一個故事 - 年 宵

年宵市場對好多人黎講係熱點節目,
但對店員黎講只係一年一度的災難...
明明每日都係賣同樣既貨, 卻又每日都要將貨品搬來搬去, 朝行晚拆;
仲要應付一堆又一堆你明明唔識佢, 但佢又會覺得你欠左佢的講價客;
還有最難應付, 來混吉的一群...

佢地已經係連續第三晚企響檔口前望住d貨眼光光,
點解店員會認得? 因為那個女人每次都會帶同一位智障小朋友,
而佢倆在遊人如鯽的市場裡面總會得到大量空間,
唔係佢地爭番黎, 而係個個都避開佢地,
空間大到店員都曾經懷疑, 智障其實係咪會傳染架呢?!
總之, 每次見到佢地, 就如見到摩西, 好易認~

由於兩人從來都冇提出過任何議價或問題,
店員就由得佢地看個夠, 做少一樣得一樣, 樂得清閒.
但都來到年廿九, 每晚這樣望, 會望到過年嗎?

店員出於好奇, 就開始對那位小朋友釋出善意:
"你睇中邊隻呀? 平d賣俾你丫~"

小朋友望著店員良久, 還是覺得毛公仔比較耐看,
就轉眼望向店員身後的毛公仔, 沒有答話.

"其實係我想買." 說這句的, 是女人, 亦即是小朋友的媽媽. "我想問下你地d公仔夠唔夠軟熟?"

"當然軟熟啦~ 好好攬架! 妳想買俾個仔攬哩~"

"唔係, 我買來俾佢打的. 佢每晚都要同我打一輪先肯去訓, 但佢開始長大, 我亦開始唔夠佢打, 所以要買d軟熟既公仔等大家打果陣都冇咁痛..."

店員被這個突如其來的答案打亂了, 一時之間不知道應該如何接上去...
但他想了一想, 就直接爬上檔口的頂部, 將一個原先只用來招徠客人的特大版毛公仔摘下來,
遞給太太.

"就這個吧~ 應該夠打!~"

"咁大個, 要多少錢?!"

"二十了就可以了, 別再講價哦~!"

一個故事 - 點解泰國咁好玩?!

某夜飯局講起泰國旅遊, 先記起我曾經遇過件咁既事...

是咁的, 那夜凌晨...... ok, 正確點講, 應該係清晨,
我在曼谷的酒店開始準備趕車前往機場, 追趕早上七點就走的航機.
千祈唔好問我點解咁折墮, 要追一班早到咁的航機,
因為票務工作我一向假手於人, 我連邊間 airline 都唔係分得好清楚.
只要不是"泰國東方"就行了~

上到的士, 四周漆黑一片,
太陽仍未正常升起, 睡意繼續帶領你的頭部向下沉.
而為左發揮港燦自我滿足的能屈能伸語言天份,
在的士上我還是向司機說了一句早前學定的泰文 "DO屌!!",
亦即是中文的: "快!"
但就係因為呢個'快'字, 就出事了......

在清晨的高速公路上, 四野無人, 車也不多,
就算連浮雲也望得不太清楚,
但就響呢個百無聊賴時候,
我竟然見到前面遠處有一個人頭正在公路的右邊轆出來!
個頭一直向左邊旋轉, 愈轆愈近,
直至轆到的士的正前方的行車線,
在車頭燈照射下先發現, 原來係一個不停滾動的電單車頭盔(!!)...

係, 冇錯, 頭盔短時間已落在行車線上,
我諗住司機會收油或者避開,
但佢完全冇打算做以上兩個動作的跡象...
"唔係咁邪呀?! 得我一個睇到個頭盔??"
我有諗過叫佢停車, 但我發現自己冇學到泰文的停車是怎麼說,
而且, 我未諗完, 佢已經兜野撞埋去個頭盔果度......

