手電裡的雜碎

平時手電影影埋埋好多垃圾, 又係時候清下...
(另, 呢度唔係龍友天地, 呢度係不設照片質素討論的. 我冇錢買GRD~!)



- 早幾日請假外閃從事私幫工作,
一面做私幫一面開機做公司野,
由於單位內人來人往, 不時要拎住部腦走鬼,
然後搵到呢個位之後就死都唔願走~

btw, 露台上的木條舖得唔錯, 做到outdoor feel. (其實係木磚)



- 某日應邀到某私人屋苑球場打球,
由入lift開始, 環境已不停令眾人嘩嘩聲...

"你唔好睇d用料好似好正咁, 你試下敲下果條野
(遙指某條閃閃生輝的金屬門), 膠來架咋!!"
我們的建築師導遊如是說.

btw, 此球場比一般正規籃球場細三分之一...
偷工係唔止減用料的~



- 好難解釋呢碟飯, 但佢令我感動到哭.
因為佢由兜湯到杯爆檸到個焗飯都保留著八十年代風情.
係細個呀爸昆我話帶我去食"法國西餐"果種風情.



- 四通八達的牛下
由細到大經常於淘大出沒, 但從來唔知佢樓高三十幾層.
更加唔知淘大其實係有海景單位的!!

還記得細個在牛下玩"三層樓何濟公"的歲月嘛?

勝 別

usain bolt 繼續在收步的情況下, 將男子200米世界紀錄推前0.13秒.
破紀錄, 預左,
係冇預到佢今次起跑反應做得極好. (佢出名起步慢)

講世界田徑錦標賽, 焦點理應落晒響 usain bolt 身上.
殊不知今次竟然俾 caster semenya 成功叨光.
呢位新鮮出爐 女子800米金牌 得主,
由於成績進步得太多兼太快, 相當有可疑,
而家已經俾人捉左去驗...
唔係驗尿, 係驗性別!!



咁又確係好惹人懷疑既......

[半個故事] 從妳離開的一刻開始

"喂, 係我呀..."

"妳係邊個?"

"我...係你舊女友..."
就算曾經如何熟悉, 吐出這句還總帶兩分羞澀.

"哦? ...好耐冇見, 妳幾好嗎?"
男的被殺個措手不及, 只有一記盲拳的回應.

"你...記唔記得我地當年諗住結婚, 儲落果舊錢?
我近排屋企有D事, 想睇下你方唔方便..."

"記得...當然記得..."

自從那一天, 女的不辭而別, 人去樓空,
男的頓失所依, 只靠在戶口存款中找到僅有的安全感.

當年那是他唯一能夠掌握的事情.

憑著那小小的掌握, 男的寄情炒賣,
由 '9' 字頭的窩輪炒到 '65' 字頭的牛熊證.
贏過, 但輸得更多.

這些年來,
除卻剩下一層負資產西斜單位;
一輛猶如單輪驅動的低檔次房車;
以及一間僅夠胡鬧不夠糊口的納米公司之外,
就只有一份基金...

雜 絮

- 近來激忙, 而我好似仲有好多野未做...

- 某人啟程曼谷前誓言'彈彈'會拍周秀娜式刷牙照,
然後今朝收到佢send來的手信link一條...
我唔夠膽響公司開...

- 我件slam dunk波衫終於到手!!
以幾十蚊貸仔來講, 手工真係冇得頂!
但著出街的話, 真係甚有 cosplay feel...

多謝7姐代購!!


------(跟住落黎係體育頻道)----------

-Usain Bolt
又破世界紀錄
又係收步過終點 (不過冇奧運果陣咁過份).
如果超風速, 相信佢真係有本事8秒內完成100米...

- Quentin Richardson 對上三個月的行程:
new york > memphis > L.A. > minnisota > miami
唔係遊山玩水, 而係俾人賣走...
三個月之內俾賣四次算唔算係一個紀錄呢?

