矮 油

唔知點解, 我成日會俾d本身得5呎高既人話我矮...
(冇錯, 係唔止一個!!)
即係又要岳高頭同我講野, 但態度又輕蔑, 想點先?
咁你同一路食junk food一路話人肥的死肥仔有乜分別?!

我知我唔係高, 但未至於係大家口中果隻矮下話?!?!

ok~ 想講既其實唔係呢樣, 其實我想講近排在某場合遇到一女子,
佢竟然 高!過!我!
真係好耐未試過在籃球場以外岳高頭同女性講野~

而佢既最大功德, 就係即場醫番好我既寒背囉...

關於肌肉, 我說的其實是...

- 關於早前"果張相", 睇落好似好勁, 但其實唔係, 只係燈光造成的錯覺.
(你而家明白點解健身中心經常都欠交電費似的了吧)
入到更衣室, 我通常都係最奀果個.

- 而我亦唔係第一次 post 疑似肉照, 有睇我舊 blog 的話, 可能見過有一張相,
有條傻仔響度扮飛的偽術照, 那個模特, 也是我~
實情那張藝術照係幫一位藝術系的朋友拍的, 當時, 佢急住交功課,
而我, 又咁0岩佢響佢屋企食緊飯...=.=

- 肌肉有分好睇或者好用, 如果想要好睇, 練法會唔同, 亦都不少不免要飲奶粉.
但我一直練的, 只是好用.
如果唔係我而家應該著緊XXL衫.

- 如果覺得好睇同好用太虛無, 有兩個例子可供比較: 羅仲謙同埋C.朗拿度.
只要拍埋佢兩個張相一睇就知有乜分別的了.

- 讀書時期, 有一日轉堂果陣揭著圖書館借來的電影雙週刊, 見到一幅港產片劇照,
看傻了眼, 嘆出一句: "嘩咁勁既?!"
當時鄰座的一名肥仔望一望張劇照, 狀甚不屑的說: "好勁咩?! 你都得架!"
那套港產片叫"古惑女", 我們一起望著女主角莫文蔚的腹肌.

- 單憑一句"你都得架!", 在沒有甚麼有血有淚的情節之下, 輕輕鬆鬆的,
三個月之後我練好了腹肌.

- 好多人以為腹肌好難練, 但其實只要本身冇肚腩, 腹肌近乎係上半身最易練的一組肌肉.

- 無論你打波又好, 游水又好, 只要見到有成績就會引到你繼續玩落去.
而由於小弟膊頭天生偏窄, 導致頭大身細, 日日返學好似隻企鵝咁.
為左睇落個頭唔好再咁大, 所以, 第二階段就集中去練膊頭.

- 而我從來都唔信食藥減肥呢樣野.
因為, 冇一樣藥會比運動有效.
而運動, 係唔需要下下都做到死去活來, 持之以恆更加重要.

- 身材瘦弱, 在球場上卻變成肥美的豬肉, 每一個對手都想在你身上得到甜頭.
所以我從來都係最受歡迎果一位, 簡宜就係球場上的伊拉克, 經常成為重擊目標!
在無數次俾人撞到飛出街之後, 又再痛定思痛, 決心要令頸以下肌肉加厚.
如此這般, 這就是之前所講要"好用"的原因.

- 但我背脊其實到而家都係日用衛生巾咁薄, 因為冇乜機會用到...

- 鄰座的肥仔一直以來算係我半個私人健身教練, 尤其在自由搏擊方面~(!!)
謹此鳴謝!~

- 但很抱歉, 我冇資格做呢個"人生教練",
因為我的身型從未為我帶來任何艷遇......
who fucking cares??~

一個故事 - 入急症室如何撳緊急掣

麻將檯上, 幾個人面對門前的十三粒石頭而各自惆悵, 卻又碎碎唸起來.

東位率先打出一隻東, 很極端的打法.
早段就打番子, 是大牌來嗎?
"呀... 你地有冇去過急症室? 我上次去, 等到我訓著都未輪到我...點解次次都要等咁耐??"

