攝,
大量華衣美服 (除了佟大為, 衣著很娘!), 大量後期CG打造而成!
每一part都非常認真, 雖則
全世界都發覺導演唔識拍戲,
係得導演自己唔知...

佢用一個好認真既態度, 去完成一件大家都覺得好鳩既事,
這, 就是cult~!

他看戲也一個人看 backup (2011-2012)

2012年4月27日星期五

陽光姊妹淘 (sunny)

在 "the avengers"上畫來勢洶洶之日, 我繞道而行, 反而去睇女人戲 "陽光姊妹淘"...

- 導演係姜炯哲, 前作只有一套, 叫"極速緋聞".

- 入場前我就係剩係知咁多.

- 故事係講中女女主角有一日在醫院巧遇讀書時的好姊妹,

但身患絕症的好姊妹時日無多,

願望係希望女主角幫手搵番畢業後失散的其餘幾個好姊妹, 在臨終前一聚.

咁女主角就一路搵一路回想番那些年的趣事......

- 冇錯, 成個故仔正正就係 "那些年" + "作死不離三兄弟"~

當呢兩套戲在香港加埋總共有成一億票房,

"陽光姊妹淘" 只要宣傳做得好d, 要過千萬其實唔難...

奈何片商對之如雞肋...

- 故事其實冇乜特別, 後續劇情亦唔難估,

但導演就真係發揮十二成功力, 一個鏡頭都冇浪費,

節奏掌握得好.

無論笑位喊位都見好就收, 絕對唔似得韓劇咁同你磨爛蓆.

需知道一齣大堆頭女人戲, 稍有差池就會變得婆媽到不堪,

更何況佢今次仲要面對童年及中年兩堆女人.

韓國喜劇片之王並非浪得虛名~

- 童年版選角係亮點, 要可愛有可愛, 要八婆有八婆,

七個女仔應該有兩三個會彈出, 包括童年版女主角的沈恩京.

- 其美術亦需一讚, 大量八十年代娘到爆的產品及衣飾重現眼前,

卻又不失亮麗~

- 導演本身應該係蘇菲瑪素粉絲, 除左戲內提及女主角貌似蘇菲瑪素之外,

其中一場戲亦係明抄蘇菲瑪素之成名作 "初吻".

- 平時好少叫人睇開心版, 但睇個勢都應該好快落畫,

有興趣的請到內地網一遊 (又或等出碟),

堅係唔錯的~

2012年4月2日星期一

HKIFF 戀之罪 (guilty of romance)

 

講起園子溫, 總不得不提其signature重口味元素:

血腥

色情

扭曲的人性

作為日本 cult 片界的翹楚, 園子溫今次的"戀之罪"相對易消化好多,

少了血腥, 多了探討人性,

再加埋時而亮麗的鏡頭, 

如果從未睇過園子溫的話, 呢套不失為一部入門級作品.

(另一部 "庸才" 其實都算入門級, 可惜套戲唔好睇)

劇情不贅, 想講係其他花邊:

- 女主角繼續係園子溫近年御用的神樂坂惠,

繼續在戲中同其他男角又摸又做又渣,

而佢老公就繼續響鏡頭後做其偷窺狂,

(冇錯~ 神樂坂惠就係園子溫現任老婆!)

現實中一樣彰顯其扭曲的人性~~

- 在文化中心睇"戀之罪"的確係別有一番風味,

剩係睇住女主角果對巨乳在文化中心的大銀幕上盪來盪去,

再加埋演奏級的環迴叫床聲, 

都真係唔講得笑~

我仲未講果d迫真度極高既人體殘肢呢,

普通戲院真係俾唔到你呢種震撼~.

- 電影日本版其實有144 mins, 比而家睇到的國際版多出30 mins,

所以國際版的海報全部都見唔到水野美紀 (上圖係日本版海報),

因為所刪減的全就是水野美紀的主線部份!!

所以, 戲中的水野美紀變得像咖哩啡一樣......

其實好可惜.

