年宵快訊

好快咁"立"過下今年的年宵賣緊乜......

- 依然有好多人賣自己設計的吹氣產品...
其實, 吹氣野已經唔係好興...
咁你堅持要賣都冇問題,
不過唔該就花多少少心思響個設計上面,
眼見好多都真係好求其好醜樣...
你叫我點好意思買得落手拎住周街行?

- 呢兩年愈來愈多所謂的"暖手咕臣",
而今年係玩食字的"龍友相機",
造型尚算可以, 但顏色就真係核鬼突......

- 往年大熱的華叔揮春自華叔仙遊之後以為無以為繼,
點知今年原來由余若薇頂上, $20一張, 好撚抵~
但更精彩的是在檔前sell客的陳淑莊!
其non-stop式叫陣絕對回復當年 "東宮西宮" 神彩,
有時間而又唔逼人 (而佢又響度) 的話值得留低睇睇, 正過棟篤笑~

- 而在眾多自製產品之中, 呢件真係不禁令我拎錢出黎:

雖則佢比較適合二月先拎出黎賣,
但我真係俾佢地既心思雷到,
上面每粒字都真係有諗過度過,
(頂頂果行 "正面.投入" 真係令我笑左)
artwork亦都合格以上,
(照抄都會核突的嗎? 絕對會! 例如某檔就自製銀紙咕臣, 其核突程度拍得住陰司紙!)
不過若果賦予更多功能俾佢的話就更好,
亦可以賣得貴d.

未過年先送禮- 後記

- 其實有點感動, 因為反應確係比預期熱烈.

- 我都明白所送出的影碟部份係幾冷門, 有D仲要係二手,

所以搵到好人家收留佢地其實都咪話唔意外.

- 其中一位朋友提及, 

send email 俾一個陌生人去索取禮物係一件好"outrageous"的事,

我想講, 我送禮物, 本身又何嘗唔係一件極之"outrageous"的事呢?!~

所以, 唔駛太介懷, 因為冇乜幾可~ 哈.

- 原本我係諗住每位都寫張紙條仔多謝佢,

但早幾日見到王迪詩以同樣舉動去sell書,

成件事立即變得好膠, 所以就打住了.

- 亦因為近來太忙的關係, 冇時間逐隻包,

只係買左一堆公文袋隊晒入去就寄 (仲可能會入錯),

所以, 覺得好核突的朋友.........

就請繼續覺得核突吧!

- 當中, 每一位都需要留地址俾我寄貨, 

而有部份朋友都選擇提供屋企地址 (!!),

證明佢地都好信得我過, 相信我唔係變態連環殺手......
.
.
.
等我攝塊刀片入去先~!

未過年先送禮大行動 (已完)

(活動已完, 多謝~)

為左要迎接新貨抵港, 過年前就執一執個櫃,

發現有d睇完已經唔會翻睇,

又有d根本冇時間睇既碟,

新碟太多, 時間太少,

橫豎都係掉, 倒不如贈予有緣人,

唔嫌棄的話即管出聲,

識唔識我的一樣可以參與.

有興趣的可到小弟微博留言,

冇微博的話直接 email 到 j4jerk@gmail.com 亦可. (email 有喇卦?!)

放心, 費用全免, 包埋本地郵費 (外國的話我會擺落 dropbox 又或扮寄失~), 

講聲多謝就可以了.

不過唔包親筆簽名相囉~~~

dvd

- copying beethoven貝多芬未緣曲 (new)  己送

- 天邊一朵雲 (new)

- 2 days in paris 巴黎愛漫遊 (used)  己送

- diary of a sex addict  色迷 . 謎 (used)

- mein fuhrer 玩謝希特拉 (new)  己送

- black ice 誰和誰和誰有路 (new) [p.s. 呢套有點唔捨得, 但我又其實一早入場睇左...]  己送

- saw v 恐懼鬥室5 (used)  己送

- i'm not there 七人一個bob dylan (new)  己送

vcd

- 太陽雨 (new)  己送

- the double life of veronique 兩生花 (new) [p.s. 冇錯, 就係奇斯洛夫斯基果套]  已送

- the prestige 死亡魔法 (new)  己送

- tsotsi 真心無戾 (used)  己送

- 唐狗與北京狗 & 青梅竹馬 (used) [p.s. 黃精甫未紅前拍的短片, 而家市面應該好難搵到]