更邪的是, 我估唔到個頭盔原來咁硬淨,
冇被的士撞開不特止, 仲成個入晒攝入車底,
車頭立即被唧起雙輪離地,
 (題外話, 如果知道頭盔係乜野牌子, 就算冇電單車都真係值得買番個~!)
我以為跟住會反車轆落山, 好在又冇,
但就震醒左我隔離位果條友 (ok, 我其實係有團友的, 但唔好問邊個, 亦非重點),
佢以為地震, 嚇到面都青晒地問:

"發生乜野事??"

"er...... 剛剛的士轆過左個頭......盔"

"咁...... 咁個人去左邊...?"

"唔好問!...... 亦都唔好擰轉頭望!!!"

一個故事 - 來回地獄又折返人間

落地獄的滋味是怎樣的?

只要在公司吊煙癮, 然後搭電梯企圖俯衝落樓下果陣就知了.
冇錯, 係企圖. 因為電梯永遠在你趕時間的時間站站停,
你只得仰望那冷冰冰的跳字屏逐步把你拉進深淵.


18...... 17...... 16...... 15...... 叮!
我整你個掣咩?! 又停? 我已經揀非繁忙時間先搭lift架喇喎!


門就在15樓緩緩打開, 我就像龍婆一樣企響死角位怒目望向門外的人...
的確, 這是我當時唯一可以做的動作.
而唯一能夠改變這個動作的人, 正正就係門外果個, 因為, 是靚女來的!


我倆四目交投, 良久說不出話來,
不過浪漫的情節沒有接著發生, 取而代之的是相互的同一句對白:
"點解你會響度架?!"


門外的, 正是中學時代的女班長, 又或稱: 校花.
由於品學兼優兼樣子標緻, 當年的一眾裙下之臣無不被其狂風掃落葉式裙腳掃中,
我等咖呢啡當然連腳眼都掂唔到, 只能夠被吹到汕尾以南細數落葉.
不久之後, 校花更被某校草私有化, 從此消聲匿跡做其少奶奶,
一代傳奇告終,
裙下之臣亦各自回歸平淡,
回到現實繼續跟豬扒搏鬥.


眨眼間一別數年, 又回到眼前, 校花風釆依然.
就算在得知她已成為兩子之母之後, 女神地位仍絲毫未有動搖!


"點解妳會黎呢度?"


"我黎睇醫生呀, 有病就要睇醫生架啦~" 我對她的笑靨依然沒有抵抗力, 那管她是抱病, 電力絲毫不減.


"15樓有醫生架咩? 我日日響度返工都唔知原來有得睇醫生..."


"你咁忙點會知丫... 出面落緊雨, 你做乜唔帶遮呀?" 
好喇下, 連關心都出埋, 就黎被電到腳軟.


"erm... 我只係落去食煙之嘛......"
我竟然因為承認自己抽煙而感到難為情, 佢果然係女班長!


門, 再度打開, 縱然, 我其實有點想'困lift'.


"咁大雨不如我遮妳去地鐵站啦?"


"傻豬, 你都冇遮, 點遮我去地鐵站呀? 我自己行過去得喇~" 
我差點就跪低.


望著那豐腴的臀部一點一點地縮小,
我點起煙, 抖擻一下,
雙手卻忍不住顫抖.


15樓, 其實是某社福機構的辦事處,
專門處理受家庭問題或虐待婦女的個案,
以及提供精神治療.
我怎會不知?!


地獄的滋味是怎樣的?

一個故事 - 腳

人總是有奴性的, 特別是男人.
進化論大概只適用於長度, 腦筋上其實冇乜點進化過,
達爾文應該慶幸自己死得早~

她說喜歡街口茶餐廳的早餐A, 但自己又永遠唔會落去食,
所以每次見面前, 我總會買定同款的早餐A上去,
口裡說喜歡, 但每次咪又係扒兩啖就剩響度...

如果你以為佢會感激我幫佢買早餐, 咁你就錯了~
佢食完就只會逕自睇電視揭雜誌, 對剛剛發生完親密關係的杯杯碟碟不瞅不睬,
當然, 對我亦如是.