南位隨後摸上一隻牌, 左攝右攝一輪之後, 還是覺得入不了章, 只得打掉.
"想快? 好易之嘛, 我果次同人打交, 只要去到門口作勢再打一場,
警員怕我地騷擾到其他人, 就立即叫我地入大房, 都唔駛排隊~"
說時手指還在吊著牌子不放, 太優柔寡斷了吧?!

"係咩?! 碰!!"
老謀深算的西位早已謀著那隻不捨的四筒,
"有次朋友扭傷腳, 我陪佢搭的士去急症室, 落的士之後, 我嫌佢扭親腳行得慢,
就索性抱起佢成個人, 打算行入急症室先放底佢.
點知一入到去我連凳都未望到, 職員就如臨大敵一樣,
飛撲一張輪椅過來, 再直接推佢入去睇症,
等都唔駛等, 連手續都係事後先補番."

"其實呢......" 一直默不作聲默默在造牌的北位終於開聲:
"只要你行入去同姑娘講心口好痛, 因為心口痛可大可小, 通常都會有得優先......
......食糊, 自摸三番!~ 所以你地話, 邊駛做咁多大龍鳳呢?!"

(本故事純屬虛構, 後果自負, 請勿以身試法, 亦應當讓真正有需要人仕使用急症室)

完全兄弟手冊

唔知由幾時開始, 親朋結婚要做兄弟的話,
已經唔係當日帶個人出席就可以.
仲要襯埋衫...
做姊妹都話有姊妹裙贊助,
做兄弟就通常都只係條 tie 獲得贊助.

我明白, 做兄弟唔應該咁多聲氣,
畢竟, 結婚去送死果個又唔係我~
但你要d兄弟著同一隻色制服, 都係想好好睇睇之嘛,
咁點解又要買埋d粉紅色既bow-tie要我地戴呢?!
粉紅色本身唔係問題, 如果係shocking pink我絕對carry得到,
奈何粉紅色其實又有好多種,
好買唔買你買最cheap果隻粉紅就出事了,
仲要係花園街賣緊十蚊三條果隻底褲果隻粉 . 紅 . 色!!!

迎親那天, 當我從你手上接過那枚摺摷了的底褲過後, 忍不住問:
"你俾我地聞架?!"

-------------------------------------------------------------------------

要 (政治正確點說, 是逼!) d兄弟戴bow-tie, 某程度上都係想浮誇,
但唔一定要攪到大家核核突突先叫浮誇呀嘛.

所以, 在另一位朋友大婚之時, 我呢位兄弟膽粗粗毛遂自薦,
希望佢將兄弟們的衣著事頂, 全交托俾我!
(咁姊妹衣著呢? 噢, 呢樣我就無能為力, 因為我一定只會叫妳地最好乜都唔好著)
唔係因為我對時裝有甚麼觸角,
只係我唔希望果日去買些粉買煙都俾人指住黎笑!!

由於兄弟高矮肥瘦各有不同,
總不能要求每個人都可以著到 Ryan Gosling 一樣,
所以, 外套盡量選擇平實得來帶點 details 的款式.
底線是, 我唔會令大家變成酒樓部長!!

攪定外套以後, 就著手去搵bow-tie,
市面上, bow-tie大致分兩類,
就係平同貴 (!!)
我地冇份選亦冇份做特首, 冇乜必要買咁貴;
但平果d又大多粉色, 又唔夠挺......
幸好, 這世界, 還有就黎連棺材都有得賣的--淘寶!

真係唔好睇少淘寶, 款式多價錢平, 仲要有質量,
訂左一款銀色撞銀線暗花, 都只係$30港幣,
唯一要彈係個扣口位同襯衫唔多襯, 不過俾我用模型油掃兩掃已經唔再係問題~

之後, 預想圖, 大家行出黎大致會係咁:

**特別鳴謝模特兒甲**

雜 絮 - 有關利是

每年拆利是的時候, 

總會選出red pocket of the year,

今年得主係呢個(!!)

得獎原因有二:

1) 今年係龍年, 而佢堅持用小雞雞做cover image, 勇氣可嘉.

