是日品牌

一睇到個廣告, 都忍唔住: "小~~__ 媽!"

http://www.softcup-asia.com/HK_Sdirections.asp

咁家庭裝的話係咪會叫大姨媽?

週末行街街 之二

第二站: e^v^v--perience

荷蘭x香港的設計
冇想像中咁多野睇, 但還算有趣.



廁所一個 (後而是花灑)



freeman lau的櫈...
又!係!櫈!






以下是一個反面教材:
(設計者不屑提, 自己睇)



拿~ 呢d咪叫壞品味囉!!
如果facebook有人發起罷買G.X.D產品, 我即刻開account支持~!
(唉...其實按快門之前掙扎左好耐...我好怕人地誤以為我好欣賞佢...)



第三站: carrie chau 展覽
講真, 作品冇乜好睇, 反而場地佈置更有睇頭,
其實如果有錢砌個咁既場, 擺乜都好睇d吧.



第四站: pageone



(幫人賣下廣告先)
若果各位覺得上圖盞燈幾靚, 想據為己有的話,
pageone其實係有得賣的~
全程d.i.y.(燈膽除外), 既可滿足一眾麻甩佬愛砌野的要求;
其柔和設計亦可粉飾女生的夢想部屋.
真係送禮自用, 無以尚之呀.

週末行街街 之一

第一站: 創新科技博覽



此為樂器電話, 吹蕭又得吹水亦得,
未必好賣, 但絕對好玩, 今年最愛發明之一.






此行當然唔少得拜訪下我最愛的"香港發明協會",
繼上年的"風力發電機"之後,
今年有呢個......



名為"創智名片", 仲申請埋trademark呢...
但我諗左好耐都唔知有咩野用,
謎團直至到佢個網頁一看先得到解放...
當然, 解放完之後係換得我一句問候啦.
咁都申請trademark?
我可唔可以拎呢個去申請?

有關gmail

前排gmail有得自選版面,

零零舍舍對呢款情有獨鍾

還是無知最幸福

某男跟某女結婚, 女的安排好一切大小事務,
連伴郎都係新娘搵番來.
仲要係新娘在台上給新郎製造驚喜...
雖說而家男女平等, 但都唔係咁盡呀?!
我覺得似幼稚園生日會多d囉...邊係結婚?! 跟本就係湊仔!
ok~ 呢d係人地家事, 唔管得咁多.
但同一夜, 婚後派對,
九個人: 三件訓低六個清醒.
而清醒果堆so called男人竟然對訓低果三個束手無策...
竟然要我呢個原本刷緊牙準備訓覺的第十個出來執手尾...
收到電話果陣仲以為咩野死人塌樓咁大件事,
飛車出到去見到都不禁屌左一聲:"就咁咋..."

雖則同呢堆男人唔太熟...
但我都實在為自己在場而感到羞愧...

一個故事

晚飯埋單時, 女的發現男的銀包一直攝有一張相, 像護身符.
照片雖模糊, 但其思念昭然若揭.
女的按捺不住: "誰來的?"
男的不忍告訴她, 相中人剛巧正處於同一所餐館五米距離之內...

近期手信

- 香煙兩款 (我自覺好似監倉既犯人...定時定候就有人寄D煙俾我~)

- 日本鐵路眼鏡布 (很宅的一件, 但我就是喜歡)

- 盧廣仲未紅時的EP (當年還未梳那個姑頭呢~正常得有點怪!!)

- 呢個...簡單來說是"廿一個一式一樣的膠公仔"...

即係用來做乜既呢? 其實係

冇!用!的!

背後"勉強"地教你可以點玩...你睇下咁大個"笑"字就知幾咁爛gag~

OK...這已是我最拿手的了...

同場加映 factory outlet 尋寶記:

竟然俾我響香港搵到adam morrison既tee (!!)

誰是adam morrison?

一般球迷都好難識得呢個奇人...

但佢果身八十年代仿古造型及球技堪稱一絕....

然而佢其實係八四年出世的...

一手舞曲

我唔否認因為小克而聽張繼聰隻新碟,
(雖則我d新碟多數都係唔駛錢, 但我都會揀的,
例如前排周x倫果隻, 我開左個袋望兩望就轉贈俾b小姐...)
一開就飛去聽果兩首,
第一首冇乜特別; 但第二首呢...