2012年3月27日星期二

HKIFF 失身不離三兄弟 (hasta la vista)

 

故事講述三名殘障人仕的失身之旅......

條橋係好cheap, 但套戲其實拍得極有水準,

劇本出色, 在人物性格方面尤其立體,

直頭連輪椅都交到戲..

導演亦沒有刻意去利用傷殘人仕去煽情,

相反大部份笑位都係來自三個主角的缺憾,

引到你笑之餘, 又不會演變成歧視,

當中的底線, 拿捏得確實不俗~

就如戲中所講, 就算你曉行曉走, 都一樣有缺憾.

唔好笑得咁大聲.

2012年1月10日星期二

龍紋身的女孩

(放心, 冇劇透的~)

 

 

其實小說我一輯都冇睇過,

但電影版(瑞典果套)我卻睇晒三集.

而更過份的是,

我屌足電影版有幾悶之餘,

卻又入場睇呢個荷里活版...

無可否認, 美國版在選景到選角到節奏,

全部well-polished過,

點都會好過瑞典版,

而劇情亦略有不同.

樣樣都好, 唯獨女主角及不上瑞典版,

Rooney Mara 係靚,

但唔夠 Noomi Rapace 演繹出果種倔強得近乎 insane 的眼神 及

無時無刻的自我保護意識.

如對荷里活版有興趣的話, 請準時入場,

開首的opening真係型到裂開!!~

不過遲入場都唔緊要, 

因為這個世界還有youtube~~

2011年11月13日星期日

保衛戰隊 之 出動喇! 朋友!

 

又一套有力成為 cult 片, 但最終成為膠片的電影......

- 好多人入場之前已經儲定口水諗住唾罵黃精甫,

但持平一點, 今次最出事的並不在導演, 而在劇本.

(不過黃精甫好似兼做編劇......=.=)

- 如果你話 juno / 大寶 冇份投資, 真係殺左我都唔信!

戲內的 juno 猶如北野武上身, 不停俾 close up 自己,

但又唔諗下自己副尊容......

(okok, 我自己都好樣衰, 但我冇逼你俾錢入睇睇我 close up丫嘛, 係咪?!~)

- 劇本本身已經係災難級數, 全部角色都係同一種口吻, 性格又如紙板般平面,

演員吃力而不討好 (唯一表現比較好只係夏文汐), 角色轉變更完全冇說服力...

- 搵人重新畫過宇宙大帝 CG 係窩心的;

但用咁多錢去砌 CG 而忽略其他部份就令人痛心...

- 溫超, 你都係返番內地啦, 香港而家已經唔多 buy周星馳架喇...

你仲要扮九十年代既周星馳...

2011年11月11日星期五

the human centipede II

 

就算有幾多人話佢低俗核突, 無可否認, 

human centipede 坐擁一條極具可展性的橋段,

可惜, 來到第二集, 已經冇上一集悶出個鳥來,

但 execution 依然係差,

導演剩係識得將一個 point 無限伸延,

叫一下就叫驚嚇, 但不停響度 non-stop 鳩叫其實只係令人覺得煩厭,

(同樣道理其實可以用於床上~)

而吸取上一集教訓, 今集加插大量血腥鏡頭,

可惜導演一到血腥就剩係識長時間 close up, 慌死你唔嘔.

但就毫無意慾去諗下點樣將個鏡頭拍得好d......

只見官能, 卻不見刺激

明明係爛片, 就唔好走來扮cult片!!

2011年10月31日星期一

雜絮 - 近期電影

  

- crazy stupid love (滾攪了愛情)

呢期個個都爭住去睇"那些年",

大概已經冇乜人理會呢套.

但其實, 撇除個老套結局, 整體黎講係唔錯的.

對白到肉, 人物突出.

但最突出都要數 Ryan Gosling,

究竟佢係點樣將自己塞入去件slimcut裡面而不失霸氣呢??

 

- Drive (極速罪駕)

(對~ 又係Ryan Gosling~ 唔怕話埋你知, 我仲睇緊Blue Valentine, 但不在此談)

勇奪康城影展最佳導演之作...

