2009年10月23日星期五
走漏眼電影
一直都奇怪香港點解唔上"小雙俠",
天地良心, 香港人咁鬼鍾意講集體回憶,
"小雙俠"就算唔大收, 票房都應該唔會差得去邊.
反而不太睇好的"M.W."就今個月上畫.
其實, "小雙俠"真係好睇過"M.W."好多~
(我係講電影版, "M.W."其實有點悶劇情亦有點講唔通)
而耐唔耐, 就有D電影, 總覺得會有不俗票房,
奈何香港又冇上過...
- 小雙俠
之前講過 , 不贅~
- THANK YOU FOR SMOKING
簡直係辯論教材, 直頭應該擺入通識科'個人成長與人際關係'一欄~
港女們學曉佢所教的技巧會更所向披靡, 更加無賴~
煙剷們睇完更加心曠神怡, 抽煙都大啖D.
- SNATCH
guy ritchie之前憑
"lock, stock & two smoking barrels"(呢套香港反而有上...)爆出,
然後就照辦煮碗用同一種講故事手法拍成"snatch".
其後日本的'遇人不淑'與及祖國'瘋狂的石頭'都向呢種手法"致敬"...
冇理由票房差的理由是, 男主角係 benicio del toro (翻生版捷古華拉!)同埋
brad pitt!
- HOT FUZZ
製作比同一班底前作"shaun of the dead"更加純熟,
編.導.演.都有水準, 剪接尤其一讚.
英式幽默類型, 係衰左poster太似b-movie...
唔知點解, 睇果陣我諗起周星馳果套"咖哩辣椒"~
- JACKASS THE MOVIE
拿...既然波叔/波兒出城都可以響香港上畫,
點解jackass唔得?
波叔都係玩人, jackass係拎自己來玩!
不過好多人都應該上網睇過晒...
2009年10月18日星期日
有關 (500) Days of Summer
其實我唔係想講套戲,
因為我覺得只係女人先會鍾意睇,
男人係好難代入果種自殘式心態的.
當然我知好多女人都好想有條傻佬每日為自己而茶飯不思...
想講既係, 戲內提及過一套戲叫 sid & nancy,
(男主角話捅妳七刀果套)
1986年產品, 好多年青人都冇睇過,
但唔緊要!
有 tom hanson 同 summer finn 重演過你睇...
如果套戲有呢段, 我諗我會開心好多~
2009年8月26日星期三
電影 溫韾提示
- 喜羊羊與灰太郎之牛氣沖天 將於明天上畫!!!
(ok...內地早於今年年頭已經上畫)
天地良心~ 呢套點都好睇過麥兜!!
又如果你知道"藍貓"是甚麼的話, 你就會驚嘆"喜羊羊"實在係祖國的一大進步.
- sunshine cleaning 清潔小小姐
兩姊妹為左生活而開一間清潔公司, 而唯一業務係負責清潔兇案現場...
幽幽的溫情喜劇, 表面講清潔, 實則講家庭,
現場所見好多女仕都忍唔住拎紙巾出來.
角色簡直為amy adams度身訂造一樣.
- the limits of control 我係殺手 年中無休
入場之前你先得要知道邊個係導演.
jim jarmusch!!
而當你知道佢出名 "dry" 之後, 你就未必肯入場...
而又, 呢套野, 嚴格來講, 係冇劇情的...
- bruno
中文譯做"波兒出城"...
波叔fans必睇~!
但我想講, dvd早已有售...
2009年7月16日星期四
多幾句 - 從'殺人犯'到爛片
- 講真, "殺人犯"雖講唔上好睇, 但又未至於爛片.
講爛, 有排都未輪得到佢.
- facebook 上果個"回水group"係咪真係咁需要呢?
(又, 講開fb, 踢0靚模出書展果班又想點呢?
佢敢除我敢睇, 有乜問題? 自由市場嘛.
敗壞閱讀風氣? 咁係咪應該踢埋梁x峰之流出書展呢?
佢果d真係爛字來喎.
咁有風氣的話, join左group果班記得一人買一本季羨林, 唔買正仆街!)
- 有冇人諗過, 如果'殺人犯'唔係港產片,
得到既噓聲應該會細好多.
- 好多香港觀眾先入為主, 未見官先打三十,
踩低港產片一格(甚至多幾格) 先入場.
而我其實唔認為港產片零舍爛, 西片一樣有爛片,
只係發行未必會入, 咁大家不期然以為西片好好多...
- 想講的是, 要比較的話, '殺人犯'大概同'red eye'同級,
red eye的前半段, cillian murphy飾演的恐怖份子在飛機上機關算盡, 好鬼有型,
點知一落機就變成智障一樣係咁俾女主角玩)
講唔上好睇, 但起碼引到你睇埋下半場.
- 近年比較深刻的爛片一覽:
七擒七縱七色狼
沒錯, 我係入場睇的!!
但呢套, 就真係下半場都睇唔落.
呢d, 咪失敗囉!
lesbian vampire killer
香港冇上(但近排見廟街竟然有得賣), 個名好爆, 但睇落完全唔係果回事,
扮cult片, 卻毫不吸引.