- snake on a plane 毒蛇嚇機 (used)

- 21 gram xxx生命有多重 (used)  己送

- gi li gu lu 搵食男女 [p.s. 胡恩威x林奕華]  己送

- millions 億萬少年 (used) [即係 danny boyle 最低潮果陣拍果套]

- in this world 阿富汗少年冷酷異境 (used)

一個故事 - 乾杯

廿五歲前, 她過的生活與一般OL無異,
悶著上班, 悶到下班, 目光只放在晚上一個又一個的朋友聚會,
盡情認識新朋友, 舉杯暢飲直至酩酊大醉.
醒來後跟不知姓甚名誰的男生道別後又是一名良家婦女.

那年頭, 只要不太甩皮甩骨, 總不愁寂寞.

在如常的一個夜晚, 如常的一個包廂, 她正準備如常的醉生夢死,
刻意坐到那六呎高的新朋友旁邊, 猜枚也好, 談心亦無不可,
只要稍後不要帶她到那些廉價時鐘小築開房就可以了,
要夢死, 也得死在酒店床上才算優雅~

奇怪的是, 這夜她就像吃了偉哥的飯鏟頭一樣,
無論喝的怎麼兇, 都依然坐得筆直毫無醉意,
眼看身邊一個又一個的倒下,
她唯有到門外抽根煙抖抖氣, 再等待六呎猛男稍後把她帶到短途極樂.

煙頭的紅光比走廊的吊燈還要明亮,
煙圈的飄逸比那擺呀擺呀的裙更能挑惹起戰爭,
六呎猛男倏忽就在她身後如鬼魅般出現,
她以為是情慾的前戲, 轉身準備獻吻,
怎料猛男卻發問:
"妳嘔左未?"

"呀......未..."
她略帶尷尬再夾雜一點不知所措的回答.

"哦......妳未呀? 咁我去嘔先"

看著猛男彳彳亍亍的步向洗手間,
想著方才疑似閒話家常的對答,
她卻激起無限湧浪,

究竟他在幹甚麼?
究竟自己又在幹甚麼??
究竟每個星期同樣時間同樣地點, 比上班還要準時,
結識一批又一批其實不太熟絡亦無興趣熟絡的所謂朋友,
為乜?
原來係為左嘔?!
嘔完仲要俾錢?!

生活是否應該這樣?
生活是否只得這樣?

她回到包廂, 隨手拿起一杯烈酒,
向在場的朋友示意乾一杯, 正確一點該是對在場的喪屍澆酒,
然後別個頭, 轉身就走.
從此, 她的酒杯再沒有斟滿過.

若你近來在街上碰到她, 她總會跟你說:
"我個人仲乾過隻杯呀!!"
但在吐糟的同時, 笑容卻是前所未有的飽滿.

聖誕交換廢物指南 2011

每年總有大大小小聖誕派對等住你去,

而又多多少少你總要買份禮物去交換,

但當中有幾多你真係想買? 又或有幾多你真係想要?

如果買廢物已成為既定的指定動作, 唔買唔得的話,

以下有幾個價錢相宜的選擇,

對方未必合心水, 但至少, 可以令自己開心一陣先~

- 假裝的藝術

呢本直頭係送禮自用無以尚之~

成本書就係教你如何短時間成為各項目的專家,

例如電影專家, 紅酒專家等等,

好等你去到派對果陣長袖善舞揮灑自如,

媾女都自然事半功倍~

不過此書暫時只見簡體版,

首先要得學習成為簡體字專家先~

- insult a day calendar

內容未必極盡 insult, 

但對於學習及預防被 insult 都有良好影響~

- 牙膏機

唔好見cover graphics就亂咁塞野入個窿度,

其實佢係一件自動出牙膏機,

用途講唔上特別,

但我確係被佢既graphics迷上了~

- naughty dot to dot

(網絡圖片)

看圖識字, 唔駛講係乜啦可?!

送俾聖誕冇街去的宅男一流~

有得睇有得玩有得用 (唔好問我點用~)

btw, 另有男裝版適合唔同需要人士!