"呀係......" 她若有所悟, 終於跟我說話.

"不如你幫我剪腳甲?" 原來這就是她的所悟...

我一瞥牆上的半身鏡, 看著未訓醒的自己問: 我看似髮花嗎?!

唔係話唔剪得, 但我連自己剪自己都可以剪到成腳都係血既時候,
她這個要求無疑就是自殺式炸彈襲擊...炸己又炸人.

我拿起指甲鉗, 對著一堆狀甚陌生的腳趾, 就像劏生蛇一樣,
該如何入手??
"照剪就可以了" 她開始不耐煩.
從何定義"照剪"呢兩粒字? 照妳個方法咁剪定照我個方法咁剪?!
唯有步步為營...
奈何剪到去轉彎位賽在太高難度, 我低吟的哼出"啪"的一聲就當剪左,
幸好她不大察覺~

"來,  扶我上輪椅." 這才是她一直沒有察覺我偷雞的原因. "陪我出花園坐坐. 你也可以順便抽煙吧"

"妳不怕二手煙嗎?"

"怕甚麼?! 我還有時間生癌吧~" 我的婆婆如是說.

一個故事 - 入急症室如何撳緊急掣

麻將檯上, 幾個人面對門前的十三粒石頭而各自惆悵, 卻又碎碎唸起來.

東位率先打出一隻東, 很極端的打法.
早段就打番子, 是大牌來嗎?
"呀... 你地有冇去過急症室? 我上次去, 等到我訓著都未輪到我...點解次次都要等咁耐??"

南位隨後摸上一隻牌, 左攝右攝一輪之後, 還是覺得入不了章, 只得打掉.
"想快? 好易之嘛, 我果次同人打交, 只要去到門口作勢再打一場,
警員怕我地騷擾到其他人, 就立即叫我地入大房, 都唔駛排隊~"
說時手指還在吊著牌子不放, 太優柔寡斷了吧?!

"係咩?! 碰!!"
老謀深算的西位早已謀著那隻不捨的四筒,
"有次朋友扭傷腳, 我陪佢搭的士去急症室, 落的士之後, 我嫌佢扭親腳行得慢,
就索性抱起佢成個人, 打算行入急症室先放底佢.
點知一入到去我連凳都未望到, 職員就如臨大敵一樣,
飛撲一張輪椅過來, 再直接推佢入去睇症,
等都唔駛等, 連手續都係事後先補番."

"其實呢......" 一直默不作聲默默在造牌的北位終於開聲:
"只要你行入去同姑娘講心口好痛, 因為心口痛可大可小, 通常都會有得優先......
......食糊, 自摸三番!~ 所以你地話, 邊駛做咁多大龍鳳呢?!"

(本故事純屬虛構, 後果自負, 請勿以身試法, 亦應當讓真正有需要人仕使用急症室)

一個故事 - 乾杯

廿五歲前, 她過的生活與一般OL無異,
悶著上班, 悶到下班, 目光只放在晚上一個又一個的朋友聚會,
盡情認識新朋友, 舉杯暢飲直至酩酊大醉.
醒來後跟不知姓甚名誰的男生道別後又是一名良家婦女.

那年頭, 只要不太甩皮甩骨, 總不愁寂寞.

在如常的一個夜晚, 如常的一個包廂, 她正準備如常的醉生夢死,
刻意坐到那六呎高的新朋友旁邊, 猜枚也好, 談心亦無不可,
只要稍後不要帶她到那些廉價時鐘小築開房就可以了,
要夢死, 也得死在酒店床上才算優雅~

奇怪的是, 這夜她就像吃了偉哥的飯鏟頭一樣,
無論喝的怎麼兇, 都依然坐得筆直毫無醉意,
眼看身邊一個又一個的倒下,
她唯有到門外抽根煙抖抖氣, 再等待六呎猛男稍後把她帶到短途極樂.