05. 一手舞曲
作曲：張繼聰
填詞：小克
編曲：張繼聰 / Goro Wong

(一隻手起舞　一隻手擁抱　一隻手苦惱
一隻手傾訴　一隻手鼓譟)
Oh 她在望著落日　Baby fat
心中多麼抑鬱　脫T-back
床上有個枕　床上有張被

逐寸在髮膚　逐處地愛撫
如銀河雙臂　靈魂遊千里
加速於彎道　擦過了雨霧
跌進那蟻丘比武
Oh 不疲勞　不迷途　滿身感歎號
仍難遇到你　唯獨靠生理
毒癮起　想起你 (此刻太俗媚　此刻太可鄙)
如何念起你　才是最美
靠單手去憶記

(上臂上臂彎　放緩了　大姆大姆指　
發麻了下半下半身　軟綿了　Woh ~)
Oh 躲在日落大道　Single bed
心中多麼糟糕　看《Jackass》
誰在報新聞　誰在報天氣
若愛念變枯　讓愛慾叫呼
如何迷倒你　為何離開你
加速響警號　愛意變憤怒
殺退猛獸般虛耗
Oh 不傾倒　不追討　半生的棄稿
仍難遇到你　唯獨靠生理
毒癮起　想起你 (此刻太俗媚　此刻太可鄙)
如何念起你　才是最美
緊握手　想把你鯨吞
若搐動未能　解心結悶困
就讓舊事遺憾
就像昨日愚笨
發洩了我的心癮
Woh~　如若太抽離
毒癮起　想起你 (此刻太傳奇 此刻太驚喜)
如何念起你　才是最美
今天我以單手去憶記

聽完一次, 以為係自己幻覺,
再聽多次已經忍唔住笑,
係好野喎,
既有想像空間,用字又唔差,
最正既係, 呢隻題材就連Wyman都未填過嘛.

好期望呢首歌既MV囉 (如有).

對 照

早前瀏覽一個經常睇到我HANG機的網站 (太多相了吧~):
http://hk.myblog.yahoo.com/ekwleung


突然身痕想去睇下而家既香港仲有幾多野剩底,
跟住就搵左幾張自己仲認得既地方實踐一下.

從前的裕民坊

現在的裕民坊

從前的巴域街

現在的巴域街

而其實, 我原本係諗住做呢D效果,

但太煩了, 亦阻礙了原圖的吸引力...

給我滾 滾起佢

感覺, 有點似細個睇三一萬能俠,
覺得好過癮, 但因變身過程太過誇,
而令你知道跟本冇可能會買得到佢既實物真身.
然後有一日, 居然俾你見到有心人將其實現, 量產, 擺上市場.



雖則, 我還是比較喜歡"嚴肅系列"的小克

資料來源: http://www.881903.com/

奠

都算係笑喪咯...

雜 絮

某舊同學(終於)嫁得出, 由於人緣好既關係,
邀請到當年校內一眾九唔搭八既同學闊別多年再次聚頭,
情況, 就如六大派圍攻光明頂...

- "小明星"有份演出的電視劇撞正果晚大結局,
而我地係無恥地要求酒店響上菜期間直播無線...
- 時移世易, 以前興交換卡片, 而家係交換facebook.
- 咁多人, 當然會見到好多過氣情侶.
有人早走; 亦有人席上高聲宣示主權:
"我不嬲都專一架! 唔係俾人飛 (全檯人即時望向某個人) 我駛搵過個?!"
更有人搞事:
"有冇人見過xx以前個女朋友?" 令xx即時面露尷尬神色.
(只因xx的前度, 而家變左做男人......)
- "小明星"平均每隔十五分鐘就有人走過來要求合照, 搞到我地變晒人肉佈景...
- 敬酒敬到耳鳴, 點解我次次都會坐正全場最嘈果檯?~

------------------------------------------------------------
科技遲緩的我, 終於都臣服於高清之下.
亞視好抵讚, 以幾個頻道硬撼J2;
欣宜好抵睇, 一句對白會送上十個表情...

------------------------------------------------------------
聽過 CS4 簡介會, 發現有個很神奇既功能:
一個layout可以sync過去人地部機果度, 然後對方可以同步改layout...
就咁睇好似好過癮, 但諗真d,
到時呢個又來add兩筆, 果個又走來轉下你個圖, 仲成世界既?!

