東莞的法式生活 3

工廠位於郊區, 附近除左工廠以外, 就只有寥寥幾間士多,
平時所有工人放工之後, 多數會聚集在士多門外,
成堆人睇一部電視, 你媾下我, 我媾下佢, 打打檯波咁就一晚.
(對, 內地士多門外好多時總會有幾張波檯, 仲要係露天, 真係別有一番風味.
咁當然, 最大風味就係來自幾錢一度啦~)

每一日士多為左留住客人, 都會各出奇謀, 由地攤遊戲到收費按摩椅到抽獎都有!
最離奇有夾公仔機, 但裡面唔係放公仔, 而係香煙.
你以為成件事係騙案, 覺得根本冇可能夾到, 點知其門如市, 班工人晚晚排晒隊玩,
一玩就幾十蚊 (大陸煙一般只係十蚊一包), 然後乜都夾唔到又嘻嘻哈哈返過去睇電視。

呢種生活,過一兩晚還可算新奇有趣,
但若然要晚晚係咁,我自問冇可能頂得順。

所以,我就逃離宿舍 (對, 我有宿舍的,但我一晚都冇住過),
跳上一輛看起來代表著希望的三輪車, 用極爛的普通話同司機講:
"帶禾去附賤最惹鬧的地方!"

然後司機用頗純正的廣東話回答: "你香港人黎架?......附近最熱鬧的話, 應該係得厚街咋wor..."

厚街? 個名咁熟口面既?......

哦......國際知名果個中國性都!!