一個故事 - 一月

從前, 有一個小朋友, 佢既生日願望, 唔係要
乜乜玩具, 乜乜考試好成績,
乜乜女朋友樣靚身材好.
佢只希望可以擁有一個生日會.

唔係要果d一月星辰, 成班一月出世既小朋友一齊影幅合照,
然後將個蛋糕五餅二魚式分Q左俾廿九幾人就收工果隻.
而係一個切切實實有得切蛋糕 ,
全場都要為佢一個唱生日歌果隻,
做一日主角.

但, 生日願望 可能真係要切住蛋糕咁許願先會靈驗,
小朋友天真, 佢以為到時到候自會有人準備蛋糕,
自會有人製造驚喜. 佢以為.

每年都希望 每年都失望
沒發生的始終沒發生.
願望, 就只剩低個望字.
因為唔夠乖? 唔夠得意?? 冇人可以解答.
只知道, 冇你份就係冇你份.
久而久之, 小朋友開始自行迴避, 拒絕再話俾朋友知聽佢幾時生日.
甚至從此戒甜, 連蛋糕亦不再多嚐.
冇人知, 冇希望, 就唔駛失望.
一個唔應該係秘密既秘密, 就這樣守了多年.

-------------------------------------------------------------------

那是06年寫的...
重貼除左係因為一月過左,
另一個原因係, 今年竟然出奇地好多人記得我生日 (!!)
而吊詭既係, 呢幾年間其實只係多左三個人知我生日.
(其中一個仲要係學緊算命, 然後呃左我個時辰八字去交.功.課...)
呢條數真係唔識計...
秘密, 原來係冇得守的.

點都好,
多謝每一份禮物,
在我經常嫌三嫌四既情況底下都依然視死如歸的送我禮物.

多謝每一個慶生早餐/下午茶/晚飯,
食乜, 其實一向都唔重要,
同邊個食先係最重要.

多謝每一個SMS / 來電
今年最強的是, 我第一次於一日之內聽晒全部舊女友的來電...
我覺得好爆囉~!
(其實只係因為舊女友唔多...)