------------------------------------------------------------
呢幾日不停諗方法將手上 林海峰X楊千嬅 既"滾-拉闊版" upload上網,
但轉極都轉唔到mp3...
然後, 睇wyman專欄講起小克將會進軍填詞界,
看來, 大家都留意到, 小克既文字 其實真係有d野的.

------------------------------------------------------------
近期想睇電影:

黑幫有個荷里活 -
向來討厭日本電影, 但我依然相信三谷幸喜.
至少, 當年去戲院睇"爆肚風雲"並冇令我失望.

海角七號 -
想睇, 唔係因為果幾億票房,
而係馬念先!!
就是糯米團那個的馬.念.先.!

窒色 (Choke) -
改編自 Chuck Palahniuk 同名小說 (!!), 夠啦~!

是日諗唔開

假如, 我真金白銀去買陳百祥果隻碟, 咁
我呢個行為
我係支持緊本地音樂丫
定係幫手摧毀本地音樂呢?

伯.仲.__.季

唔到自己唔認老, 中年危機提早發生,
我到今日為止都係覺得近來呢兩件事應該係屬於叔父輩管轄範圍,
並非我呢亭一介潮童所能抵受的.

1) 分!身!家!
唔係有得分, 係俾人分...(未死就俾人分身家...真係大吉利是...)
詳情不好說, 只能夠講同雷曼兄弟無關,
但我都想要求政府介入囉...
或者對方算得出我就來死...

2) 做証!婚!人!
兄弟做過, 姊妹我都做過, 但就真係諗到冇諗過做証婚人,
聽到呢個消息果陣完全一片空白:
"huh...?? 我喎!! 你老豆唔肯簽咩? 你有冇話俾佢知架??"
"佢一早知啦~ 佢都話叫你做!"
"搞錯呀佢...懶到咁..."
"咁你做唔做?"
"做!! "

畫

身邊不乏熱愛繪畫的人,
但熱愛到咁既地步, 就真係第一次見:
(以下內容以圖形來比劃會比較容易, 現場情況請自行將難度調升十倍)
首先, 佢係向大家示範如何畫一個正方形,
佢畫完之後, 望兩望, 覺得爭D野, 然後自行畫多幾個三角形.
跟住, 佢開始進入忘我境界, 粒聲唔出, 埋頭苦畫佢剛剛諗到既圓形.
最後, 佢見張紙仲有位, 加多兩粒星星先肯收筆.

佢, 係我既習畫老師...而當時其實上緊堂...只係教緊"如何繪畫一個正方形"
我地呢D小朋友當然唔會提佢啦, 仲想拍手呢~!

佢未必係一個好好的老師, 但至少, 你深信佢唔係果D hea 下 hea 下呃飯食之流.
仲開始覺得有賺呀~
(係, 冇錯, 我曾經都教過畫畫的...上堂可以有幾hea, 我好很清楚!)

食 量

由細到大, 身邊人總較緊張我的食量.

當其他父母宴客時講: "阿仔呀, 彈首歌俾uncle auntie 聽丫~"果陣,

家父係會: "阿仔呀, 食晒碗飯俾uncle auntie睇丫~".

只因我身型跟食量呈嚴重反比.

而其實我未開始食, 果d uncle auntie早已俾我隻私家飯碗嚇親.

反而, 我自己就冇乜點理會過食量呢個問題.

我不饞嘴兼揀飲擇食,

食得多, 純粹係因為

肚.餓.

好簡單的事實, 但個個都唔信...

------------------------------------------------------

同場加映 "宵夜速遞"

某牌子的 - 微波酸辣海鮮燉飯

先講佢個賣相... 似乜呢?

令我諗起茶餐廳後巷...

再講內容... 點解唔正正經經整個飯呢? 好扮唔扮要扮risotto?!

risotto已經唔易整得好食啦, 擺入微波爐就衰多二錢.

以為自稱燉飯就可以蒙混過去?

仲要自稱酸辣...既不酸亦不辣, 非常把屁.

又, 點解隻蝦會連殼既呢? 想點?!

想表現得新鮮d呀?! 你冇病呀?!

係咁新鮮就唔好擺超市雪櫃啦, 直頭擺街市海鮮檔嘛!

對照組:

布吉某7-11的冬陰功炒飯

賣相唔好得好多, 但講好食就贏幾條街!