煙頭的紅光比走廊的吊燈還要明亮,
煙圈的飄逸比那擺呀擺呀的裙更能挑惹起戰爭,
六呎猛男倏忽就在她身後如鬼魅般出現,
她以為是情慾的前戲, 轉身準備獻吻,
怎料猛男卻發問:
"妳嘔左未?"

"呀......未..."
她略帶尷尬再夾雜一點不知所措的回答.

"哦......妳未呀? 咁我去嘔先"

看著猛男彳彳亍亍的步向洗手間,
想著方才疑似閒話家常的對答,
她卻激起無限湧浪,

究竟他在幹甚麼?
究竟自己又在幹甚麼??
究竟每個星期同樣時間同樣地點, 比上班還要準時,
結識一批又一批其實不太熟絡亦無興趣熟絡的所謂朋友,
為乜?
原來係為左嘔?!
嘔完仲要俾錢?!

生活是否應該這樣?
生活是否只得這樣?

她回到包廂, 隨手拿起一杯烈酒,
向在場的朋友示意乾一杯, 正確一點該是對在場的喪屍澆酒,
然後別個頭, 轉身就走.
從此, 她的酒杯再沒有斟滿過.

若你近來在街上碰到她, 她總會跟你說:
"我個人仲乾過隻杯呀!!"
但在吐糟的同時, 笑容卻是前所未有的飽滿.

一個故事 - 來 電

電話響起, 正在地鐵內忙著跟眾多對敵意乳房對望的他, 打算不接,
因為在下班時段找他的, 大多只是酒肉朋友, 不接也罷. (另一可能是蒙老闆呼召, 更不會接)
過了良久, 電話仍是不斷的響, 他不耐煩的唯有按下接聽鍵去聽這個沒有 caller ID 的來電:

"喂...邊個?!"
"喂~ 係我呀"
"咦? 你響香港咩?"
"唔係呀, 我仲響意大利~...... 你之前話過好想要果件波衫呢, 我幫你搵到喇! 我幫你買左件5號"
"咁有冇6號呀?"
"哦~ 咁我入去幫你再買過!"
"下?! 咁件5號點算呀?"
"哦~ 我俾第二個人咪得囉~ 好啦, 唔講住喇, 我入番去先."

而其實, 他倆在提及, 那件就像芥蘭般買完再買的球衣,
是. 好. 很. 貴. 的!!!

(謹在此向我的好友致歉, 我實在唔應該叫你再入去買, 因為你的一番心意已足夠令我流淚~)

一個故事 - 快餐經濟

在某快餐店內, A 與 B 各自捧著自己那個沒有配套的套餐, 在等位...

A: "好憎果D阿婆冇幫襯但又坐響度霸住個位半日都唔走!!"

B: "有乜問題?"

A: "佢攪到我地冇位坐喎! 你唔係覺得佢地冇錯下嘛?!"

B: "咁個阿婆都只係搵到著數, 你平時都成日搵著數,

咁點解你搵到著數就叫醒, 阿婆搵到著數就要俾你鬧?

況且, 你買野食果陣, 有冇人同你講你包你有位坐?"

A: "但係我有幫襯, 佢冇喎! 應該我有優先權!"

B: "優先唔優先只係你主觀意願, 如果你既立論係正確的話,

咁買三個餐既人係咪又比買一個餐既你有優先權?

其實你可以向快餐店投訴佢地管理不善, 又或唔夠地方俾人坐,

但就唔應該怪一個搵到著數既阿婆......

不過, 當快餐店做到晒你要求, 管理好左, 地方又夠坐果陣,

你手上果個餐仲止唔止賣廿蚊??"

一個故事 - 旅行的意義

那年, 跟幾個朋友在台灣,

坐在那間逼狹的度小月, 年少氣盛的我們, 吃著擔擔麵的說著:

"我地點都應該去日本豪一次!"

