是日金句

今朝睇見霍生上電視講:
"市民唔好誤會康體設施只係作嬉戲用途..."

咦?

喂!

但係你自己拎成個東亞運來嬉戲喎......

斑馬在線

近排生果報推行"sims"化, 將好多新聞轉成動畫,

案件重演一樣.

熱切期待佢將果d 茅山轉運案 又或 桃色糾紛案轉成動畫呀下!~

點解要咁生動呢?

或多或少都係因為新推出果個"壴斑馬"服務.

而家只要你拎住份實物報紙, 睇完段新聞就會見到下方有一個QR code,

就好似咁...

然後你用電話(有QR reader 果D) 對住佢嘟一嘟, 就可以連接上網睇埋段動畫.

我親身試左一次,

發覺

原來呢個服務係需要收費的...

咁...既然我部電話上得網, 咁我點解唔直接上去睇網上版, 而要拎住份實物再嘟佢呢?

仲要計我錢?!

最火起的是, 我係見有周秀娜先上壹斑馬架嘛...

但上到去又冇周秀娜download囉!!

妙想天開

收到bb100方面傳來內容為"妙想天開"徵文活動的email,
大意係寫下點樣從節省得來的月費來消費...
第一個感覺係:
"喂! 佛利民果d論文都係寫呢d咋喎!!"
ok...因佛利民之名, 我寫!

bb100以割喉價$99招客, 介紹兩個人入會仲可以免埋果$99,
搞到呢排msn list一個二個都係果句: 有冇人想申請寬頻?
拿~ 玩得呢個遊戲, 就個個都想成為免費果個.
咁, 個個都唔想俾錢, 到最後要俾錢果個就好似輸左一樣.

所以, 若然問我慳左果d錢可以點樣駛,
咁我會回饋番我d朋友 a.k.a 下線 a.k.a 輸家.

我實在唔忍心要我既朋友成為輸家...

是日廣告

何謂創作?
呢個都可謂夠晒正宗了~

來自法國的CANAL+

急症室的一夜

(ok...唔駛拍手住, 唔係我有事, 我只係跟車去的)

印象中應該係第一次去公營急症室,
嘩...真係亂過睇 "E.R." 喎...

- 一行入門口, 仲以為會有熱血醫生衝埋來問你邊度有事,
(當然, 我更希望衝埋黎果個係護士~)
點知係: "先生, 戴番個口罩先啦!"

- 插播
都係AV惹的禍, 個個都對護士有遐想,
實情呢...護士真係冇件好野!!
至少我識果d係咁~

某護士於泌尿科工作, 成日投訴俾d男病人食佢豆腐,

"嘩~ 咁你插尿喉果陣係咪會兜野捅入去男病人果度架?" 我問.
"咁又唔會, 會俾人投訴架! 但有時會 八支...八支半...咁樣, 佢仲痛苦呀!"

護士, 真係唔可以得罪的...
(插播完畢)

- 在急症室, 最慘的唔係等幾粒鐘見醫生, 而係煙癮起...
當晚仲要係橫風橫雨的十一月,
擔住把遮行幾條街先至可以離開醫院管轄範圍...
然後發現自己冇帶火機...

- 坐足幾粒鐘, 冇娛樂, 唯有焗住睇無線果套XX巨聲,
我第一次睇, 相信亦係最後一次睇,
真係唔明, 點解會有人追睇呢個節目...
睇人唱K有乜好睇?! 平時去蒲仲睇唔夠?!

- 肚餓, 但急症室冇啖好食, 只得一部零食機.
又唔收八達窿只收現銀.
死摷爛摷先搵夠四蚊碎銀.
好難得地買到包媽咪麵醫肚,
保安哥哥竟然又走埋黎: "先生, 戴番個口罩先啦!"
"戴住口罩點食野呀?! 又要我行幾條街出去門口食呀?!"

