荷蘭。比利時。杜拜 雜絮

- 在阿姆斯特丹下塌的旅館,

我明明book單人房, 但一入去就見到三張床,

我番落去同receptionist姐姐寒暄問點解會有三張床

佢望一望我, 答

"幾好呀~ 咁你可以帶新朋友來過夜呀~"

答完仲對我單了一下眼... o.<

荷蘭真可愛~

(FYI, 今次我其實係一個人去, 雖則每次講出黎都冇人信...)

- 今次旅程最大遺撼之一就係遇上 van gogh museum 裝修!!

但職員好快就提供一個浪漫行程補數:

"拿我地用一條紅繩將舊館同新館連埋一齊,

只要係跟住樹上既紅繩就會去到新館,

步行十分鐘左右就到~"

然後, 下圖就是佢所講的紅繩,

看見冇?!

  

但我行左三分鐘就唔見左條繩...

結果我行多半個鐘都去唔到,

要截車再不停問路先去得到...=.=

- 傳說中的magic mushroom!

可買返屋企自行栽種,

但後果自負.

- 阿姆斯特丹的eye film institute,

呢部係紀念品機,

只要係"隊"部手機入去,

就會有條影片送俾你,

睇落好低能, 

但唔止我, 現場好多老外玩呢部機都玩得好開心~

- 呢度原本應該係鹿特丹的一個市集,

但我去到果陣就只見到... 空地一塊...

當日仲只係得零度左右(仲勁大風),

好辛苦先行得過對面...

- 歐洲大部份的廁所都要收費,

而呢間就係廁所+精品店,

當然所賣精品全部都同廁所有關,

就連男裝衛生巾都有得賣!

可即買即用(!!)

- 各大火車站都有此類locker,

方便抵用,

背囊友必用!

點解要講呢個呢,

係因為香港其實都有同款locker, 如紅磡站,

但費用竟然比歐洲貴得多...

(例: 最大果格,香港係HKD$70 per 2 hours,

而比利時都係約HKD$70......per 7 days!)

- 其實此行主要目的係去"廟思淫" (又係每次講出黎都冇人信...),

而竟然有朋友突然捐出museum pass一張!

真係慳好多!

特別鳴謝C小姐仗義捐出.

冇錯~ museum pass上面係寫小姐, 但...who fucking cares?!

- 荷蘭火車有好多款, 幾乎每次乘搭都唔同,

而呢款包箱型算係最好坐(價錢一樣),

見上圖兩位訓得好辛苦?

望埋下圖

其實可以變床,

仲可以熄燈及閂門,

只要你夠厚顏~

(但我只係厚顏了一個站, 去到rottendam就將座位擺番整齊~因為好多人!!)

- 住hostel有樣好, 就係不時發現溫馨之處,

好多人臨走時會將剩餘物資放在common kitchen益下家,

看, 連老抽都有!

如果英國是food hell,

荷蘭至少都算係food grave,

沙律醬撈薯條已經係荷蘭最受歡迎食品之一......

(另外仲有可樂餅, 但唔夠薯條飽肚)

- 搭A380的好處!!

- 話說因為種種原因, 我去到杜拜果陣已經係凌晨兩點幾,

而這個號稱不夜城的杜拜機場在出閘後竟然係冇食肆...

(有costa cafe, 但佢同我講只剩coffee沒有cake)

左問右問之下, 要去到職員專用小食部,

仲要同好多夜班員工鬥搶先搶到上圖果個麵包...

我突然覺得自己好淒涼...

- 冷氣巴士站在香港人眼中沒甚特別,

但在杜拜, 簡直就是綠洲!

就算唔搭巴士都要入去坐下,

如果唔係真係會中暑. 

- 我唔否認, 當我在街角轉出突然看見呢個環境,

我係有想過逃跑的...

- 去杜拜旅遊, 好多人會跟 local tour 搭成個鐘車由城內出去沙漠玩,

我沒有.

因為我住果間酒店樓下已經係沙漠(但我明明在城內)......~

雜 絮 - 有關利是

每年拆利是的時候, 

總會選出red pocket of the year,

今年得主係呢個(!!)

得獎原因有二:

1) 今年係龍年, 而佢堅持用小雞雞做cover image, 勇氣可嘉.