好一套四不像電影!!

愛情片唔似愛情片;

飛車片唔似飛車片;

就連 cult片都唔似 cult 片...

成套戲都好詭異,

康城果然係瀨野指標~

 

- 那些年, 我們一起追的女孩

利益申報:

我, 其實係一本九把刀都冇睇過的~

所以我唔知, 亦唔理佢同原著有幾大出入.

剩係睇佢拍得好唔好.

老老柒柒, 第一次做導演黎講, 確係拍得唔錯的說.

節奏掌握好, 頭半段很用心拍, 鏡頭擺位度到足,

不過中段(大專時代) 唔知係冇錢定冇力,

非常行貨.

而結局的一個 shot 又確係神來之筆, 

成個精神頓時又俾佢拉番番黎~

 

- 庸才 (Himizu)

我只係古谷實粉絲, 但唔係園子溫粉絲,

可惜呢一套, 著實係兩邊粉絲都滿足唔到......

頗為失望的一套.

順帶一提, 園子溫前作 "coldfish" 中的大部份演員,

亦都會響呢套戲出現,

包括果個變態大叔~ !!

 

- 萬有引力

由四個獨立故事組成的內地愛情片, 

陣容龐大 (仲有張靜初行性感哩!!)

故事不俗, 而且竟然唔老套!~

雖然有仲有好多地方需要改善, 但睇得出係用過心拍的.

不過香港上畫機會極微...

 

- 奪命金

(劇透含少少)

非常黑色的一套, 但只得黑色, 沒有幽默,

引致坊間大多劣評.

而又如果你從來未試過去銀行俾人sell基金,

確係好難感受到頭半小時果種荒謬感,

sell你果個 (何韻詩) 扮係幫你;

聽果個 (蘇杏璇) 又扮聽得明.

成個過程好似好專業, 但其實大家都係胡胡混混過去...

而之後導演將"陰陽燭"同"路紙"擺埋一齊又係一絕.

(ok, 唔知呢兩樣野係乜的話可以skip~ 唔知好過知)

冇錯, 好多人好鐘意由上一舖結果去推敲下一舖既走勢,

呢個係犯左邏輯上既錯誤.

奈何好多股民/賭客每一日繼續犯同樣既錯誤......

2011年9月19日星期一

one day 情約一天

warning: 本文含劇透含到落袋底, 未入場的話請迴避;

若果你已經入左場而又好喜歡套戲, 亦都請自行擰歪面,

因為我將會講d你唔會喜歡既說話:

.

.

.

.

我實在唔知呢套戲有乜咁好睇...

好感動咩? 但我隨手可以數到十套比呢齣更令人感動的電影...

「你識乜丫! 呢D叫細水長流呀!!」

冇錯, 細水確係有, 但我就真係唔見佢流喎! 死水黎既!!!

無論對白抑或意識形態都帶唔出佢倆個有幾愛對方,

單憑一句 "i love you so much, but i don't like you" 就當係交待左女主角咁多年有幾深愛男主角???

喂...真係唔該喎...

你倆個就一年見一次可以慢慢傾, 但我睇個半鐘架咋!

你年年都講d唔講d, 樣樣都斷開又唔打算交待, 約略hea過就算, 叫我點睇呀?!

定係其實我要一年睇一次先感受到箇中浪漫??

要睇得投入, 真係要自行加上若干想像力先成事...

而呀導演既講故仔手法就更加老套,

兩個主角一年見一次, 佢就真係夠膽死順住 88, 89, 90, 91... 咁樣順住落去拍.

其實, 既然你本身都拍到折子戲咁樣, 點解唔試下88, 91, 90, 93, 94...跳住咁去拍呢?

唔聽我講唔緊要~ 但最慘就係而家順住拍都唔見得順果下慘丫嘛!

「結尾咪跳番去果頭果段囉!!」

係... 結尾丫嘛! 結尾果陣我已經悶撚死左啦!!

佢每一段折子戲, 都會彈個日期出黎, 講真, 真係好鬼低手...