然後, 在機場我們許下承諾,

"大家聽日開始儲錢喇下, 下年同樣時間我地會去日本呀下!"

一年之後, 原班人馬如願以償,

轟烈的血洗原宿, 又或是慘烈的被原宿幹掉...

不再重要喇,

只記得回港前的一晚我們被大雨圍困在Lawson,

只得坐在門外吃著關東煮打發時間,

零晨的池袋比想像中寧靜, 令我們開始檢討:

"點解我地可以咁有衝勁儲錢?"

"點解我地會咁鍾意於同成班朋友去旅行, 而唔係同成班屋企人??"

"點解我地唔會好衝勁咁儲錢同屋企人去旅行豪一次???"

"咁, 不如試下咯......" 某人將最後一件發水魚旦嚥下並說著.

一個故事

某次飯聚, 席中有新朋友從事占卜工作,
朋友們即時起哄, 好雀躍推我出去試下佢功力,
因為我向來比較神秘, 冇路捉.

就咁，占卜師左計右計,
然後就彈出一句:
“你應該有好多女人架wor!!“

全場頓時鴉雀無聲...
然後各自 dup低頭默默埋首於面前的那碗飯...

折子戲

第一幕

人物: 西裝人甲, 時裝人乙

地點: 超市

鏡頭由貨架第一排尾部向前zoom,

zoom到中段甲同乙從左邊行出來,

再接住跟住兩人到前方.

乙: "真係唔駛買野上你屋企呀?"

甲 (四圍搵野look):

"唔駛咁客氣啦, 上黎坐下就好囉~ 呀... 尿片響邊排呢... 最近點呀? 呢排成日唔見人, 我個女出世咁耐你都冇見過."

乙: "其實...我呢排 xxxxxx(macguffin)xxxxxxx"

鏡頭close up, 甲擰轉頭望向身後的乙.

甲: "點解咁大件事你唔一早同我講呀?!"

第二幕

人物: 西裝人甲, 時裝人乙, 西裝人妻, 嬰兒

地點: 甲家

鏡頭由透明玻璃餐台底下向上炒,

開頭被所有碗碟遮蓋,

一碟一碟拿走之後,

鏡頭影住三人.

人妻(問甲同乙): "你兩個做乜神不守舍咁呀?"

甲 (指著乙): "佢... 有D事想請教妳..."

乙: "xxxxxx(macguffin)xxxxxxx"

鏡頭由窗外開始 zoom out

鏡頭一轉, close up 人妻抱起嬰兒把玩.

人妻(鬆一口氣): "哦... 我身邊都有朋友係咁~"

乙: "唔係喎, 唔止喎... xxxxxx(macguffin)xxxxxxx"

人妻(驚訝): "下?! 咁你忍耐左幾耐?"

乙: "....大約半年..."

人妻(難以置信) : "下?!!? 原來你忍左半年?! 你呢半年係點捱架?!"

第三幕

人物: 西裝人甲, 時裝人乙

地點: 私家車內

鏡頭影住正在望風景的乙, 然後pan過去zoom正在駕車的甲.

甲: "你記唔記得早兩年我消失左一輪?"

乙: "記得, 你話去讀書丫嘛"

甲: "其實唔係. 真正原因係當時我老婆都 xxxxxx(macguffin)xxxxxxx"

乙 (啞口無言): "......."

甲: "所以佢好明白你而家既情況, 因為當時佢都suffer得好緊要."

乙 (啞口無言): "......."

甲: "所以有時有野真係唔好怕, 要拎出黎講. 你唔講, 你以為得你一個面對緊;

你講出黎, 就可能發覺好多人原來都面對緊類似既問題,

真係you will never walk alone..."

---------------------------------------

延伸閱讀:

**有關何謂 macguffin, 可參閱以下維基條目:

http://zh.wikipedia.org/wiki/%E9%BA%A5%E9%AB%98%E8%8A%AC

一個故事

那天, 我在路口呆等綠公仔向我揮手,

突然發覺身後褲袋位出現異動,

下意識倏忽醒過來轉身想來個sidekick,

轉到一半, 停下了.

