泰無聊

- 話說有晚正在siam square諗緊邊度有得食正宗泰菜,

然後見到連續幾間boutique sales姐姐都叫緊同一間外賣,

結果順藤摸瓜就摸左去呢間外賣小舖~

好食過好多名店囉~

- 微博有人見到呢張相話我d每次去旅行都好似走難咁,

好錯!

其實同我去旅行仲慘過走難~

尤其是我每晚都要食宵夜,

每逢半夜總會流連當地便利店睇下有乜野好叮,

呢個肉碎飯色香味都有兼夾飽肚! 仲要只係thb$30!

再加埋香港冇既芬達雜果味汽水~ cool~

- 本人一向極喜愛研究微波爐食品,

發覺叮叮呢方面泰國係比香港走得更前,

肉碎飯只係濕濕絮, 請留意上圖右下角,

佢地連叮叮魚頭都有...

- 今次下榻的酒店,

古古怪怪, 但又幾好住.

- check in 時會有送爆谷俾你,

點解呢?

有戲睇卦...

- 酒店內的一盞燈, 好想拎番屋企...

- 水門街的海南雞飯.

響泰國要叫一個海南雞飯唔難.

但若要叫一個內臟雞飯就有點難度,

呢碟飯真的得來不易~

- 在香港塗鴉要拉要鎖,

但泰國係幾層樓開放任你噴,

而地點仲要係, cultural center!

- 泰國陳綺貞~ 很不錯的.

- 近年好興的art jam,

但呢個model就不太專業,

一見我影相就係咁望過黎...

搞到原本畫緊佢既鬼佬屌晒鬼~

- 宅男撞正懷舊電玩展,

完全冇拒絕的理由~

- 還記得這個嘛?

第一代家用遊戲機"雅達利"!

- 著名電子垃圾"virtual boy" 亦在展覽之列.

- (難民時間又來了)

大街小巷都會見到呢d車仔檔,

遊客通常都不屑幫襯.

但我呢d內臟之友又點會放過呢個機會?!

睇落好核突,

但講新鮮程度, 其實好過旺角果d牛雜好多好多~

撳錢撳出癮

(我而家先講撳錢會唔會遲左D?)

發達好難，六合彩又冇得中。所以每逢遇上不努而獲機會都會成為樂趣。
不能否認撳錢係成功, 大家睇下電視食下薯片撳下remote,
坐係屋企un un 腳然後有錢收,
夠晒互動, 又唔洗擔擔抬抬。

我唔係 now 用戶， 但都叫有玩過幾集，基本玩法係要響 101 台答中所有題目就有錢分。
一晚八條，整整一粒鐘維持高度作戰狀態! 講真其實都係辛苦錢。

不過而家唔止apps有"pro版"同"lite版", 原來撳錢都有"lite版",
仲要係100台都有份參與. 只要答岩頭四條問題，就會贏得八達通$10日日賞。
與其話係贏, 倒不如話係送, 因為有玩過都知,
頭四題通常都淺到冇朋友, 唔駛點上網search的~

$10睇落微不足道, 但係山大斬埋有柴,
玩足咁多晚的話都可以有成二百幾蚊.
點都方便過每日去地鐵站排隊排餐死嘟兩蚊!

由於我未裝101台, 八卦上網睇下而家做緊乜野offer, 點知又俾我見到條link:
http://www.u-soccer.com/promotion/now/usoccer.php

$37又確係難免令人心動~

這半年

呢半年響我身上發生既事, 真係足夠我寫成書/拍一套戲,
起落之大, 亦係以前所未遇過,
更開始令我吃不消.
所以呢度近來都係維持非常有限度服務 (who fucking cares?~)

自問自己都算係一個有計劃的人,
但而家自己都唔係好敢預測黎緊會發生乜野事.

細個讀書有個阿sir好鍾意講一句:
"有問題? 唔緊要~ 因為問題是用來解決的"
呢句似是而非既話其實影響得我好深,
困難人人都有, 有人選擇擰歪面當睇唔到,
有人選擇面對.
而我通常都會選擇後者.

打波果陣, 好多時我都要負責看守比我健碩成倍既對手,
有人會戥我辛苦, 怕我頂唔住, 但我其實樂在其中,
暗啞底係好享受呢種懸殊既衝擊,
第一次俾人撞, 會撞到飛開; 第二次俾人撞, 會跌底;
到第三次俾人撞, 其實已經大概掌握到技巧令自己唔再跌.
我就是這麼長大的.

剛剛看完"我, 看見惡魔" ,
(我明白, 大家都以為我係會搶先入場睇3d玉蒲團,
但講真, 呢套送飛俾我都要考慮一下...)
久久未能釋懷,
雖則劇情多多少少有點犯駁, 但導演層層的折磨確係令觀眾透不過氣.

究竟, 報復係咪真係咁緊要?