2) 當幼稚園都印利是封拉客, 醫院還會遠嘛?

聞名不如見面, 

終於親身見識到這個詭異的五百蚊.

而我收到後的第一件事, 係想搵原子筆幫佢易容......

(唔好屌住, 我唔係富二代, 冇咁多銀紙擺上網晒, 呢疊只係廿蚊同五十蚊紙)

其實我每年都好懶拆利是,

就算拆左都係餅落櫃桶底,

餅下餅下就儲落一大疊廿蚊...

而我想講一個故事, 

對上一次清櫃桶係2006年,

當時我將櫃桶內的錢拎晒去找換店,

唱晒做yen...

因為條數足夠我去玩一轉日本...

今日, 我對住呢疊廿蚊, 

我打算拎去換歐羅...

句號~

雜 絮

- 冇到內地一排, 龍華線就長左咁多...

港鐵下半年業績實好啦~!

- 如謎一樣的霸王涼茶,

之前講到係威係勢,

但著實好少見到有地方賣,

就連些粉都唔係間間有售.

說好的中藥衛生巾更加係影都冇.

攪乜?!

- 韓寒的"獨唱團"出左一期之後就被河蟹,

唔緊要, 內地最強有山寨!

雖說山寨, 但抽水絕不手軟,

書名叫做: "無獨有偶" (!!)

食字黎講, 呢個都算給力~

不過心思全花在封面, 內容不過爾爾...

今期書城收穫.

夠捱到書展喇卦...

不過行到腳軟都搵唔到"毒笑小說"...

雜 絮

- 我明白cold call都係要搵食,

但銷售技術可唔可以高d呢?

某電訊公司早兩日sell我用電話睇nba (咁同開名有乜分別?!)...

"先生, 而家可以以月費$78, 就可以用手電睇到即時nba頻道,

而家首兩個禮拜仲可以免月費, 你知啦, 而家打緊finals..."

"你都知而家打緊finals哩?! (**註finals頂盡打到今個月15號...),

咁我俾左錢之後你叫我睇乜好呢??"

"哦, 咁頻道仲有其他重溫同埋精華俾你睇架..."

"咁我點解唔上youtube睇呢??"

------------------------------------------------------

- 壞品味系列:

估唔到而家呢個年代仲有啪鈕褲賣!

仲要係黃色!!!

傻西必買~

某日行過街見到呢件野...

天地為證, 如果呢件野賣得, 我切!

- 天呀! n年前提過的 山寨玩具大圖鑑 終於出左中文版!!

除左玩具, 裡面對玩具的分析及走勢都好好睇~

------------------------------------------------------

- 而家逢星期五都變左做電影欣賞會,

只因我張 vip card 續左期~

animal kingdom

講一個青年人投靠祖母,

點知佢地成家原來係犯罪集團...

戲軌不俗, 但拍出黎偏向似鏗鏘集,

麻麻...

不再讓你孤單

請原諒劉偉強, 我都明白劇情扭曲得令人失笑,

(所有香港人都係壞人, 所有內地人都係好人...仲會話公安係廉潔, 不像香港...)

畢竟國情不同.

但成套戲最令人信服的, 是眼淚.

至少我相信每一個主角的眼淚都是真的, 而唔係靠眼藥水.

包括 田亮 果一滴~

submarine

中文譯做"愛情潛水", 好明顯想食"愛情回水"之勢,

講影像係有幾分相似,

但級數差幾皮,

呢套係似學生畢業作品多d...

------------------------------------------------------

- 同場加映 宵夜速遞 (copied from my fb)

life is like a pack of 端午糭, 你永遠唔知雪櫃果一堆糭係邊隻(鹹肉?)打邊隻(豆沙??),

尤其是深宵果陣...... 而家又要去博一舖了......

我到而家都為左呢堆糉而糾結中...

雜 絮

- 雖則地點係最乞我憎的博覽館,

雖則座位又衰到冇人有,

但點都好, 都係抵睇.

舞台機關仲多過平時睇舞台劇,

如果我係stage manager真係頭都痕撚埋.

而且仲要唱足兩粒鐘!

冇錯, 演唱會係應該唱歌,

而唔係抽獎玩遊戲與及棟篤笑的.

