執書行頭...

邊個話去書展一定係買新書?

新書周圍都有得買, 駛乜急?!

橫豎都睇唔切,

所以每次去書展其實都比較傾向買倉底貨...

- 東野圭吾 X笑小說系列
我懷疑自己有強迫症, 係要儲齊一套先安樂~

BTW, 呢套係簡體版, 加埋晒都只係$60!

- banksy作品集
一直都想買, 又一直都唔捨得買英文版, 因為好貴,

就算係台版亦都唔平.

而家倉底價只需一舊水!!

已經再冇拒絕的理由~

- 我們最幸福 北韓人民的真實生活
唯一的半新書, 唔知係印數太少定係題材太冷,

之前行過好多書店都冇貨.

趁書展直接行入城邦個booth, 一問"北韓"佢地就拎成幢出黎,

真係爽YY~

- 作死的發明 (d.i.y. dentistry)
最愛都要數到呢本!

黑色幽默程度拍得住舊作"the book of bunny suicides"

(andy riley其實唔係本本都好睇)

btw, 兔仔系列今年已經出到第四集: "dawn of the bunny suicides",

見到有簡體版的話記得話我知~ thx!

大家來讀報 - 溫洲動車事故

早兩日溫洲火車出軌意外, 內地處理手法確係慘不忍睹,

但我想講既唔係呢樣,

而係我見到今日網上依然都係要拗, 出事果架係高鐵...

連報紙都講埋一份.

若果你話因為呢次事故而對高鐵系統安全有戒心我都仲理解,

但而家茅頭 (我指對列車果支啦) 係話內地隱瞞出事果架係高鐵,

咁我就覺得好唔公平.

出事果架, 係CRH1, 你話係第一代高鐵...

咁都唔可以話你錯既...

正如香港果架九廣鐵路都係八十年代第一代高鐵...

但我理解既高鐵, 係CRH3, 型號唔同, 規格唔同,

製造商又唔同 (CRH3係同西門子共同生產),

行走路線亦都唔同,

(不過系統同唔同我有保留)

若就咁以CRH1出事去推斷CRH3有問題, 似乎係武斷多過推斷.

而又, 文中提及港深高鐵將會用CRH1應該都係唔正確,

因為一早講左係用CRH3, 車都已經買埋...

咁你話內地會突然插一架CRH1落黎咁我都吹你唔漲既又...

而又又, 既然大家對CRH1有咁多疑問,

其實上一次廣州就清楚好多.

而家每日幾十班來回深圳至廣州果架和諧號,

咪就係CRH1囉...

你, 有冇聽過有人叫果架做高鐵丫?!

大家來讀報 - 國際視野

- 西班牙一玩具公司推出一款名為"餵奶寶寶"既小朋友玩具,

好讓小女孩煮完飯仔之後, 仲可以玩 餵! 人! 奶!

點解餵人奶會變成一款兒童玩具?!

遲d駛唔駛要個細路扮大肚, 又或者大肚之前行房?!

又, 買呢款玩具既又會係乜野父母?!

你好恨個女快d學習餵人奶?!

咁, 其實唔駛俾錢買囉...媾條仔就可以的了...

- 碧咸生左個女, 取名 harper seven beckham...

harper一字係因為佢老婆好鍾意睇 harper lee,

而 seven 呢...唔駛解啦可?

"柒囉!"

想講既係, 呢件事導致 harper lee 果本陳年"to kill a mockingbird"銷量暴升...

頭先先講有兒童玩具要小朋友模彷成年人動作,

然後而家有成年人又反過來慕嬰兒之名先醒起去閱讀名著...

係咪開始覺得呢個世界係痴撚線呢?!

- 性愛指南app (仲要係3D) 登錄android手機...

叫左你唔好買iphone架啦~~!

年代變遷, 電子化未做得到餵奶,

但性愛指南就難唔到佢.

不過我又想知, 既然係3D, 咁呢個app係咪應該一路開一路做架呢?

咁, 我應該將部電話擺響對方身上, 定係自己身上先為之恰當呢?!

http://www.tudou.com/programs/view/FNp9lg6gudg/

- rupert murdoch 聽証會上遇襲, 鄧文迪奮勇營救!

如果我有個千億身家兼就黎死既老公,

我都會奮不顧身去保護佢,

莫講話兜巴星, 如來神掌我都出呀!

其實, 佢先係最正常果一個!

雜 絮

- 冇到內地一排, 龍華線就長左咁多...

港鐵下半年業績實好啦~!

- 如謎一樣的霸王涼茶,

之前講到係威係勢,

但著實好少見到有地方賣,

就連些粉都唔係間間有售.

說好的中藥衛生巾更加係影都冇.

攪乜?!

- 韓寒的"獨唱團"出左一期之後就被河蟹,

唔緊要, 內地最強有山寨!

雖說山寨, 但抽水絕不手軟,

書名叫做: "無獨有偶" (!!)

食字黎講, 呢個都算給力~

不過心思全花在封面, 內容不過爾爾...

