他看戲也一個人看 backup (2008)

2008年12月18日星期四

鹹 cult 

早幾日睇報紙, 訪問一個cult片狂熱者.

佢閒時既其中一項活動, 就係去果d'老友鬼鬼全日任睇'既戲院睇下有冇鹹鹹地既cult片來睇.

睇完訪問我就自行回帶諗下有冇睇過類似的"鹹cult",

醒起當年睇過的一齣:

故事講述女主角到郊外遇到強暴,

講完.

重點唔係劇情, 而係男主角,

係一隻猩猩.

而果隻猩猩, 又好明顯地係人扮的...

更吹漲既係, 果隻猩猩笠住頭套都交足戲,

又不停咁"胡~~胡~~胡~~"而唔係"噢~~噢~~噢~~"

高潮時仲要手鎚心口...

睇到 O 晒咀.

畫面就好似你細個睇劉華版本既神鵰俠侶咁,

見到果隻假到唔恨既鵰, 拍晒翼咁走去搞呀小龍女咁...

如果一心諗住睇鹹片的話,

大概已嚇到不舉了吧.

2008年10月29日星期三

我瀆電影 

好多時果Ｄ乜乜物物電影節完場之後都會有座談會,

每到發問環節時, 都總會有幾位觀眾會以呢句做開場白:

"我係讀電影既..."

我唔係妒忌人地讀電影(在香港地亦唔太需要妒忌吧~);

我亦唔係介意佢連基本禮貌的"你好"又或"hello"都欠奉.

只係, 我實在唔明,

你加左呢句, 對你之後既提問有咩野影響呢?

.

"呀...我係讀電影既, 我想問呢點解女主角除衫果陣冇露點呀?"

同

"呀...我係電車男觀眾, 我想問呢點解女主角除衫果陣冇露點呀?"

有乜分別?!

你條問題係戇鳩的話, 以為加句"我係讀電影既"就變得有說服力?!

抑或, 呢句說話其實唔係同導演講, 而係同觀眾講:

"我讀電影架, 好型架~ 識乜春丫你地~~"

okok, 你讀電影唔緊要, 問埋d戇鳩問題都算喇,

但,

可唔可以唔好霸住個mic?

點解個個自稱讀電影都咁鍾意霸mic??

2008年4月6日星期日

電影節速報四 

(係...仲有的...)

賊兄弟連環劫 before the devil knows yor're dead -

一個老掉牙的戲軌, 但佢出色既講故事手法, 又令我乖乖的不敢離座...

philip seymour hoffman亦應記一功.

差館大佬 chaos -

老老實實, 真係第一次睇埃及片.

非常有趣的一次體驗, 非筆墨所能形容,我唔覺得套戲好睇, 但又睇得好開心~因為套戲係非常, 非常之老套.老套到如果唔係男主角係咁用手提電話, 我仲以為自己睇緊"雷雨"...

例如...(識做既可以跟住一齊做~~很好玩的)女主角見到男主角響屋外行過, 係會先挺胸輕倚窗台, 然後三百六十度轉身轉出門口, 先去搵男主角吹水...

又例如, 當女主角俾老母串果陣, 係一定會扭住條裙, 大發嬌嗔: "e~~~阿媽呀~~妳笑人既~~" (若果佢識講中文就一定會加多句: "妳都冇解既~~")

又又例如, 當所有人一聽到壞消息, 首先會瞪大隻眼, 再壞的就會掩住個口啦,欲語無言, 跟住就會響起果d好sad既音樂 (仲唔係雷雨?!)

再再例如, 當女主角被人污辱果陣, 鏡頭即刻pan去佢隻手果度, 開頭一定係掙扎, 跟住就鍊住張床單, 然後漸漸無力...咁就完成左場強姦戲架喇, 如果呢個時候床頭有對fing頭公仔就更加一絕了~

(你唔係以為埃及片會有床上戲俾你睇呀?! 有親咀鏡頭已經很破格的了~)

電影節速報三 

Once 一奏傾情 -

或者有人會嫌佢D歌太過大路, 與賣唱人身份不符.

但拍戲既野, 好睇就得啦!

男主角出奇地討好呀下~

it's hard to be nice 好人難做 -

套戲頭粒幾鐘都係講個男主角 點樣去做好人, 點樣改變生活,

'真情'一樣, 大賣廉價溫情, 悶到想離場.

點知成套戲既精華盡在最後15分鐘...

唔算好好, 叫做好過冇~

the ten 玩十誡 -

戲如其名, 真係拎十誡來玩, 耶教徒勿看.

但玩得好唔好呢? 有點眼高手低囉.

導演有心將每個故事玩得有咁低俗得咁低俗, 全場充滿低級趣味.