- 呢排大熱果幾套戲都睇晒,

但真係鍾意的, 只有"讓子彈飛"

更好睇的是內地網民對套戲驗屍一樣的解讀,

簡直嘆為觀止 (當然有d過份解讀係牽強左少少~)

"black swan"令我諗番起"capote",

一樣係主角出色, 但其他地方弱到hihi...

犯駁處處, 跳舞場面連"billy elliot"都不如.

"127 hours" 就同 danny boyle 平時一樣,

(平時係指 millions, 28 days later 果期, 唔係slumdog果期)

鏡頭撚得好, 冇多餘鏡頭, 去講一個普通到喊的故仔.

由於入場前老早知道個結局,

所以去到中段已經坐響度等佢鋸手...

如果唔知結局入場應該會好睇少少.

又, 一個人, 一舊石, 拍足粒半鐘而唔悶,

其實都好難得.

- 是日海報

爛片唔一定有爛海報的~

scream 又來了

- 黎緊最想睇的日本電影應該係呢套:

雜 絮

剩係講今日

- 一起身就睇波, CLIPPERS VS JAZZ,
clippers球員一如以往飛來飛去, 娛樂性極高,
但又繼續唔識羸波...

- 我一落街發現買唔到milk, 就知佢又送d古怪野...
原來係adidas筆記簿...
令我諗起細個puma文具曾經都紅極一時...

- 去買朋友的入伙禮物,
睇中左, 但問過幾間都冇存貨,
但聽日就要送, 咁點好?!
唯有連佢最後果件陳列品都照殺,
即場借條毛巾由頭抹到落尾先入盒.
仲借勢屈到佢俾discount我~ 嘩哈!

- love and other drugs
老土! 句號
(或者女性會覺得感人)
anne hathaway有大量裸露片段,
但早排已經上網睇過晒,
(外國竟然有人剩係盜錄呢幾場露點戲擺上網...)
連唯一亮點都冇埋...差d訓著.
不過部份對白都尚算精警.

雜 絮

- 盲俠行

有見到我微博的話, 大概就知我尋晚現場直播佢地點樣騷擾我訓覺.

即係, 一班人參與活動興高采烈我都明白,

但點解每一批人總有幾個會無啦啦響度 "woo~~~WOO~~" 鳩叫架呢?!

你知唔知果陣係凌晨呀? 而你又知唔知半夜三就算只係傾偈都係好應聲的?!

你知唔知呢個世界除左盲人需要幫助之外, 唔夠訓的人都好需要幫助架?!

而更加不幸的是, 樓下剛好有幾個臨時廁所...

每隔三分種就有人"砰嘭~"話俾你知佢要去廁所...

- 壞品味系列

攝於鯉魚門...

你整魚整蟹我都明,

但呢個...想點呢?

- 拆 蟹

話說收到朋友送來的禮物,

不過剩係拆盒已經玩左我半粒鐘.

而家吸塑好平架咋, 點解仲要五花大綁呢?!

剩係個身已經俾7-8條線綁住...

其實佢係一隻可憐的柯柏文~

雜 絮

- 尋日睇報導, 最吸引我的除左那個敏感詞獎(近排睇得太多韓寒之過~)之外, 就係呢個, 一路睇一路忍唔住笑~



因為呢單新聞令我諗起當年網路上的趣事:
詳情可睇呢度:
http://www.wretch.cc/blog/Shadox/10005160
吐~ 2.5億算甚麼?! 人家早就賣9億了~

當年台灣耐唔耐就有一單惡攪拍賣,
貨品唔重要, 最重要的是問答環節,
大家都用一個好認真既態度去問一D好鳩既問題,
而賣家又不厭其煩引經據典的逐一回答.
大家流鬥流, 好玩過而家高登多多聲~

而咁多次惡攪之中, "二手牙簽"果條可謂最精彩,
可惜呢個冇出書...
有copy的煩請send個給我~

- 呢期電玩話題的NBA 2K11,
因為波神肖像權終於解禁而造成哄動.
玩左成晚, 波神動作都可算非常細膩,
小動作都跟到足.
仲可以用番某D 90年代強隊, 如圖中的Supersonics.
可惜大部份只得正選...後備變晒做普通電腦人.



