j4jerk 解密系列2 - 預告

(WARNING...小弟私密珍貴手稿曝光...)
.
.
.
.
.
.
.
.
.
.
.
.
.
.
.
.
.
.
.
.


係咪好似小學生?
係, 我既草稿不嬲都係比較意識流的~~
下回再解.

很久不見~

呢排抱恙, 好耐冇UPDATE.
然後我CLICK下呢排個HIT RATE會唔會跌到負數,
點知仲多過平時有UPDATE果陣......=.=
(其實都只係講緊幾十至百零人~)

一個故事

小學六年級果一年,
我鍾意左一個女同學,
佢阿媽好早就死左, 老豆要返工,
後母又成日唔知去左邊,
屋企就成日得佢一個人,

咁有次問佢平時一個人響屋企有乜好做,
佢就話會自己同自己捉棋,

"象棋呀? 我識捉呀~"
"唔係呀, 係國際象棋呀..."

就係咁, 我即刻好努力咁去公共圖書館搵"國際象棋入門"自學
(果時仲未興上網),
然後每逢假期就會去佢屋企陪佢捉棋,
渡過好多個愉快而純情的下午~

其實我就係咁樣學識捉國際象棋的...

超短篇小故事

甲: "拿~ 我結婚果日就預左你地幾個做兄弟. 其餘幾個我唔太擔心,
唯獨有少少擔心你, 我怕你遠."

乙: "咩呀?? 邊關事呀?!......你D姊妹有冇咁勁呀?! 怕我會軟?!"

雜 絮

剩係講今日

- 一起身就睇波, CLIPPERS VS JAZZ,
clippers球員一如以往飛來飛去, 娛樂性極高,
但又繼續唔識羸波...

- 我一落街發現買唔到milk, 就知佢又送d古怪野...
原來係adidas筆記簿...
令我諗起細個puma文具曾經都紅極一時...

- 去買朋友的入伙禮物,
睇中左, 但問過幾間都冇存貨,
但聽日就要送, 咁點好?!
唯有連佢最後果件陳列品都照殺,
即場借條毛巾由頭抹到落尾先入盒.
仲借勢屈到佢俾discount我~ 嘩哈!

- love and other drugs
老土! 句號
(或者女性會覺得感人)
anne hathaway有大量裸露片段,
但早排已經上網睇過晒,
(外國竟然有人剩係盜錄呢幾場露點戲擺上網...)
連唯一亮點都冇埋...差d訓著.
不過部份對白都尚算精警.

微博小故事

一名男子帶同女友參加前度情人的婚禮,
合照時兩對共四人竟為企位而煩惱...
男子覺得企響新郎隔離比較恰當;
新娘卻又覺得男子應該企響自己隔離好D, 原因係:
"你俾你女友同D靚仔(新郎)影下相啦~"

男子恍然大悟, 曰:
"咁又係呀, 佢好耐都冇見過靚仔架喇...識左我之後."

j4jerk 解密系列1 - 一個J for Jerk的年代

與其等人爆, 不如自己爆.
當然, 爆左都唔會令我坐監的, 尋仇者可直接skip呢一篇~

首先, 要略略提下"一個 J for Jerk的年代"係點黎,
話說我細個果陣, 學英文係由A for Apple, B for Boy學起,
但而家入學前已經要先裝備好自己,
又要學定琴棋書畫, 又要做portfolio,
(有冇人諗過如果個小朋友咁勁仲點解要番學呢? 樣樣都響屋企學就得啦~)
入到去又發覺 A 已經唔係 for Apple,
變成 A for Astronaut, B for Billionaire,
呢個年代係去到咁恐怖, 返學已經冇樂趣可言.
簡而言之, "一個 J for Jerk的年代" 有個潛台詞, 叫悲劇~

好喇, 去到前排"新蚊"個專欄, 亦都沿用呢個名,
讓悲劇繼續延續, 分別只係由playground講到社會.

原本編輯叫我交張車頭相放上專欄,
我就諗住放一張扮韓寒懶憂鬱的玉照襯番個主題,
但為免浪費"新蚊"紙張包住嘔吐物,
最後都係用另一張cut頭cut尾的殘肢相.

後來編輯先生再叫我加一段文字介紹自己,
其實我係諗唔到點寫, 或者咁講, 係冇乜好寫,
我又唔係乜乜CEO, 又冇拎過十大傑青,
自我介紹得乜?
"生於十九XX年, 於二零幾幾年開始乜都冇做過..."咁樣?!

開始想歪路, 不如改歌詞啦.
就係咁, 我就用左一程車時間作左呢一段...

想平凡 / 怕大鑊 / 閒來無事最愛白撞
洗完頭 / 再直落 / 落銀龍獨對那凍檸樂
我冇街去冇得講 / A片今晚又再睇過
溝過我的得兩個 / 阿媽笑我涸過池塘

對, JACSO BLOG 果邊係打錯字的,
不過係一張jpg過, 我就懶得去改.

至於係改自邊首歌呢, 因為一直都冇人問,
所以應該冇乜人想知, 所以冇講~