變態家族
呢套就真係經典!
導演係周防正行, 拍'談談情.跳跳舞'果位,
當年係食住'談談情.跳跳舞'之名借勢上畫之舊作.
現場情況係點呢? 在播放中途, 已經開始有人高聲談論,
平時你好可能已經 "殊~" 佢甚至 "__佢老__",
不過今次冇人咁做, 因為大家都好認同佢果句:
"屌, 呢套乜撚野戲黎架?"
接下來的, 係隔左四行以外的觀眾加入討論行列:
"係啦~痴撚線架咩~"
愈講愈興奮, 銀幕上講幾多; 銀幕下講更多!!
拿~爛片, 應該要係咁的!~
2009年7月14日星期二
幾句, 有關"殺人犯"
(放心, 呢度唔興爆劇情的)
- 我唔會話好睇, 但三五成群食完飯冇著落的話就好值得入場,
因為佢實情係一套唔錯的pop-corn movie.
散場之後你同朋友之間真係唔愁冇話題,
剩係數戲中的鳩位已經令大家樂透一整晚.
- 戲, 並唔係真係咁差, 導演來講我覺得係好野來tim,
但只限上半場; 下半場我懷疑係另一個人拍的...
請準時入場, opening非常impressive.
- 劇本累事, 係事實. 唔好抵賴~!
下半場真係拖得太太太長了...
我接受到兇手個身份, 但佢既動機難免令我啤~~一聲.
- 大部份笑位我都可以忍住唔笑,
係唯一呀舞台皇者望海果個pose真係忍唔到...
2009年6月1日星期一
只是電影
剛自內地回港, 拍了很多照, 但心情太爛, 唔擺上來了.
兩日之內KO了的三套電影.
- the boy in the striped pajamas
改篇自同名小說, 老掉牙的納粹題材, 但結局很爆. (我冇睇過原著)
非常催淚的情節.
戲中那個猶太小朋友很可愛, 更加催淚.
唯一不滿係全片德國人皆以英語對話, 開party時仲會聽jazz, 氣氛古怪,
情況就好似你去旅行時會睇到酒店播放泰文版的巾幗梟雄一樣...
- serbis
台灣譯名為"高潮滿座" (!!)
講述菲律賓一家幾口以一間四仔戲院維生的故事.
奇情片格局, 片中老中青演員幾乎個個有場solo脫戲.
僅屬一睇無妨類別.
最有睇頭反而係片中那所殘破不堪的戲院, 好型!
又, 此片曾於康城參展...
- 瘋狂的賽車
如果話導演前作"瘋狂的石頭"係模仿"lock, stock and two smoking barrels",
咁呢套就更加神似.
結構更加嚴謹, 計算更加準確.
但咁樣係咪就好睇左呢? 又未至於.
有時計得太盡都唔係一件好事.
但以內地電影來說, 還算不賴.
2009年4月15日星期三
電影節紀事 三
- 一首punk歌救地球
改編自伊坂幸太郎同名小說 (!!)
故事一開始就講殞石仲差五粒鐘就撞向地球,
唱片舖內就有三個人爭拗緊究竟會唔會一鑊熟,
呢個時候, 老闆就播起一首名為"fish story"既舊歌,
而呢隻歌, 竟然同拯救地球有莫大關連...
.
一直都覺得日本只有兩類電影好睇,
一為AV, 二為騎呢片.
而呢套戲係由幾個不同年代既故事串連而成 (唱片舖只係其中一part),
騎呢既地方係, 每個故事都同首歌有著若即若離既關係,
一隻歌如何拯救地球更加抽象到冇朋友.
睇到中途仲有d悶,
點知最後,
導演就話你知最爆笑的原來就係呢d唔起眼既悶位...
p.s. 森山未來真係好樣衰...但佢耍帥上來又真係有一手.
- 赤色風暴
講述德國七十年代著名極端組織RAF的"豐功偉績"...
.
據說香港會上正場, 大片格局, 但題材冷門,
對外國人來說, 佢地最出名的可能只是製造出"斯德哥爾摩症"...
如果鐘意德國野既話會睇得比較開心.
- 大丈夫下海
男主角中年下崗, 生活逼人, 唯有下海做鴨,
以為舞男好易做, 點知遇親都係老.弱.殘.
冷不防經理人仲趁自己開工果陣密謀撬牆腳...
.
典型北歐電影, 全片灰灰藍藍冷冷戚戚,
喜劇表皮, 但內裡卻是一幕又一幕的哀愁,
果種沒有出路的無力感係幾多北歐人的寫照?
- 冷飯人間
幾個互不相識的人, 各自面對生活上的種種難題...
.
屌... 好難得睇到套戲係全無重點的!!
幾個故事縱橫交錯, 但竟然每個故事都係無結局的!
唔係open ending果隻, 係講講下唔講果隻冇無結局!!
最慘就係佢畫面處理做得唔錯, 你要去到散場先知自己瀨野...
電影節紀事 二
- 沒有路軌的車長
車長的生活如工作一樣有既定路線, 循規蹈矩,
直至退休之日方發現身邊一個二個原來都唔係太規矩,
攪到佢都想放肆一下...