- 又, 講開NBA,
熱身賽剛剛開打, 林書豪首次登場,
林書豪有乜咁巴閉呢?
*佢係NBA首位華裔控衛 (姚明可不是控衛來的...)
亞洲後衛面對外國人通常都會變炮灰的, 佢可算係近年對抗性最好的一個.
*佢, 係哈佛畢業的, GPA 4.2...
*哈佛讀書冇乜特別, 特別的是哈佛沒有體育獎學金呢回事,
所以一般來講, 有潛質的運動員早就被其他名校(如UNC, UCLA等等)挖走,
通常讀得哈佛都不容你考慮做職業運動員, 只能夠專心讀書~
*而對上一次哈佛出產職業籃球員, 係195X年...



- 是日好書推介:
501 things to do with a zombie

其本上, 呢本書係低能的!
插圖核突, 文字簡陋.
但係佢既中心思想又幾唔錯:
其實你我身邊都好多像喪屍一樣的人,
請多d關心身邊既人~

雜 絮

- 日子近來過得很爛, 心情低落, 但總要保持高昂意志...

- 友人相約到花墟打波, 驚死我唔識去,

但我其實有數年時間曾經長駐花墟鬥波.小食部換左老細,
但態度依然親切. 冰菠蘿$3; 油脾$8, 好抵食!
更衣室比以前企理, locker更加有中央管理, 仲好過室內場.
(但沖涼竟然冇凍水囉! 三十幾度, 水箱都燒滾了),
以前打波後的飯堂已經執笠...好懷念以前十幾廿人一齊行落太子食飯,
叫'送'叫到打交咁滯的日子~

- 有人千辛萬苦終於可以獨立搬出來住,
點知新居唔夠一個禮拜就鬧鬼!
而家仲要係七月...

- 話說我部親愛的android 電話有呢個鬼劃符鎖機功能.
然後我企圖創作一個好有型的開鎖符...
而結果... 我lock死左自己部機.
攪左成晚都開唔到, 第二朝死死地去維修中心,
佢一見我部機就冷冷地一句
"要洗機喎..."
!!!
就係咁,
近半年我所有新認識的電話, email, 甚至'新mon'的題材都冇晒...

雜 絮

- 我知, 而家呢D絮濕濕既野應該去微博果邊講,
但我真係唔覺得微博好好用,
所以都係繼續響呢邊放屁~

- 呢排實在忙得不可開交, email未得閒覆, 趨時野未得閒睇,
戲就飛住咁睇...

- 以下幾套都係要我飛住咁睇:

The Runaways
(可能我唔係流住搖滾的血,
所以我剩係見到幾個唔係好識做戲的妹妹全場響度鳩叫...)

白夜行
(近排瀨野之最...悶到呢...都話韓片多多冇好野架啦!)

Chloe
(搵戲來做的一齣, 如果唔係全裸的amanda seyfried 我應該已經沉睡幾轉.
又, 以up & coming女星來講, amanda seyfried可算係最唔適合拍脫戲,
廿幾歲女身材點解可以差成咁?)

- 好似好神秘的王迪詩最近又有新作, 但我其實唔係睇開佢d書的...
咁我點解留意到呢?
係因為我俾佢個封面吸引住...
嘩頂! 點解呢d咁老套既封面會出到街架?!
好似八十年代報攤攝埋一二角賣果d所謂台式情慾小說囉...

- 如果未來呢幾晚等睇世界杯之前冇乜好做的話,
可以睇下NBA~
係, 正式賽季完左,
但summer league先剛剛開始,
好多騎呢鬼~ 好好睇的~

雜 絮

- 我仲未收到選舉通知書呀下...
但其實, 應該就咁拎身分證都可以投票的了...
但又其實, 我係需要轉地址架囉...

- 我很勾, 我一直以為免費商場雜誌只係得"讀書好",
(OK, 仲有本好出名的叫'點心', 但呢本唔係度度有嘛~~)
但尋晚行街又無意中見到有本叫"pandaa!"又幾好睇.
而今期主題係'crazy'...內裡仲有專題係講savant syndrome.
(有乜咁吸引? 唉你唔係savant你唔會明架喇~~)
估佢唔到的是, 呢本野, 係'東方'出的...