辣到噴火 (所以要響泳池邊食...)

更重要的是, 佢只係賣HKD$9...

我愛國貨

話說李寧在奧運開幕禮上點燈,

燒得主贊助商adidas面目無光,

以為李寧牌從此愈燒愈熱?

點知佢既品牌行銷策略差到你唔信...

就以佢地既戰略重鎮--籃球為例

眼見國內對手匹克牌簽下 jason kidd 做代言,

佢又慌死蝕底, 找來...咳咳...baron davis (!!)

一位冇乜觀眾緣, 兼且效力一隊"你冇乜幾可可以響電視睇到"既球員...

(註: 隊波叫 L.A. Clippers, 記住, 係 Clippers, 跟 L.A. Lakers 差別可大的)

另外, 佢地贊助既西班牙與及阿根廷男籃分別得到銀牌跟銅牌,

但呢兩隊既波衫竟然從未公開發售...

相比之下, 呢件練習版就彌足珍貴...

此為行銷策略差勁的又一例証...

呢件野, 我係響近乎倉底既地方搵到的...

[FW:] 地下天文台長的一席話

颱風襲港是天災，怎麼可以用「有用」、「無用」來形容？
每次打風，我都會收到大量「風球查詢」，大部分都不是氣象愛好者，他們只關心會不會發八號風球，甚麼時候發，維持時間有多久。「即是無用喇。」當我說星期三可能要如常上班時，我收到這樣的回應。颱風甚麼時候變得「有用」、「無用」呢？
大概是令天文台於清晨發出八號風球並維持整天的颱風最「有用」，中午發出尚可，傍晚發出並於翌日清晨改發三號號最「無用」。
香港人工作壓力大，想放假無可厚非，不過大可以自行申請年假，或乾脆辭職不幹。把假期寄望於颱風走勢和天文台反應，未免太不可靠，而後者往往比前者更難預測。記得我在天文台預報中心工作的某個晚上，當我忙於分析颱風動向時，接到市民的投訴： 「你們甚麼時候才掛八號風球？﹗我要約朋友開檯打麻雀﹗」如此投訴，當然不成立。
掛風球的原意是警告市民颱風襲港的危險性，並儘早回家。如今社會變遷，打風期間娛樂場所照常營業，公共交通工具仍然提供有限度服務，打風外出消遣的市民越來越多，更有市民不顧危險攜同小孩到海邊吹風觀浪，訪問時還振振有詞。
現在八號風球已被理解為「額外假期」的同義詞，假如假期無法兌現，當然「無用」。當天文台不發八號風球時，市民高聲疾呼「上班有危險」；當天文台發八號風球時，市民卻紛紛外出。或許在部分香港人眼中，打風外出並不危險，最危險的不過是通往辦公室那條路而已。颱風的威力足以造成嚴重傷亡及經濟損失，不能用「有用」、「無用」來形容。
但有一種颱風是「有用」的，就是帶來雨量，抒緩旱情的那一種。

無聊相集

清理MEMORY CARD之時, 發現自己影影埋埋好多垃圾相

眼看手勿動的標誌 (!!) 很喜歡那些在細微細眼地方做手腳的人.

當你某日夜闖某工廈, 行經轉角位撞到咁大支咖啡,

實在同撞鬼冇分別的.

大鄉里出城見到高樓大廈會"嘩~!"
電車仔入鄉見到矮燈柱一樣會"嘩~!...用來照侏儒架?"

量產岳敏君!

局部量產趙碩之!!

係應該用呢個角度睇的!

寒舍的天然裝飾...次次新款, 仲一隻比一隻大份...

證明我屋企係幾咁好食好住...

雖則圖中係廁所...

太歲上頭

據說, 小弟今年犯太歲,
某人建議我去睇睇某"香港四大靈媒之一".
(唔好問我點解犯太歲要睇靈媒...我都唔知~)
咁去之前, 就梗係問下佢究竟有幾"靈"啦

"佢好勁架, 不過唔太鍾意講野囉, 通常係我講俾佢知, 佢再答我點做囉..."
"嘩~ 咁實準架喎..."
"唔係呀, 正如佢早兩日話我今年嫁唔出, 要等出年囉, 都講中丫!"
"今年都過左大半啦..."
"咩呀~ 佢話我同男朋友生肖夾呀~ 因為佢屬馬我屬羊, 大家都吃草, 可以和平共處呀~"
"...咁所有屬虎都註定要守寡啦, 食人架喎!~"
"佢話呀, 如果我遇到貴人呀, 就會發達架喇!"
"咁我都知阿媽係女人..."