- 悶左成晚, 臨走先見到急症室的壓軸節目: 男女糾紛!!!

正呀~ 條女喊得勁淒涼要驗傷, 應該係扭親手腳之類啦,
真係我見猶憐, 成日都叫人唔好打女人架嘛~ 男人真仆街...

點知鏡頭一轉...
男事主徐徐下車 (當然係救護車!)
佢半邊頭俾個女人打到爆晒...

雜 絮

- 九龍風水傳

都話風水術數應該列入中學必修課程架啦!

搵到錢又搵到食, 唔駛再愁年青人就業問題.

果D乜乜剪翅計劃可以摺埋咯.

睇風水果個可以有幾十億身家;

識茅山果個又可以九淺一深幫人開運;

而家仲有寵物問米...仲有個好型既名叫寵物傳心師!!

傳心喎......存心___咋?!

其實我都係死物傳心師, 大家以後唔見左電話呀, 遙控呀, 底褲呀都可以搵我,

我會用傳心術幫你搵搵:

"佢而家響一個好黑既地方... 佢好驚...

不過佢叫你唔駛擔心... 佢會遲d番... 唔駛煮佢飯..."

- 俄 女

俄鋁個主席 Oleg Deripaska 因為背景 "有D野" 而拎唔到美國簽證,

嚇到高盛宣佈退出上市保薦, 可能響香港上唔到市.

但呀主席向各大小股民派定心丸, 話自己身家清白, 仲話普京可以做證!!

喂大佬...你講完我仲驚喎...

即係等於克林頓搵貝盧斯科尼證明佢唔鹹濕; 又或

特首好有心推行民主進程: "唔信你問下我個 friend 金正日~"

- being charlie kaufman!

搵足一年都搵唔到 Charlie Kaufman 導演果套 "Synecdoche, New York" DVD,

點知, 佢忽然響下個月香港上畫!!!

BTW, 香港版的 poster 醜到喊...

- being michel gondry!!

講開 Charlie Kaufman 就順手講埋 Michel Gondry,

黎緊法國電影節有佢的 "the thorn in the heart",

但小心地雷, 係紀錄片來的...

- ok...又來...壞品味時間

「你好，我係Karen，我有心事... ... 」
「真case嚟㗎﹗」
「我知係真，等我又搵啲心事寫信俾你。」
「好呀，署名仆街丫。」
「我諗住搵個有型啲嘅名喎。」
「變型金剛？」
「Thomas金剛﹗」
「Thomas金剛，你有咩心事？」
「我同女人合唔到體，點算好？」
「係咪因為你搵錯福娃呀？」
「係福娃又唔錯，有得5P。」
「咁你係咪搵錯Megan Fox呀？人哋咁索，睬你有味。」
「有乜理由？﹗我咁靚仔﹗﹗」
「火車頭金剛身，好kai囉。」
「不知幾多女冧我個頭﹗﹗﹗」
「我諗你換個忍者龜頭好啲... ... 」
「呢期緊係興小飛柒啦～～」

婚紗背後

第一次參與婚紗展,
(唔駛恭喜我...我只係去做野...)

- 真係男人地獄來的!
未入墳墓先落地獄, 哪來的道理?!
故此, 強烈建議展方增設男仕休息抽煙區!
橫豎都係死, 食埋支煙先嘛!

- 入得場的情侶都擁有非比尋常的消費力.
而又, 若果想做得成生意, 記得唔好sell俾錢果個 (即係男人),
集中火力攻擊女方就可以了~

- 跟據非正式統計, 場內七成女性把口係冇停過;
而七成男士個樣都好似被雞姦的一樣...

- 其實我一直都分唔清外地同本地影的婚紗相有乜野分別...
除左貴一截之外...

- 香港好鬼細的又一事例:
路過一檔正播放婚宴錄像的, 看得入神,
睇睇下...
"咦?! 呢個咪阿堅?! 佢幾時結婚架?!"