- 返屋企果陣, 聽到後面一對情侶對話(嚴格黎講只係得條囡講)

"你同我阿媽一撚樣架! 剩係識得屌, 做0岩又唔見你讚下我, 我阿媽又係咁, 上次我考到全班第十一名 (!!全班...), 佢讚都冇讚過我, 係咁話我讀書係應份架喎...屌! 所以我下學期咪唔撚讀囉!! (按: 佢唔讀既意思, 係唔返學...) 係呀, 我特登唔撚讀呀, 等佢剩係識得鬧丫拿!!"

(呢個時候, 條仔大概係消化緊條囡講既野...)

"唉, 算啦, 你諗唔到我鬧你乜架喇, 你都唔識諗野, 你諗野邊有我咁detail丫!!"

我果下真係忍唔住擰轉頭望佢!!

"望乜野呀四眼仔?!"

"哦冇...想讚下妳講野好夠中氣之嘛~~"

雜 絮

- 美國ADR睇到匯豐跌到$73, 聽日大概可以唱定錢入貨喇卦~

- 講左咁多次, 終於有機會睇"潮爆北京", 但感覺一般,
戲中的艾未未竟然比而家後生幾倍~
btw, 女主角的胸脯霸佔了很多視線...

- 我一向好怕uniqlo tee, 因為醜的我買唔落; 好睇的又實會同人撞...
但佢地黎緊又會出'稻中兵團'tee...
搞到我好矛盾~
而'稻中兵團'的先驅'奇面學生組'(識得呢套某程度係暴露左自己年齡), tee已出!!

- 近期最期待的港產片 - 郭子健'打擂台'

雜 絮 有關創意

- 好多人都覺得鐘錶設計係夕陽工業,
但事實係長玩長有!~

如果有人送俾我, 多好~

盛惠$3900......加幣!

www.scienceandsons.com

- 繼之前無葉風扇之後又一傑作...

無針錶~! (不過唔係dyson生產)

- lego每次出親電影相關產品都會出事,

(starwars 除外, starwars出舊屎都會有人排隊買的...)

今次玩到即將上畫的波斯王子...

唯一值得講的, 只係lego首次出現駱駝figure...

有興趣的可到 lego.com 訂購.

btw, 遲d仲會有醜__到喊的toy story 3 lego...

- 睇素顏小姐講起 spike jonze,

呢個哥仔實在多元化到離晒譜,

今年亦都會參與3D製作, 將自己作品重拍兼立體化.

但...佢唔係3D新近的"i'm here";

亦唔係上年的"where's the wild things are";

更加唔係"being john malkovich" (雖則呢部好襯),

而係...

jackass!!!

有睇過jackass的話, 大約估到佢會3D乜野啦可?!

雜 絮

- 電影節戲飛早已收到,
但竟然唔齊, 仲要係漏左我最想睇而又幾肯定香港唔會上的
life during wartime...

- 遺撼又何止一個,
我亦都買唔到世博入場券...

- 原本有一篇'壞品味系列'想出,
果篇廣告係嬲到我一路睇一路jot note,
諗住再擺上網鞭屍,
點知成本雜誌唔見左...

- 尋晚突然得閒, 貢左入修頓睇銀牌賽,
支持我最愛的飛鷹.
奈何佢地實在海鮮得太緊要...
尾場的南華對永倫依舊...懶有火藥味...
但冇一次打得成交囉!

- 番到屋企收到網友突然身故的消息...
"RIP"之餘, 亦提醒我要做一樣拖左好耐的事:
睇中醫!

由於阿大夫只睇熟客, 所以可以慢慢詳談,
而成晚傾得最耐的題目, 竟然係
機械設計...!!
原來佢除左自己製藥之外, 亦都做埋所有生產機器...
一面執藥一面解答我對機械的疑問,
聽到O晒咀~

- 恭喜 空姐E 榮登google street view!
簡直係漆黑裡的螢火蟲一樣,
打左格都認得出呀!!
有緣人可到相關地段搜尋.

...唔係網上大hit果個擒窗裸女, ok?

雜 絮...續

- 看了 drew barrymore 第一次做導演的 'whip it',
不過不失啦~
只係想講戲內提及的'roller derby'比賽,
一路睇一路諗起當年睇harry potter的'魁地奇'......

"乜咁樣好玩咩?!"

- 點解 william 拍親果d廣告都咁鳩架呢?
最新果個廣告真係...
d肉咁鬆就唔好除衫啦...
仲要搭條bra帶上身想點呢?!