-----------------------
近日生活的確過得很爛, 但未必因為犯太歲,
很可能係因為我把口...
-----------------------

本人生活指數呈V型反彈的先兆:
1) 收到退稅
2) 有得免費睇黃子華
3) 近排又開始有生意
4) 又可以去做學生咯!

-----------------------
某人曾經問呀"香港四大靈媒之一"想唔想接見我,
點知遭到一口拒絕.
大概佢早已算到我會上去踢館...

今期流行

- "民建聯最無恥!"
黃毓民帶領現場觀眾高呼呢句半分鐘唔奇,
奇就奇在鏡頭捉到連平時斯斯文文的涂謹申都叫埋一份~

- "蝕 得 好 慘"
呢四隻字真係值得擺上頭版的,
因為連四叔都咁講, 你班契弟仲唔有排捱?!

- "青春開了電掣"
不得不佩服另類詞神高皓正支筆, 意境之高並非我地一般凡夫俗子所能理解的.
而你又真係唔好怨香港點解得兩個人識填詞, 因為第三個真係好難搵的.

- "盧海鵬試咪"
若果有追開wyman寫野, 大概會知道呢句巧妙所在,
而亞視竟然用左呢句做節目名...真係正~ 好想聽佢親口講一次.
二十號晚有得睇.

- "塵世的朋友痴拿膠線"
今期的網上熱播, 從呢件事可以睇得出,
高登班人係1)好有創意, 2)好鬼得閒.

發現自己其實脆弱 不敢說

近日.生活 II

某早, 女人在茶餐廳吃早餐, 男人在對面嘆報紙,
女的突然放下刀叉, 呆望大門位置, 說:
"喂~ 你睇下剛剛入來果個女仔, 好得意哦~"
男的悠悠放下報紙, 幽幽的瞥了一眼,
空氣凝固良久後, 道:
"係咩?......以前得意D..."
"識架??"
"佢係妳上手用家..." 說時, 男的不免欷歔.

昨天一名失蹤多年的人來電, 我將這個故事轉述了一次.
而失蹤者以另一件往事作回報.

"我有一日響XXX見到你同個女仔食晚飯呀, 我同事仲話你好cool..."
"......其實我果日正在鬧分手"

近日.生活

1) 某日, 從內部郵箱收到email乙個:
"hi, seems always bumped into u recently, hope u will be fine, have a nice day!"
.
.
.
.
.
.
.
.
.
.
.
.

我當時腦內就係出晒呢d點點...
因為我.完.全.唔.知.佢.係.邊.個...
bumped into me? 邊個bumped?? 幾時bumped???
我幾時抽左人水而不自知???

會唔會其實係塊鐵板send俾我???



2) 某夜, 餐館內, 點菜中,
侍應突然放低筆, 對住我講:
"呀你戴呢款眼鏡好好睇呀響邊度買架我都有一副差唔多架不過我個鼻唔靚丫(下刪數十字)..."

坐在對面的人開始黑面.
並低聲道:"我響度都咁狼死?!"
"噓~ 吹下水之嘛, 唔駛咁敏感喎~" 我這樣回應.

高潮位係, 侍應妹妹應該聽到我倆既對話, 上菜時兜碟撞向對面果位個膊頭...

與其晚晚追"家_月圓"睇人鬧交,
點解唔睇呢個?
http://www.youtube.com/profile_videos?user=nowbnc
至少, 係關自己事嘛~
仲好好笑呢
強烈推介九龍西果集呀下

傷心的小鸚鵡

難得鸚鵡襲港可以出去影下相,

點知撞正風眼位, 靜過鬼.

唔係邊度都有的陽光

柑香茶真身

滄海遺珠

強烈推介明珠台果兩位麗音旁述,
成日恃住冇人聽, 愈夜愈玩野~
講講下網球又講聖鬥士又講單日轉向,
玩到連觀眾都聽到佢地D忍笑聲.
但玩還玩, 佢倆個對比賽既認知程度,
其實係無線成棚主持既總和...