- 今期某籃球雜誌專題講球星退休後的出路,
真係千奇百趣:

b.j. armstrong 成為球員經理人...
旗下有derrick rose (!!);

chris dudley做左某財富公司副總裁...
(唔好見chris dudley咁屎波就懷疑佢能力,
佢係罕有畢業於 Yale 的職業球員)

harald miner 做左地產經紀...
(邊個係harald miner? 當年綽號 'baby jordan' 果位囉!!!)

kevin johnson當選為市長...

當然, 睇人仆街先係我地香港人專長:

jason caffey宣佈破產;
randy brown 要賣 champion rings 籌旗;
scottie pippen長期缺錢...

除左窮之外, 呢三個人仲有個共通之處,
就係同一個叫 michael jordan 的物體做過隊友...

呢個現象証明左幾樣野:
1) 細小如一隊球隊, 都會有貧富懸殊.
2) 識著個有錢佬未必會帶挈你發達, 相反好多時仲唔覺唔覺令你駛大左.
3) 有錢佬係救你唔到的~

當然, michael jordan 係唔駛陪佢地捱窮
而佢既退休出路,
就係賣起成隊 charlotte bobcats 來玩囉~

sophisticate 之範例

(係, 繼續周秀娜系列~ 相信呢個話題可以講到冬至先收爐)

仲未相信周秀娜有幾sophisticated? 可以睇下今日報導:

http://www.singtao.com.hk/yesterday/ent/0806fo02.html

對於戴夢夢譏諷她博見報，她說：「我並非報館主編，落甚麼版位我控制不了，戴小姐可以打電話問番各大傳媒！」

完全高下立見.
擋得靚不特止, 仲靜靜雞攝一野 counter attack.
問你死未~

----------------------------------------------------------------

題外話:

十三歲學生買攬枕有幾不良? 我唔知.
我十三歲果陣係買 李麗珍寫真集...(ok! 當年係賣$120, 仲貴過kissy chrissie)
so far 到而家我又冇犯風化案亦未坐過監;
so far 而家大家聲討緊果幾本寫真都被列為一級刊物, 警告字句都未駛落.

十三歲學生面對大群記者, 面不紅耳不赤, 義正詞嚴,
捍衛臂內的周秀娜之餘亦捍衛自己的剛正不柯;

而同一場合的另一邊廂,
又有個廿幾歲麻甩仔的通宵排頭位買玩具,
生怕被人認出, 只肯戴面具接受記者訪問...
(仲戴足幾日!!)

你覺得, 邊個有問題d?

抽水馬桶

聲討周秀娜已經成為本地女藝人 (esp.半紅不黑果d) 的一種共識...
不過, 抽水都要講水準.

http://hk.apple.nextmedia.com/template/apple/art_main.php?iss_id=20090805&sec_id=462&subsec_id=830&art_id=13062905

戴夢夢也加入批評周秀娜，她說：「我認為只可以做男朋友或老公嘅性幻想對象，絕對唔可以做大眾嘅，我係佢男友或老公實唔開心。佢真係好博，其實女藝人唔使咁博，應該要錫身啲。日日娛樂版同雜誌都係佢，我唔係話佢唔好，但真係唔使行到呢一步。」

完全犯了思想上的謬誤~
其實
男人
係唔會以自己女朋友/老婆作為性幻想對象的!!
唔好低能啦!

現實中佢可能得妳一個.
但腦內, 肯定唔止妳一個.
仲要每一件都索過自己女朋友/老婆.

有幾多女性真係夠膽大聲話自己索過周秀娜先?
.
.
.
有! 總有d黃面婆夠膽的...

"佢咁叫靚咩?! 成個菲傭咁既樣!"
(妳出去德誠搵個『咁既樣』俾我丫!! 我唔介意出夠四千! 仲晚晚返來食飯!)

"車~ 係唔夠佢索, 不過我亦冇佢咁cheap! 我唔會好似佢咁低俗出賣色相!"
(既然妳咁清高, 唔好化妝落中環丫笨!)

"滴牙膏擺到明就教壞細路啦! 刷牙點會滴到落心口?!
我刷咁多年牙都冇試過d牙膏滴落心口度呀!"
(緊係啦, 妳一滴就直接滴落地嘛...)