今期書城收穫.

夠捱到書展喇卦...

不過行到腳軟都搵唔到"毒笑小說"...

點唱時間

無 力

我知, 這是抑鬱先兆.

對任何活動都興趣缺缺,

明明努力嘗試去過一些新生活,

但過了一會, 又自自然然的走回舊路徑,

再附送一副臭臉.

所以, 俾人話招積/臭串/樣衰, 是自找, 是抵死的.

打球亦開始沒有樂趣可言,

以往的死纏爛打已不再復見,

換來的是: "你想要波呀? 俾你囉~"

可惜這句不是對隊友, 而是對對手說...

遇上街上有人找碴更難過得要死,

以往多多少少總抬槓一番,

而家已經無力去辯駁,

得得得, 所有事都係我錯! 滿意未?

大娛樂家

近期的兩個 so called 演藝世家都發生情變,

我冇乜興趣,

亦冇意探討佢地邊個講真話邊個講假話,

總之chok皇離婚我冇贍養費; ck妹個肚唔係我既就是了~

想講的是, 兩個家庭面對傳媒的做法.

眼見呢幾日頂爺爆晒珠咁屌人如何負心, 個仔有幾慘,

真係聞者心酸.

但我唔係為左佢個仔頂帽有幾翠綠而心酸,

而係個仔都成30歲人, 仲要老豆出面對傳媒發炮,

醜唔醜呀?!

你係咁唔忿氣的話點解唔自己開聲?!

又若果你認為低調先合乎你個性的話, 就唔該叫你老豆收聲.

拍拖離離合合都係兩個 (ok, 有時係三個, 甚至四個)人既事,

但點排都應該唔關你老豆事(就算你老豆有幾出名).

所以有時, 俾人睇唔起都唔係冇原因的...

相反, 謝老四處理手法就高明得多.

一句: "係我錯, 我生個咁壞既仔出黎", 清脆俐落,

記者返去又有功課交; 謝老四又保護到自己唔駛爆料俾你地聽,

最緊要, 係冇位俾人入丫嘛!~

傳媒係應該咁樣玩的~!

是日對話

臨近開會時間,

工友們魚貫進入會議室.

工友甲正忙著將 iphone 滅聲,

好讓稍後玩 tiny tower 時不會被發現;

而身後的工友乙, 早知會議室如停屍間,

特地披上多一件工衣禦寒,

並隨即將拉鍊拉上.

'嗦~'的一聲, 倏地喚醒正在埋首於四吋屏幕的工友甲.

「咦? 乜原來你響我後面架?!」

「點呢~ 突然聽到身後有拉鍊聲係咪好驚呢~~」

工友乙翹起唇角的說著.

google+ 的二三事

至現時為止, 網絡上各位都對google+讚不絕口...除了我!
當你本身持有兩個或以上的gmail account果陣,
你就會發現惡夢的開端, 原來就是"雲端"!!

- 首先, 你會發現, 任何人都可以add我,不論我願唔願意,
就算add左之後可以封鎖, 但人地都依然可以睇到我個訊息流...

- 而又其實, 我係使用真名玩呢個google+,
但大家其實又有辦法睇到我以另一個名登記的相簿...

- 至於另一個私隱問題, 我已反映左俾google 知道,
不過佢冇覆過我...

- 官方話 google+ 有android app支援,
但我響market完全搵唔到...

- 最後我係響內地網站搵到個app,
介面醜樣得令我以為係山寨貨...



- 而又, wap版其實比app版還要靚少少...

certified copy

1995年, 有一套似係好有劇情實則又冇乜劇情的叫"before sunrise"電影突然爆出,
大家都係半信半疑;
直到2004, 原班人馬斬多幾兩拍成"before sunset",
令好多人相信呢類邊行邊走不停噴口水到日落的電影原來係有市場的.
而且成本低, 演員來來去去果幾個, 又唔駛搭景, 行到邊拍到邊;
又易控制, 好彩的話三日都拍得完.
是以造就近幾年不停有導演爭相仿效,
由"en la cama"到"room in rome"甚至
剛剛香港上畫的"certified copy"都係行呢條橋,
但, 係咪真係咁易拍, 套套都好睇呢?

漂亮的主角is a must,
講真, 如果你食飯果陣遇著個樣衰的響你面前不停講說話,
你都食唔落飯啦~
呢一點以上幾套都做得到.

場景最好要夠cozy,
而 "en la cama" 同埋 "room in rome" 都係響酒店房拍晒成齣戲...
em...咁有人覺得酒店房好cozy既又真係..

最最重要的, 是對白.
以對白推進劇情, 好似好易, 其實好難,
仲要成套戲都靠對白帶動的話, 稍一不慎就會跌到唔知去邊.
變成互相指指點點對罵.
對主角自己冇幫助, 對觀眾就更加冇得著.
而"certified copy"就係咁,
吵下鬧下就散場.

本身已經生活於loop完又loop的爭吵當中,
而家入戲院都仲要睇你地放題式對罵,
俾我靜下得唔撚得?!