拉闊祖國

西班牙國家籃球隊早兩日在報章出左張咁既相,
各球員拉偏隻眼模仿中國人,
然後已經估到, 各大媒體即高舉種族歧視旗幟.
尤其是, 事件發生在中國加時輸俾西班牙之後,
唯恐天下不亂~

估唔到既, 反而係今次祖國既豁達,
李寧牌發言人表示:
"In fact, the gesture shows that the
Spanish team is so humorous, relaxing and cute."

都話北京個個都俾人train過先出街架啦~
除左足球隊.......

撬開行李篋

我好out, 我今日先睇到空姐E果條片,

雖則我唔明有乜咁好睇, 又唔係冇著衫......

又睇唔清個樣...

而我更唔明點解上鏡可以肥左兩圈...

.

"其實有乜咁特別呢?"

"少左神秘感囉~"

"神秘感多同少你有咩野影響?"

"而家少左好多幻想空間呀...之前以為佢好索架嘛..."

"咁佢索, 同唔索, 對你來說分別又有幾大?"

"佢欺騙讀者/聽眾呀!! 好唔應該囉!!"

"咁你呢d人同要阿嬌出來道歉既低能仔有乜分別?! 欠你架?!"

睇奧運 睇無記

呢次奧運睇到久違了的潘宗明,
反應慢左七拍, 又成日黑口黑面,
可能就係爭咁個"好拍檔"...

某年, 某足球賽事:
潘宗明: "聽聞XX隊今場會出秘密武器喎!"
蔡育瑜: "ER...其實所有未出過場既後備球員都可稱之為秘密武器..."

又某年, 某主持唔該完潘宗明提供資料,
之後, 蔡育瑜就加一句:
"佢講既野你都好信?! 佢拍果D廣告全部都爛尾架喎."
(還記得潘生九十年代拍拍埋埋果D大陸樓盤廣告嘛?
呢..."有身份證就可以做業主"果D呢~)

既然無記撬得到黃興貴客串, 點解唔搵埋蔡育瑜呀?~

雜絮

- 有人話上一篇講果d籃球員冇個識,
ok, 咁果幾個又真係偏左d既...
遲d補番個入門篇.

- 這是童叟無欺的ironman:
http://tv.on.cc/newlook/index.html?s=3&i=OBK-080807-11571-08M&d=1218057370

今朝已經超過5個人send呢段新聞俾我...
真係好, 呢次真係"_穿板", 唔止穿, 仲爛埋tim...
但係, _板點解要食偉哥呢又?
難道連塊板都嫌棄佢?
咁佢有冇帶套呀?
搞大左塊板的話點算好呢?


- 上星期過左澳門睇波, 我竟然覺得悶...
連相都懶得影.
睇完即刻落樓下賭場, 點知仲悶,
係咁俾d疊碼仔同北姑纏繞.
而此行最大樂趣只係買到兩包"柑香茶"...
我到而家都唔明, 呢隻野點解係得澳門有得賣...

- 見個個睇得咁開心, 攪到我要搵番香港先生來睇.
個12號真係得喎~
10號雖則有型, 但實在太悶蛋了...
唔好話溝丫, 剩係搵人出來玩, 你都會寧願搵12號而唔搵10號啦.
而其實我最愛係4號, 佢果隻自戀既眼神,
簡直去到目空一切既地步. 問你點頂~

- 點解會有人覺得鬧交好睇? "家好月圓"係屬於咩野品味?
既然咁好睇, 你唔鬧下你老豆?
唔好同我講呢d叫演技...你睇周聰鬧人個樣跟新紮師妹係同一set表情來的.
分別只係大聲d, 同細聲d, 咁囉...

- 點解歐陽靖個樣咁似張如城?
(係, 呢句要rap出來的)

美國以外的夢幻籃球

其實黎緊奧運, 除左一眾美國球星以外,

仲有其他球員好值得留意的:

澳洲的
patrick mills

留意的地方有兩樣,
一: 佢係第一個入選國家籃球隊的澳洲土著.
二: 澳洲今年既贊助商是"peak", 亦即祖國的"匹克牌"是也.

祖國的

孫悅

之前點估得到, 祖國居然可以培養出一個高到咁既控球後衛?

(一般控球身高只約六呎一二)

呢位哥仔, 身高達六呎九吋, 而竟然唔駛打前鋒!! 太幸福了~

俄羅斯的
j.r. holden

係, 俄羅斯係有黑人的~

咁當然佢其實係美國出世.