你大可選擇利用 搣日曆 / 睇電視 / 收音機廣播 諸如此類等小動作去表達日期.

就咁彈d字出黎, 係最悶亦都係最懶既表達手法...

(講開又講, '彈字'呢樣野都唔一定悶得晒, 

守屋健太郎早幾年拍的 "school daze" 玩彈字是玩得不錯的!~)

我到散場先知, 導演原來就係之前拍 "an education" 果位 lone scherfig...

屌~ 唔怪得啦~

呢條友係應該番去拍古裝片的!

返去磨墨啦妳!!

2011年8月17日星期三

忍者亂太郎 真人版

  

- 導演係拍開cult片的三池祟史,

前作就將家喻戶曉的"小雙俠"玩到變cult片,

點知今次, 出奇地正常!!

- 雖則話正常, 但cult味仍在,

剩係睇下上圖右手邊果堆配角就知,

真人版造型居然係比動畫版更加浮誇!

- 排隊入場果陣, 身後突然有條友問:

"呢度係咪排新丁架?"

我呆左兩秒先知佢問緊乜...

- 想睇"新丁"的話就未免會有點失望,

因為大部份重點係落在亂太郎身上.

- 而戲中的亂太郎係可愛到不得之了!

我被萌到了...~

- 我相信佢地原意係拍3D版本的,

因為有部份鏡頭係明顯為3D而拍,

包括新丁果條鼻涕.

- 笑位其實頗為密集, 雖則有時gag位比較鳩,

但因為動畫版本身就係鳩,

所以反而更加好笑~

- 如果本身唔係fans, 有d位可能會追唔切,

因為戲中不時有大量角色湧現,

一時三刻都分唔清邊個打邊個,

建議入場前可以上去官網睇睇, 又或者上youtube重溫頭兩集打個底~

(劇本係根據頭兩集改編)

- 竹中直人依然係日本電影界的鐵膽,

呢套都唔例外...

- 香港應該會正場,

因為譯左港版字幕.

- 完場之後唔好咁早走,

因為出 rolling 果陣有拍攝花絮同埋deleted scene.

不能錯過~

2011年8月8日星期一

睡床上的外語電影節

近來賣懶, 經常在床上攤屍,

但反而睇多左戲...

 

- soul kitchen (德國)

今期推介! 但只得一間戲院上, 仲應該就黎落畫,

有興趣的話請及早買飛.

平時專拍嚴肅文化差異題材的 fatih akin 第一次拍喜劇,

竟然有板有眼.

笑位唔算密集, 但落點準確,

不時令人會心微笑.

真係做到輕輕鬆鬆粒半鐘呀!

btw, 戲內飾演古感佬的 moritz bleibtreu 真係德國劉青雲黎架喎...

十套德國片, 八套有佢份...

- cold fish (日本)

說來失禮, 久仰園子溫大名,

但睇佢作品都係第一次.

我一直以為自己已經百毒不侵,

但呢套 "cold fish"又不失為減肥良品.

睇完真係食唔落野...

很黃很暴力, 再加埋變態殺手的步步進逼,

雖則結局係意料之內,

但還是令人喘不過氣!~

- 3 idiots (印度)

另一推介! 據聞香港下個月上畫.

故事係講三個電子系學生的友情, 親情, 愛情.

勵志喜劇. 雖則有d位依然娘娘地,

但劇本太整齊流暢,

每當你以為佢散場就會帶一個小高潮俾你.

就算發現犯駁位都唔太介意,

總引到你睇埋落去.

依然保留bollywood特色歌舞及斑斕色彩,

但不落俗套.

有d位仲拍得幾有型!

又係一套可以"帶笑歸去"的電影.

2011年7月4日星期一

certified copy

1995年, 有一套似係好有劇情實則又冇乜劇情的叫"before sunrise"電影突然爆出,

大家都係半信半疑;

直到2004, 原班人馬斬多幾兩拍成"before sunset",

令好多人相信呢類邊行邊走不停噴口水到日落的電影原來係有市場的.