眼前的不是小偷, 而是一位坐輪椅的婆婆.

那個褲袋, 就是她當時最大活動範圍之中唯一能觸碰到的.

她想要的, 不是錢包, 而是希望有人把她推到地鐵站.

沒有多餘的藉口, 只給我看看給磨損了的數根指頭.

或者, 這已是一個充分的理由.

路程頗遠, 免得大家郁悶, 便開始找話題閒聊:

她問我為何一個人在街上蹓躂?

我告訴她生活正如何失意, 只得一個人尋找轉角有沒有出路;

她跟我說出路伸一伸手, 拉一拉褲袋就會有.

縱然她看到的世界比我矮小, 但一樣找到出路, 分別在乎分憂.

我莞爾.

說著說著, 我開始問及婆婆的最終目的地:

"要過海嗎? 待會讓我找站內職員幫手好不?"

"不用了, 就在出口前停下就是了."

"妳不是要乘搭地鐵麼?"

"不...我是到那裡行乞"

她說得淡然,

但我卻不忍再推下去.

我在幹甚麼?

我正在送她去行乞?!

跟送她去死有甚麼分別?

為了整理混亂的思緒, 我獨自走到便利店,

拿上一盒牛奶, 放下, 又拿上, 再放下.

如果情緒可以跟牛奶一樣隨意放進雪櫃, 多好.

一輪掙扎之後, 我把牛奶放到她手上,

深呼吸來一句:

"來~ 我把妳推到沒有警察驅趕的地方吧"

婆婆隨即把掩蓋雙腿的毛氈卸開,

"不用怕, 傷殘人仕不怕警察的~"

這次真的不忍看下去了...

跟她相比, 我的痛苦算得上甚麼?!

但, 真的要到她那種境況才可以從容面對困難麼??

一個故事

小學六年級果一年,
我鍾意左一個女同學,
佢阿媽好早就死左, 老豆要返工,
後母又成日唔知去左邊,
屋企就成日得佢一個人,

咁有次問佢平時一個人響屋企有乜好做,
佢就話會自己同自己捉棋,

"象棋呀? 我識捉呀~"
"唔係呀, 係國際象棋呀..."

就係咁, 我即刻好努力咁去公共圖書館搵"國際象棋入門"自學
(果時仲未興上網),
然後每逢假期就會去佢屋企陪佢捉棋,
渡過好多個愉快而純情的下午~

其實我就係咁樣學識捉國際象棋的...

一個故事 - 唉...瘋...

"我尋晚去左排隊買iphone4~"

"你以前有冇試過排隊買洗衣機?"

"痴線~ 邊有人排隊買洗衣機架?!"

"咁你而家又排隊買電話?"

"點同呢, iphone4係最新最upgarde型號嘛"

"你知唔知屋企部洗衣機係乜野型號?"

"洗衣機點同電話?! 電話要日日拎出街用架!"

"咁你夠日日著衫啦...唔見你去upgrade下個洗衣機?!"

"洗衣機來來去去都係咁架啦"

"電話又何嘗唔係來來去去都係打出打入呢?~"

一個故事

在那末晨光照射不到的後巷上, 春嬌遇上志明.

"小姐, 可唔可以借個火俾我?"

" 拿..."

"唔該~...
小姐妳俾個電話我丫, 等我聽日可以還番個火俾妳."

"你成日用呢招抄人牌架?"

"妳唔俾我真係還番個火俾妳既?!"

"挑...屎橋..."

" 若果我聽日真係剩係還番個火俾妳咁點先?!"

"你聽日見到我先講啦!!"

-----------------------------------------------------

是晚, 春嬌因為加班極盡疲憊, 而再到後巷打邊爐,
亦再遇上志明...