話說佢響俄羅斯聯賽搵食期間, 有日睇見俄羅斯練波,

戲言隊波爭個後衛, 跟住教練就叫佢去一個地方,

填完張form掟入某個office,

15分鐘之後佢赫然見到張form上面有普京的親筆簽名,

就這樣, 佢就成為俄羅斯人了...

而更加奇既係, 多左呢個後衛之後,

俄羅斯又真係由一隊中游球隊變成歐洲賽冠軍...

西班牙的

jose calderon

操一口蹩腳英語都可以響美國成為球場指揮官的人.

不用再講佢有點勁喇卦.

而佢既穩定性亦為其他球隊帶來無限困擾.

德國的

chris kaman

最新鮮的德國人, 因為佢只係入籍個零月.

係少數可以左右開弓的球員, 陰濕又細膩,

其過份程度甚至令好多人誤以為佢係左撇子.

這才是孖屐亭

古有板X壽司在生果A1落廣告;
今有Paco借新聞時段落廣告!
唔知仲以為條友睇完赤壁關二哥上身呢...
拎住咁大塊野條條FING開D人...
排頭位個哥仔仲話用左三千幾蚊掃 杜麗莎寫真集?!
寫真要咁多本做乜? 用完即棄架? (ok...明點用就係點用, 唔明的請繼續唔明~)
本野仲要極之流, 水著照係有...四大頁?!!
冇錯, 我手上有一本...但你唔係以為我要俾錢買呀?!
.
如對此書有興趣者, 歡迎以 趙碩之 來交換人質.
但若閣下係持有 angelababy 的話, 卻只會換到某空姐的新作的認股權証.
敬希垂注.

七個故事 - 他, 跟她, 與及她她

1) 十九幾年前的某個暑假, 認識了她.
由於經常一齊返學放學,情愫漸生,奈何鵪鶉唔敢開口.
點知反而係她主動開口, 邀請他上屋企...
孤男寡女共處一室, 總有D事需要發生!
結果, 那年暑假, 他沒有高潮迭起, 卻學懂了國際象棋...
.
2) 某年, 由小六的大佬輩搖身成為中一小孤雛.
頭耷耷眼濕濕.
LUNCH TIME獨個兒路過些粉搵食,
瞥見同校的某個女頭目正在率眾聚餐.
拔足之際竟然被佢喝停...
"喂!!"
(腳震中)"er...咩事呀?..."
"你知唔知......我係住你樓上架?"
"huh?! 係咩係咩?~~"
自此, 他倆就在屋企的後樓梯展開 牆上刻字 地下寫詩 有起事黎會震碎玻璃 的歲月.
.
3) 某電梯內, 男人刻意跟女人扮偶遇, 明明係上又要按G/F,
因為佢知道女人正要離開.
男人正為找話題而費煞思量, 點知女人搶白: "你住邊架?"
說著說著, 男人想進一步問人拎電話號碼,
女人已主動將email奉上.
.
4) 某一個冬天, 到某個她的家修理電腦,
我唔知佢點解會叫個電腦白痴來幫佢整機,
但電腦白痴竟然搵到佢收埋一個txt file響暗格.
(而呢個技術係呀電腦白痴平時用來揭發朋友d鹹相的...)
電腦白痴望住一行又一行對話發呆,
問: "妳...做乜save底我同妳既icq history呀?"
答: "你...你...你...整機啦!!!"
.
5) 在某一張床上, 她跟他說:
"不如我留底陪你?"
"今晚? 好呀."
"我係話留響HK陪你..."
"咁妳果邊D野點呀? 妳屋企人俾妳留響香港架拿??"
(請自行將對白翻譯成英文)
.
6) 他 說:
喂, 尋日見到妳同個朋友一齊行街喎~
她 說:
咁靚女就梗係多人追架啦~
他 說:
追飽佢囉! 關我鬼事?!
她 剛剛傳送來電震動.
她 剛剛傳送來電震動.
她 剛剛傳送來電震動.
.
7) 這, 是他收過最短的情信:
"說掛念你會否讓你看我不起"
短, 但不失震撼.

地球是平的

我和我的電影

小弟螫伏多年(其實係懶), 樓梯響左九世既短片計劃應該會在下月開拍.
希望趕得切參加年底的ifva.