- 近期上廣州, 已經開始見到亞運宣傳,
四圍都見到果五隻吉祥物...



......你肯定呢隻係羊?!
點睇都似十五樓的牛嘔喎...

btw, 買雜誌時收到的亞運年曆卡...



係我最愛的卡巴迪~~!
(但點解得四隻?!)

我好懷疑今年喜羊羊電影版係會有"樂羊羊"客串的...

雜 絮

- 看著近排最受歡迎的 暗瘡 crossover 迷你倉 廣告,
隔離果位口痕問: "乜個鬼佬原來係老細?!"

喂...估都估到啦~
假若迷你倉個老細唔係阿鬼佬, 而係你,
你會唔會容許一個講廣東話講得咁死衰的人幫你宣傳?!
而家香港剩番佢一個識講廣東話嗎?
仲要唔係靚仔!!
.

- htc tattoo之所以叫tattoo,
係因為用家可以上網幫自己部電話紋身,
咁我地呢d貪過癮就緊係上網搞搞佢...



呢個係地色預想圖.
你睇到乜?
睇到深褐色的木紋, 係咪?!
但實物呢......
.
.
.
.
.





好明顯係付運途中遇上空難囉!
咁就燒焦......
.

- 都話左我係知名blogger架啦~!
繼上次霍生睇完我個blog之後就取消東亞運項目 (!!),
今次原來好姐都有睇我個blog囉 (!!!!!)
好撚威!!~~
好姐已經換左包裝!



但同波仔真係成個餅印一樣...
你老母來麼?!

我諗起內地果d"霸主"洗頭水同埋"雲碧"汽水...

雜 絮

- 九龍風水傳

都話風水術數應該列入中學必修課程架啦!

搵到錢又搵到食, 唔駛再愁年青人就業問題.

果D乜乜剪翅計劃可以摺埋咯.

睇風水果個可以有幾十億身家;

識茅山果個又可以九淺一深幫人開運;

而家仲有寵物問米...仲有個好型既名叫寵物傳心師!!

傳心喎......存心___咋?!

其實我都係死物傳心師, 大家以後唔見左電話呀, 遙控呀, 底褲呀都可以搵我,

我會用傳心術幫你搵搵:

"佢而家響一個好黑既地方... 佢好驚...

不過佢叫你唔駛擔心... 佢會遲d番... 唔駛煮佢飯..."

- 俄 女

俄鋁個主席 Oleg Deripaska 因為背景 "有D野" 而拎唔到美國簽證,

嚇到高盛宣佈退出上市保薦, 可能響香港上唔到市.

但呀主席向各大小股民派定心丸, 話自己身家清白, 仲話普京可以做證!!

喂大佬...你講完我仲驚喎...

即係等於克林頓搵貝盧斯科尼證明佢唔鹹濕; 又或

特首好有心推行民主進程: "唔信你問下我個 friend 金正日~"

- being charlie kaufman!

搵足一年都搵唔到 Charlie Kaufman 導演果套 "Synecdoche, New York" DVD,

點知, 佢忽然響下個月香港上畫!!!

BTW, 香港版的 poster 醜到喊...

- being michel gondry!!

講開 Charlie Kaufman 就順手講埋 Michel Gondry,

黎緊法國電影節有佢的 "the thorn in the heart",

但小心地雷, 係紀錄片來的...

- ok...又來...壞品味時間

「你好，我係Karen，我有心事... ... 」
「真case嚟㗎﹗」
「我知係真，等我又搵啲心事寫信俾你。」
「好呀，署名仆街丫。」
「我諗住搵個有型啲嘅名喎。」
「變型金剛？」
「Thomas金剛﹗」
「Thomas金剛，你有咩心事？」
「我同女人合唔到體，點算好？」
「係咪因為你搵錯福娃呀？」
「係福娃又唔錯，有得5P。」
「咁你係咪搵錯Megan Fox呀？人哋咁索，睬你有味。」
「有乜理由？﹗我咁靚仔﹗﹗」
「火車頭金剛身，好kai囉。」
「不知幾多女冧我個頭﹗﹗﹗」
「我諗你換個忍者龜頭好啲... ... 」
「呢期緊係興小飛柒啦～～」