"sorry呀~ 我唔記得左聽日係假期, 所以提早而家還番個火俾妳."

"點還呀?!"

"妳...企後少少先."

志明緩緩行向垃圾桶, 燃點起早插滿在米缸上的'滴滴金',
火花四濺.

"妖...就咁咋?!" 春嬌嗤之以鼻.

"睇埋先啦~"

未幾, '滴滴金'的火屑燃起垃圾桶內的重型花火,
後巷頓時上演一幕微型的"幻彩fing噹噹".

"痴線架?!" 春嬌如是的想, 亦講埋出口.

"拿~ 我還番俾妳架喇...happy new year!"

志明轉身離開, 趕赴友人的倒數派對.

那一夜除夕, 對雙方都起了深邃的變化...

幾個故事

1) 佢係一個中學生, 就讀屋村學校,
經常與樓上樓下的同學仔聯袂到球場踢波,
踢完波, 成班同學就例牌去些粉買杯思樂冰打躉,
打躉期間, 佢見到一個師奶, 拎住幾袋重野行過,
佢有諗過駛唔駛上前幫手,
但成班同學響面前突然做D與別不同的事係會被人取笑的,
是故, 佢別個臉抓抓頭, 走入些粉飲多一杯.
師奶繼續拖著重甸甸的背心袋前行.

晚上, 佢如常同屋企人晚飯,
見到檯上有一尾奇撚怪怪的魚, 就問阿媽
"阿媽, 呢條咩野黎架?"
阿媽淡然的說:
"咪就係你今日晏晝見到我拎住果條石斑囉..."

2) 話說母校平平凡凡, 唯獨數學科成績斐然,
唔係因為老師教得好, 而係學生個個都非常好賭.
放學第一件事就係check下邊個屋企冇人,
然後就拉隊上去打麻將,
打到父母放工就走鬼.
因為俾阿媽見到一定打到開花.
賭檯上, 我們一直過得癲沛流離...

及後, 其中一個同學仔突然叫我地上去佢屋企打牌,

"好~幾點走鬼呀?"
"唔駛走鬼架喎...我阿媽都響度."

上到去, 佢阿媽不但冇屌鬼, 仲煮埋飯俾我地食...
我地百思不得其解, 就直接請教伯母點解會俾我地上去開檯.

伯母語重深長的說:
"我個仔帶你地返來, 至少我仲知佢同乜野人玩,
點都好過佢晚晚唔返然後響出面識埋d唔知乜野人丫~"

3) 一早起身, 阿媽就開始去街市頻撲.

買魚好定買雞好?
買魚啦, 阿仔鍾意食, 但今日d魚唔新鮮喎;
但阿仔上次食飯掂都冇掂過碟雞, 應該唔鍾意食啦...
都係買牛啦!
哎呀~ 成十二點架拿, 要返去煲湯喇.
煲乜野湯好? 青紅蘿蔔?
唔得唔得, 上星期先飲完...
花旗參瘦肉? 都好丫~ 佢呢排d尿咁黃...

一直忙一直忙, 去到新聞時段先可以稍息一下,
此時電話響起
"我今晚唔番黎食呀"........嘟..........

急症室的一夜

(ok...唔駛拍手住, 唔係我有事, 我只係跟車去的)

印象中應該係第一次去公營急症室,
嘩...真係亂過睇 "E.R." 喎...

- 一行入門口, 仲以為會有熱血醫生衝埋來問你邊度有事,
(當然, 我更希望衝埋黎果個係護士~)
點知係: "先生, 戴番個口罩先啦!"

- 插播
都係AV惹的禍, 個個都對護士有遐想,
實情呢...護士真係冇件好野!!
至少我識果d係咁~

某護士於泌尿科工作, 成日投訴俾d男病人食佢豆腐,

"嘩~ 咁你插尿喉果陣係咪會兜野捅入去男病人果度架?" 我問.
"咁又唔會, 會俾人投訴架! 但有時會 八支...八支半...咁樣, 佢仲痛苦呀!"