而且成本低, 演員來來去去果幾個, 又唔駛搭景, 行到邊拍到邊;

又易控制, 好彩的話三日都拍得完.

是以造就近幾年不停有導演爭相仿效,

由"en la cama"到"room in rome"甚至

剛剛香港上畫的"certified copy"都係行呢條橋,

但, 係咪真係咁易拍, 套套都好睇呢?

漂亮的主角is a must,

講真, 如果你食飯果陣遇著個樣衰的響你面前不停講說話,

你都食唔落飯啦~

呢一點以上幾套都做得到.

場景最好要夠cozy,

而 "en la cama" 同埋 "room in rome" 都係響酒店房拍晒成齣戲...

em...咁有人覺得酒店房好cozy既又真係..

最最重要的, 是對白.

以對白推進劇情, 好似好易, 其實好難,

仲要成套戲都靠對白帶動的話, 稍一不慎就會跌到唔知去邊.

變成互相指指點點對罵.

對主角自己冇幫助, 對觀眾就更加冇得著.

而"certified copy"就係咁,

吵下鬧下就散場.

本身已經生活於loop完又loop的爭吵當中,

而家入戲院都仲要睇你地放題式對罵,

俾我靜下得唔撚得?!

2011年4月23日星期六

壞品味系列 - 3D玉蒲團

首先, 為乜要入場睇3D玉蒲團?

為3D??

早前外國傳媒已經討論過3D真係爛片溫床~

勢估唔到而家香港都有人參一腳一齊混水摸魚.

講真, 講3D技巧, "玉蒲團"連"鹹濕食人倉"都不如!

來來去去都係剩係識玩淺景深, 悶唔撚悶呀?!

頂盡都係加埋果 D 好似用FLASH整的單點透視飛刀飛子彈...削到呢...

如果想入場睇但唔記得帶3D鏡, 不要緊, 唔駛買,

戴同唔戴, 係冇乜分別的~

為睇女??

呢個網上已經好多人講過, 不贅.

只係想講, 四個女角只係得藍燕比較可觀.

兩位AV女(so99y, 我真係唔知佢地邊個打邊個~)只係負責露,

但樣又唔靚, 動作又浮誇.

雷凱恩就更加唔好提, d戲屎到連中學畫劇班都不如.

okok, 睇鹹片唔應該斟酌演技, 而集中床技係咪?!

好可惜, 床技都唔見得好好多.

btw, 葉山豪你都係番去日本啦, 你點睇都係一名茄哩啡...

為製作??

究竟個導演係咪基架呢?!

我真係好耐冇睇過一套情慾片可以咁不誘人!

毫無美感可言, 動作設計亦都頗為求其.

有乜野節目可以與之相比呢?

有...

discovery channel!

剪接又係另一樣把屁, 好似用movie maker剪既咁,

d場口話跳就跳, 完全唔理觀眾感受.

唔好同我講"過唔到電檢要剪"之類廢話,

一對波要點露先過唔到電檢? 有牙的嗎?!

為笑?

香港有班人好得意, 一聽到粗口就會笑.

如果你屬於當中一份子, 你好應該盡快入場大快朵頤.

呢個年代仲玩"有撚用/冇撚用"gag??? 冇病下話?!

咁成套戲最好笑係邊度呢...?

就係夾硬加插愛情元素落去.

真係笑你戇鳩都唔怕你嬲,

求其響街捉個睇過三級片既麻甩仔問下都知,

響屋企睇三級片遇著談情場面會點做?

"fast forward囉!"

呢個時候應該有死士衝出來話我唔識貨,

"玉蒲團可是一套有深度的愛情巨著呀!"

係囉可...愛情片又會特登去日本搵av女啦可...

蕭生, 呢d大話呃自己都有困難啦~ 仲走黎呃人?!

話說回頭, 無論我點屌都好, 依然會有人心思思想入場,

但若堅持想入場, 請到旺角豪華戲院, 只需$65 (早場仲只係$40)

俾到盡架喇~

信我! 套戲點都唔值$90!!