2) 當幼稚園都印利是封拉客, 醫院還會遠嘛?

聞名不如見面, 

終於親身見識到這個詭異的五百蚊.

而我收到後的第一件事, 係想搵原子筆幫佢易容......

(唔好屌住, 我唔係富二代, 冇咁多銀紙擺上網晒, 呢疊只係廿蚊同五十蚊紙)

其實我每年都好懶拆利是,

就算拆左都係餅落櫃桶底,

餅下餅下就儲落一大疊廿蚊...

而我想講一個故事, 

對上一次清櫃桶係2006年,

當時我將櫃桶內的錢拎晒去找換店,

唱晒做yen...

因為條數足夠我去玩一轉日本...

今日, 我對住呢疊廿蚊, 

我打算拎去換歐羅...

句號~

林書豪現象

對上一個禮拜, 有兩個中文名突然引起了國際關注,

一個叫王立軍; 另一個, 叫林書豪.

對於林書豪的背景, 可到小弟的舊文睇睇 (不過唔係咁詳盡), 不贅.

想講的, 只係佢近期爆出所帶來的現象.

- 大量華文媒體主動將佢認祖歸宗,

但佢明明就係土生土長的美國人, 連中文都唔太識講.

(btw, 易建聯其實能操流利的廣東話, 但who fucking cares~)

就算認, 佢其實係台灣人.

- 美國傳媒亦大肆報導, 但用詞就好小心~

將佢形容為

"Lin, the first American-born NBA player of Chinese or Taiwanese descent"

即係點呢? 

(官腔mode): 咳咳...基於一個中國的原則, 台灣是中國不可或缺的一部份,

台灣所有後裔都只應該是chinese descent~

當然美國佬只係扮傻唔識分.

- 又其實, NBA每隔幾年就會彈出一件名不經傳的球員,

類似情況其實已出現過在 

ronald murray, tayshaun prince, 甚至issac austin等一干球員身上 

只係今日呢件係華人, 所以大家比較驚訝.

- 林書豪突然令一大堆人開始留意籃球, 係好事,

但當中有一小堆 glory hunters 就難免令人搖頭.

正如我成日都話, 唔識, 唔緊要,

唔識, 但又扮識, 就罪大惡極~

你連佢勁在哪裡都講唔出就走來同我面前扮睇左好耐, 仲要扮分析,

我會俾個膠你囉~

壞品味系列 - Brian Scalabrine

如果你認為所有職業籃球員都係michael jordan一樣左飛右扣,
帶住個波四圍飄,
咁, 就錯了~
世上任何一個界別都有次貨,
所以你都唔駛咁傷心 (!)...

由邊度講起呢? 就由佢個外形講起:

體形超重
白人
紅髮 (冇錯~ 紅髮係問題, 你試下去數三個紅髮球星, 有排你數都未數到呀!)
不合身的球衣
橫睇豎睇都係似肥皂劇演員多過職業運動員.

亦因為技術問題, 佢近年亦長期成為 bench warmer,
(註: bench warmer 即係由開場坐到散場, 全程都係負責坐暖張凳冇得出場)
但佢冇放棄過任何機會, 總有辦法吸引攝影機注意,
用佢諧趣既外型, 加上浮誇的肢體動作,
真正在後備席上上演一幕又一幕肥皂劇. (多數是fing毛巾~)

又係 andy warhol 果句: 每個人都有15分鐘成名機會,
籃球比賽有時未完場就會出現極大分距 (例如 100:70),
臨完場對賽果又唔會有影響的最後幾分鐘就會稱為 garbage time,
咁, 呢幾分鐘, 通常就會成為佢既成名機會.

佢每次落場, 總會令到全場球迷起哄,
就好似見到史前生物一樣大呼小叫.
甚至幫佢改左個綽號叫"white mamba" (因為世界級球星 kobe bryant 叫做  black mamba...)
佢亦樂於成為三分鐘名人,
每次都好努力去娛樂球迷 (或被娛樂)~

而機會, 總留俾有準備的人,
這名超級吉祥物在上星期入左球咁既波...


其實呢個係一個勵志故事~!