現階段先徵求演員~
如有興趣者不妨聯絡我.
但有幾點希望大家先行注意:
- 若果閣下希望以此為晉身娛樂圈的階梯的話,可以直接番屋企等消息了.
因為我係冇辦法捧紅你/妳的.
就算係捧, 都捧我自己先啦!!
- 又或, 若果閣下以為套戲係屬於浪漫文藝/郎才女貌/香車美人之類劇情的話.
我都係勸你直接番屋企, 睇無線好了.
熟悉我的, 都知我係唔會拍呢d野啦~
我的偶像可是 charlie kaufman 同埋 alan ball 呢~!
就算係拍情情塔塔野, 都只會係岑凱倫模式, 而不是亦舒模式呢~
(估唔到我連岑凱倫都睇過哩)
又, 如果真係玩岑凱倫的話, 相信大家少不免要露少少喇...
- 酬勞方面, 一口價,
廿萬...我就俾唔出架喇...
現階段能夠應承各位的, 就只係膳食方面會由我一手包辦.
但礙於大部份拍攝時間都設定為深夜, 所以
最後大家可能只得在'些粉'進餐了~

一個故事 - 干牛河

男女在餐廳用膳, 女人正跟自己碟乾炒牛河糾纏,
從河粉堆中努力揀出自己唔食既芽菜,
係.逐.條.揀!
男人睇唔過眼:
"點解妳一定要揀晒出來先食? 妳唔肚餓既咩? 一路食一路揀嘛."
女人繼續埋頭苦幹, 但換上一把刻薄家婆聲, 道:
"我知所有男人都鍾意食住揀..."

數字會說話

今朝boston celtics響nba最後一場決賽以131-92
大炒L.A. lakers 39分.
全場比賽甚為詭異...
- lakers全場犯下19次失誤, 創出finals紀錄...
如果每次失誤=失2分, 咁總數係38分...
- ray allen一人入左七球三球波,
然而佢全場大部份時間都係無人看管的.
作為boston的頭號射手, 佢實在得到過多的空間...
即係如果我落場都可能入到七個...
- lakers 竟然去到第四節先搶得第一個進攻籃板,
而全場亦都只係搶得兩個...
其他人的手斷晒的麼?!
- kevin garnett 經常出現在paint area, 呢個唔係最奇,
奇就奇在, 好幾次防守佢的, 竟然係kobe byrant...
除左博影相, 我實在諗唔到第二個理由去形容呢個match up...
- lakers正選vladimir radmanovic全場只起手六次,
而有四次我覺得用"掉"來形容比較合適.
- boston響第二節中段派出從未在finals現身過的
吉祥物 glen "big baby" davis 上陣.
而lakers呢個時候竟然輸得更多...

如何留得住高潮

早幾日有個性高潮排行調查, 話香港男性從性愛獲得高潮只得41%, 而女性更可憐只得8%...云云.
開頭睇完得啖笑就算,
點知呢幾日見個個都響度講, 連電視節目都來個專題探討...
駛唔駛咁認真呀?!
一睇就知個調查好有問題啦
男性只得41%?? 咁剩低果六成係做乜野?
男性高潮冇女性咁多層次, 一字寄之曰: 射!
換言之, 果六成人係齋做唔射乎?!
果個乜乜醫生解釋:" 即 使 射 到 精 亦 都 可 以 覺 得 唔 滿 足 "
屌~ 咪玩啦~ 個個男人都唔滿足架啦!!
---
請留意, 個調查係杜蕾B負責,
咁佢就梗係話你做愛質量唔夠高啦!!
"BB呀, 報告話我地高潮唔夠多喎, 咁點好呢?"
"做多D囉!"
"咁做多D又點呢?"
"買多D套囉!!"
---
"咁就算做多D都唔一定幫襯杜記呀, 可以買其他牌子嘛~"
"係架, 不過唔做就一定唔駛買套嘛, 斷估你唔會買來煲湯丫. 如果可以用來煲湯, 佢到時又實會出個報告話香港人湯水唔夠..."

reality show, shows unreality

相比個個都讚好的paul potts/connie talbot/wiliam hung (!!)
我還是偏愛帶點病態的奇人異士~

劇本

其實...呢球真係好尷尬...
雖則...我好希望呢球係foul...

可惜...劇本相信早已寫好...