但都講過, 香港人好鍾意睇呢d屎尿屁, 所以全場其實反應不俗.

尤其我身後果位女仕, 每見任何場口有少少鹽花即笑不攏咀...

好似十年冇聽過鹹濕笑話一樣...定係十年冇俾男人掂過? 唔係邊有咁好反應?!

電影節速報二 

收視大騎劫　reclaim your brain -

捱左幾日終於睇番齣似樣的.

故事講一個專拍低能節目既監製, 意外之後良心發現, 改拍一d有深度既節目, 點知收視直線插水.

佢開頭質疑呢個收視調查機制, 到後來愈玩愈大, 直頭用科技去改變調查結果, 企圖改變整個城市既精神面貌.

其實呢套戲好適合香港人睇, 但諷刺既係, 香港人都係比較鍾意睇垃圾(你睇下無線~),

呢類帶批判性既黑色喜劇 (係, 喜劇來的, 竟然~) 往往都係慘淡收場.

睇呢套戲就好似睇林奕華果d舞台劇一樣, 睇果陣可能好開心, 但散場之後就涼上心頭, 因為開始分唔清究竟係你笑套劇, 定係套劇笑緊你.

電易節速報 

全然大丈夫 -

個頭開得唔錯, 可惜無以為繼, 後段拖得就拖, 拖到爛晒.

PLOY -

坦白講, 我唔係好知佢做緊乜...最尾唱歌果一段我仲忍唔住笑...

O先生 -

呢套我知佢做乜, 但, 唔好睇囉...成套戲只係令男主角過足召妓癮...

2008年4月1日星期二

爛片指數 

當我郁身郁勢, 猶如生痔瘡咁樣, 扣一分.

當我望錶, 扣一分, 之後每次望錶再扣半分.

當我中途可以捨棄劇情上廁所, 扣兩分

當我中途可以捨棄劇情行出門口煲煙, 扣四分. 在華懋戲院卻不受此限, 因為可以直接響裡面煲.

當我開始摸同行女伴的大腿, 扣三分; 男伴的話, 扣夠十分.

當我開始欣賞走廊上的美麗小腿在伸縮, 扣兩分. 完場後可以拎到對方電話號碼的話, 扣少一分.

當我肆無忌憚咁食d好嘈既野, 如薯片, 老麥, 扣一分;

食叉燒飯不扣分, 大概我當然已瀕臨餓死, 做個好心吧~ (唔好以為好荒謬, 我真係試過...)

相反, 當我好似石像一樣, 如老僧入定, 反加兩分.

如女伴靚的話, 加一分; 唔靚唔緊要, 夠靜的話都可以加半分.

全場冇電話響過, 加兩分.

全場冇人當正自己睇緊無線, 高聲討論劇情, 加一分.

睇credit的話, 加一點五分, 因為唔好睇的話係唔會睇credit的.

壞品味系列 - 永遠站在雞蛋的一方

究竟, 係邊個發明呢舊野架呢?
係咪村上春樹?!


- 你話: "唔駛用手喎~"
平時開雞蛋同一隻手 (ok, 有d人用兩隻手),
而家用呢舊野開蛋咪又係用同一隻手......


- 你話: "咁唔駛整污漕隻手丫嘛!~"
ok...... 咁你清洗呢舊野果陣是用腳的嗎...??


- 我相信雞蛋會覺得好光榮,
竟然有人發現呢舊野來將佢處死~


- 至於成效如何呢? 可以睇片

懸 紅

(其實, 我係比好多人更加支持香港電影)


讚:
- 以導演第一次拍長片來講, 其實頗為impressive.
- 又第一次做導演及編劇黎講, 選擇近年本地已冇乜人拍的黑色喜劇來拍, 都真係好夠膽.
- 戲內的美術其實很不俗 (雖則場景大部份都係環繞在酒店內)
- 我唔會話薜海琪既演出係突破, 但佢明抄"新紮師妹"果隻方法其實好適合佢.
 - 不得不提萬梓良, 胡鬧又好, 感情又好, 都交足戲.
簡直係繼"peter朱"之後又一傑作, (原來)佢真係好有喜劇細胞. 


彈:
- impressive, 只限前半, 後半段其實明顯睇得出力不從心, 而轉折位亦太過突兀.
- 戲份過份集中於三個主角身上, 浪費了其他演員, 包括葛民輝及飾演反派的張晉.
- 大量對白中英夾雜, 我其實到而家都唔係好明點解要咁做... 表明這是港式電影嗎?
- 戲內有神秘人物壓軸登場, 理應係高潮, 但我覺得頗為反高潮的說...=.=
(大概是遷就內地市場了吧...)


btw, 戲內的萬梓良重演"so what?!"呢句對白,
好多人以為係來自"吹 what?!",
但其實呢句當年膾炙人口的經典, 其實係出自呢度:
(相關對白請自行飛到 5:29)

公 告 - 有關電影

小弟於本blog記錄的所有有關電影的post,
已經被我錯手 delete 晒.