護士, 真係唔可以得罪的...
(插播完畢)

- 在急症室, 最慘的唔係等幾粒鐘見醫生, 而係煙癮起...
當晚仲要係橫風橫雨的十一月,
擔住把遮行幾條街先至可以離開醫院管轄範圍...
然後發現自己冇帶火機...

- 坐足幾粒鐘, 冇娛樂, 唯有焗住睇無線果套XX巨聲,
我第一次睇, 相信亦係最後一次睇,
真係唔明, 點解會有人追睇呢個節目...
睇人唱K有乜好睇?! 平時去蒲仲睇唔夠?!

- 肚餓, 但急症室冇啖好食, 只得一部零食機.
又唔收八達窿只收現銀.
死摷爛摷先搵夠四蚊碎銀.
好難得地買到包媽咪麵醫肚,
保安哥哥竟然又走埋黎: "先生, 戴番個口罩先啦!"
"戴住口罩點食野呀?! 又要我行幾條街出去門口食呀?!"

- 悶左成晚, 臨走先見到急症室的壓軸節目: 男女糾紛!!!

正呀~ 條女喊得勁淒涼要驗傷, 應該係扭親手腳之類啦,
真係我見猶憐, 成日都叫人唔好打女人架嘛~ 男人真仆街...

點知鏡頭一轉...
男事主徐徐下車 (當然係救護車!)
佢半邊頭俾個女人打到爆晒...

[半個故事] 從妳離開的一刻開始 二

previously on 從妳離開的一刻開始


"咦? 妳結婚呀?~"
男的試圖率先走出陰霾.
試問那個女人提起結婚會不高興?!

"我同佢...分開了..."

"噢......"
雖則當年女的下堂求去就是為了那個他,
男的理應予以竊笑一番.
但幼承家母之訓: '自己唔好, 都望人地好丫...'
聽到此等消息, 還是會無奈的.

與其講多錯多, 還是重回正題較穩當.
"我近排比較緊絀,
不如我先將份基金轉俾妳先啦, 其他我再諗辦法."

"哦...咁要咩野手續架?"

"唔駛手續...因為我係用妳個名買既..."

[半個故事] 從妳離開的一刻開始

"喂, 係我呀..."

"妳係邊個?"

"我...係你舊女友..."
就算曾經如何熟悉, 吐出這句還總帶兩分羞澀.

"哦? ...好耐冇見, 妳幾好嗎?"
男的被殺個措手不及, 只有一記盲拳的回應.

"你...記唔記得我地當年諗住結婚, 儲落果舊錢?
我近排屋企有D事, 想睇下你方唔方便..."

"記得...當然記得..."

自從那一天, 女的不辭而別, 人去樓空,
男的頓失所依, 只靠在戶口存款中找到僅有的安全感.

當年那是他唯一能夠掌握的事情.

憑著那小小的掌握, 男的寄情炒賣,
由 '9' 字頭的窩輪炒到 '65' 字頭的牛熊證.
贏過, 但輸得更多.

這些年來,
除卻剩下一層負資產西斜單位;
一輛猶如單輪驅動的低檔次房車;
以及一間僅夠胡鬧不夠糊口的納米公司之外,
就只有一份基金...

一個故事 - 罩

那年, SARS還未肆虐, 口罩還未成為風潮.
兩名港燦在剛通車的捷運上閒聊.

"喂, 你睇下, 對面戴住口罩果個男人...
幾得意, 佢個口罩上面印左個蘋果喎..."

友人沉默不語.

"喂~ 你睇唔睇到呀? 對面訓緊覺果個喎~
估唔到台灣D男人咁姣~ 會戴咁cutie既口罩出街."

良久, 友人終於按捺不住, 給他一個耳語:
"你望真D... 果個唔係蘋果來呀...你唔發覺個'蘋果'愈來愈大既咩?...
...你估佢訓左定死左丫拿?..."