- lego flash drive

手指周街都有,

但呢個lego手指就可提供多一項好基本但冇乜人為意的功能:

收埋!

平時抄抄埋埋好多重要資訊落手指,

例如果d人體奧妙圖片/電影,

就算擺落櫃桶佢都係一隻好明顯的手指,

有心人一拎出黎你就無所遁形;

但呢隻lego手指仔, 只要將佢撈埋落一間lego屋裡面掩人耳目,

真係俾人爆格都唔怕資訊流失!

耐唔耐仲可以幫佢換個假髮混淆視聽!

- 齊來砌鋼琴

講開lego, 不得不提這副鋼琴!

手工精緻得令人驚訝,

但更驚訝的是,  lego 自己其實從未出過鋼琴系列...!

呢盒, 其實係內地老翻品牌"啟蒙"的自家作品!!

以前"啟蒙"只係照 dup 一大堆老翻 lego 款式,

質素仲極其差劣,

但今日竟然推出自家創作系列,

(lego冇出過, nanoblock有出鋼琴但造型及不上此款 [!!] )

造形仲要係估唔到地討好,

拆盒之後真係呃得下人,

真係唔好睇少山寨貨~

如果想聖誕示愛, 不妨買盒再加個上鍊音樂盒響琴底送俾人,

又或者同愛人一齊砌完鋼琴再砌第二d野亦可~

雖則唔應該響呢度推介老翻,

但今時今日各大百貨都可以賣 nanoblock, mega bloks, 

甚至連 kre-o 呢d同類"疑似老翻 lego"都可以上雜誌封面,

我又唔明點解唔可以講下啟蒙~

Cake 的啟示

每年總有幾次食到人地既生日蛋糕,

冇錯, 係人地既, 唔係自己既,

因為我本身大部份時間是戒甜的, 二來亦冇乜人知我幾時生日~

而每次望著生日蛋糕就如看見女性的 lingerie 一樣, 你以為是整晚的壓軸節目, 

但實質只能為你帶來五秒興奮, 

之後你只會想速速幹掉她... (我意思係指叫侍應分左個蛋糕佢~)

然後大家就會分到一堆碎濕濕的殘骸, 極其量扒兩啖, 就繼續再唱未完的K, 再喝未完的酒.

冇人會記得個蛋糕係乜野味, 冇人會再食未完的蛋糕.

你有幾可聽過有人會大叫: "我出年要食番同樣既蛋糕!!" ??

生日蛋糕唔應該係咁, 佢責任應該係帶來歡欣, 喜慶, 令聚會更加圓滿,

而唔係影完相就棄如敝屣, 一堆碎濕濕排隊等住去堆填...

恰巧友人生日, 今次輪到我負責買蛋糕,

(諷刺吧?~ 一個戒甜的人走去訂蛋糕, 真係同太監上青樓冇乜分別架咋~)

OK, 買, 唔係問題; 問題係我應該買一個怎樣的的蛋糕?

我要堆填還是要歡樂?

最後, 我冒著被問候的風險去買了這個:

對, 是 cupcake~

每件cupcake都包裝得像禮物一樣精緻,

各人忍不住拿起自己的禮物端詳一番, 就像藝術評審,

一邊研究先從哪裡入口方可嚐到最完滿的口感,

一邊驚訝為何現代還會有人在這些細微的食物上下苦功.

而其 "玩具向" 的餅盒更將勾起大家童年收到玩具般的驚喜.

如是者, 成功爭取在生日會上將快樂延長至半個鐘~~

從微博到巨博

由於微博得太方便, 亦夠無聊, 好適合我平時冇頭冇尾既作風,
所以好多本來寫在這裡的東東 (例如我最喜愛的 "壞品味系列"!!),
不經不覺已搬到微博發表.
而這裡, 就淪為微博的延伸閱讀...
我知道, 明明是大婆, 然後無啦啦被貶做二奶的滋味不好受,
所以, 我一想打長文就會番黎寵幸下佢.

奈何, 我其實又好憎打長文...
或者咁講, 我每逢打親長文, 多數都係出於"心有不甘"的情緒之下寫成.
換言之, 即係怨氣大!

的確, 我前排儲落一堆長文, 只差在未按下那個 "發怖"的按鈕,
或許是 唔出得街;
或許是 我不想再 cynical...