有補救方法的話可email通知我.
謝謝~

一個故事 - 來回地獄又折返人間

落地獄的滋味是怎樣的?

只要在公司吊煙癮, 然後搭電梯企圖俯衝落樓下果陣就知了.
冇錯, 係企圖. 因為電梯永遠在你趕時間的時間站站停,
你只得仰望那冷冰冰的跳字屏逐步把你拉進深淵.


18...... 17...... 16...... 15...... 叮!
我整你個掣咩?! 又停? 我已經揀非繁忙時間先搭lift架喇喎!


門就在15樓緩緩打開, 我就像龍婆一樣企響死角位怒目望向門外的人...
的確, 這是我當時唯一可以做的動作.
而唯一能夠改變這個動作的人, 正正就係門外果個, 因為, 是靚女來的!


我倆四目交投, 良久說不出話來,
不過浪漫的情節沒有接著發生, 取而代之的是相互的同一句對白:
"點解你會響度架?!"


門外的, 正是中學時代的女班長, 又或稱: 校花.
由於品學兼優兼樣子標緻, 當年的一眾裙下之臣無不被其狂風掃落葉式裙腳掃中,
我等咖呢啡當然連腳眼都掂唔到, 只能夠被吹到汕尾以南細數落葉.
不久之後, 校花更被某校草私有化, 從此消聲匿跡做其少奶奶,
一代傳奇告終,
裙下之臣亦各自回歸平淡,
回到現實繼續跟豬扒搏鬥.


眨眼間一別數年, 又回到眼前, 校花風釆依然.
就算在得知她已成為兩子之母之後, 女神地位仍絲毫未有動搖!


"點解妳會黎呢度?"


"我黎睇醫生呀, 有病就要睇醫生架啦~" 我對她的笑靨依然沒有抵抗力, 那管她是抱病, 電力絲毫不減.


"15樓有醫生架咩? 我日日響度返工都唔知原來有得睇醫生..."


"你咁忙點會知丫... 出面落緊雨, 你做乜唔帶遮呀?" 
好喇下, 連關心都出埋, 就黎被電到腳軟.


"erm... 我只係落去食煙之嘛......"
我竟然因為承認自己抽煙而感到難為情, 佢果然係女班長!


門, 再度打開, 縱然, 我其實有點想'困lift'.


"咁大雨不如我遮妳去地鐵站啦?"


"傻豬, 你都冇遮, 點遮我去地鐵站呀? 我自己行過去得喇~" 
我差點就跪低.


望著那豐腴的臀部一點一點地縮小,
我點起煙, 抖擻一下,
雙手卻忍不住顫抖.


15樓, 其實是某社福機構的辦事處,
專門處理受家庭問題或虐待婦女的個案,
以及提供精神治療.
我怎會不知?!


地獄的滋味是怎樣的?

無聲吶喊 (silenced)

好震撼的一齣電影, 散場後久久未能話語.

故事改篇自真人真事, 講述一名教師到聾啞學校任教,

不幸揭發學生原來一直被教職員虐打及性侵犯,

但因為先天缺憾而無法同人講, 亦冇人理.

教師從而挺身而出告上法庭.

整套戲的重點, 不在橋段抑或拍攝手法, 而在動機.

電影在2011年韓國本土上畫時, 同時在舉行簽名運動,

目的是希望將案中的各個被告繩之於法, 

亦希望大眾關注韓國政府法例上對兒童的保護是否足夠.

結果, 因為呢套戲引起重大迴響, 

案件需發還重審, 政府亦對兒童性罪行的執法進行修訂.

好一次的用腳去投票, 買飛入場睇戲原來可以改變世界~

電影好看嗎? 是好的. 

但就係因為好睇, 就更令人覺得心寒.

縱使情節上明顯經過加工, 但最駭人的橋段偏偏就是最赤裸的現實.

中國內地近年經常出現民眾上訪申冤活動, 

其實好應該, 亦好適合依樣畫葫蘆拍番套~

是日對話

某女好日都唔打電話來, 某日電話響起, 我已心知不妙.

“我想問你做喜帖既野呀...“

 “估到啦~ 問啦。“

 “我諗左好耐都未諗到點做張帖, 因為我想張帖可以循環再用“ 

“哦?! 原來妳都預左自己會嫁幾次架? 有先見之明呀妳~~“

 “你個仆...... 我意思係想張帖有其他功能, 唔駛睇完就掉咋!!“