今年驚喜之一, 全片淡淡然,
而男主角雪到硬晒軑既表情更突顯身邊的荒謬.
不時令你會心微笑.
- 我在娥摩拉的日子
五個故事話俾你知黑手黨如何影響各個階層...
眼見應該係今年最多人談論的一齣, 只因反應夠晒迥異:
有人睇到訓著; 有人奉上神檯; 有人如墮五里霧中;
有人口講唔鍾意, 但講講下先發現自己原來已經入晒戲.
如果入場之前做定心理準備的話, 套戲其實係不俗的.
- 五條主線係平行發展, 沒錯, 係平行, 當中係冇交匯點的,
換言之, 就好似你睇電視同時睇緊五個台,
然後突然有人會問你: 第三台頭先做緊乜?! 講!!
- 戲內人物眾多, 係主角定係茄呢啡有時連李司棋都未必分得出...
- 全片以平實得近似紀錄片方向拍攝,
話俾你知罪惡其實每天都在你身邊擦身而過.
- 入場前請確保足夠睡眠, 因入場後需要高度集中的哦~
又, 呢套戲最差就係美指,
你明知套戲咁多角色, 好心d造型分得清楚少少啦,
個個差唔多款, 睇死人咩?!
2009年4月7日星期二
電影節紀事一
某夜等開場之前不停響度諗, 我呢幾年睇左邊d戲,
發覺我開始將好多野混淆, 好似睇過又好似未睇過...
所以, 都係寫低佢好.
- 家有白事
一家三口在一個喪禮中相遇,
原來各人都同死者有不為人知既秘密...
中伏之作!! 條橋唔錯, 可惜又要玩黑色, 又玩得含蓄.
結果剩下大量悶場睇佢囉囉嗦唆,
btw, 個女個樣好怪, 但幾型.
- 買起我老闆
無良老闆走佬, 剩底一班女工, 各人諗住籌旗做點小生意,
點知有條友動議拎呢舊錢去買起個老闆而又獲得一致通過,
點知呢條友就搵左個擅長射殺天上星星既殺手...
呢套就黑色幽默到爆, 劇本出色,
唯一挑剔就係個導演好似第一次拍戲咁...
鏡頭處理非常麻麻.
另外, "門柄"果個gag位我覺得遲d會有人抄...
- 死女
兩個高中生到郊外歷奇, 意外發現裸屍一條,
一摸落去條女屍竟然發出淫叫...
爭少少就可以成為cult片!!
完全係"抽插式"電影, 為射而做,
劇情有咁亂得咁亂, 但求大家睇得興奮~
但以B-movie來講, 佢分鏡其實做得幾好.
2009年3月25日星期三
電影馬拉松
這是今日給我幹掉的 (又或是幹掉我的):
- yatterman 小雙俠 (日本)
叫得三池祟史來拍, 就知唔慌正路得去邊~
你細個睇電視睇過的, 電影裡依然會出現 (如mushroom雲, 又或電到變白骨之類);
但更多係你諗都冇諗過既顛覆情節~
(例如諷刺'小雙狗'只有企位而沒有坐位, 又或果d二級半情節),
Cult到無倫!若你問我好唔好睇, 我會答好睇,
但請勿帶備錯誤期望入場,
即係會鬧'赤璧'唔跟足原著果d呢, 就唔好入場睇囉.
而戲內的佈置, 道具(又或歸類為電腦後期)著實非常出色~
反而隻'小雙狗'就普通左d.
另外, 同batman系列一樣, 奸角搶晒鏡,
深田恭子無論身材抑或角色都比主角立體得多 (電車男必睇!).
- sex, party & lies (西班牙)
故事係圍繞一班所謂型男索女的sex, party & lies... (!!)
係呀...叫得sex, party & lies, 就真係剩係得呢幾樣野, 真係唔得你死.
但無論編/導/演都係b-movie水準, 我睇左半粒鐘就投降.
- m.w. (日本)
投降之後就係走左去睇呢套.
改編自手塚治虫漫畫, 難得的大片格局,
玉木宏好型! (腐女必睇!!), 但節奏頗慢,
片長仲要兩粒幾鐘, 結果我因為趕時間睇唔到結局...
- illusion of fear (烏克蘭)
講述富商被人嘔打兼勒索, 但其後講起竟然個個話佢子虛烏有,
然後富商就不停懷疑身邊究竟邊樣係真邊樣係假, 包括自己個老婆...
戲如其名...睇到我滿腦 illusion...
- oppai volleyball (日本)
(據聞呢套香港會上)
oppai者, boobs也~ 戲中經常出現的口號.
純情女教師需要帶領男排部, 但發現冇個識打波,
女教師口快快就話贏左波乜都得,班男生就話要睇老師個oppai!
橫睇豎睇, 都係笑片格局,點知佢大走溫情路線,
笑位聊聊可數.而描寫隊員的情節單簿, 亦難以令觀眾投入賽事.
雖則, 我同佢地一樣, 都好想睇凌瀨遙個oppai...
