這半年

呢半年響我身上發生既事, 真係足夠我寫成書/拍一套戲,
起落之大, 亦係以前所未遇過,
更開始令我吃不消.
所以呢度近來都係維持非常有限度服務 (who fucking cares?~)

自問自己都算係一個有計劃的人,
但而家自己都唔係好敢預測黎緊會發生乜野事.

細個讀書有個阿sir好鍾意講一句:
"有問題? 唔緊要~ 因為問題是用來解決的"
呢句似是而非既話其實影響得我好深,
困難人人都有, 有人選擇擰歪面當睇唔到,
有人選擇面對.
而我通常都會選擇後者.

打波果陣, 好多時我都要負責看守比我健碩成倍既對手,
有人會戥我辛苦, 怕我頂唔住, 但我其實樂在其中,
暗啞底係好享受呢種懸殊既衝擊,
第一次俾人撞, 會撞到飛開; 第二次俾人撞, 會跌底;
到第三次俾人撞, 其實已經大概掌握到技巧令自己唔再跌.
我就是這麼長大的.

剛剛看完"我, 看見惡魔" ,
(我明白, 大家都以為我係會搶先入場睇3d玉蒲團,
但講真, 呢套送飛俾我都要考慮一下...)
久久未能釋懷,
雖則劇情多多少少有點犯駁, 但導演層層的折磨確係令觀眾透不過氣.

究竟, 報復係咪真係咁緊要?

兄 弟

- 黎緊又要做兄弟.
其實我ok的.
而又貫徹我地做事作風,
一係就唔玩, 要玩就玩盡d.
今次仲有埋西裝sponsor,
吊帶 及 bowtie已買齊,
如果可以著埋短褲就更好.

- 已經唔係第一次, 睇朋友既婚禮片段睇到眼濕濕.
但我次次都係響屋企睇.
因為每次我都係負責做收埋呢d驚喜片段果個...
可以先睹為快.

- 為左迎合當晚造型, 尋晚去左剪新髮型,
但而家我覺得自己好似棒棒堂......

講兩句, 幅射

多謝黃宜弘, 唔係佢講我都唔知layman係乜野意思,
對核能冇認識唔係問題, 畢竟唔係周街都科學家,
但layman還layman,
請善用google~
the simpsons都有教:
"i'll ask google before i ask the dumb questions"

如果有人仲以為福島核電站會爆炸,
成個亞洲會因為佢而陷家剷,
食鹽食屎又可以防幅射,等等...

請上youtube輸入"切爾諾貝爾"
上面有條片係discovery channel 2005年拍攝,
講述切爾諾貝爾事件的前因後果,
睇完之後, 你就會發覺福島事件其實真係好細單.
仲可以對核能有多一點認識.
好過你睇埋果d濕鳩報紙標題.

畢竟, 當年切爾諾貝爾係差d令成個歐洲滅亡.
生態影響一定有,
但未至於世界未日,
想死? 冇咁易!

本週節目推介

某日行過街俾呢張單張吸引住...
做乜飲飲下咖啡俾人tackle?!
如果見邊個飲咖啡就走上去tackle應該幾好玩耶~~!
再望真d睇下乜野廣告咁kuso,
5人欖球?! 仲要係淺水灣沙灘?!
香港幾時有d咁好玩既野?!
立即搵幾個肥仔 (香港地, 肥仔好易搵的~!)
一齊上佢個網站報名, 點知又剛剛過左期...

但除左欖球比賽, 原來仲有其他野玩:
欖球遊戲
(拿~ 有得俾我飛身touchdown的話, 我即玩!!)

充氣遊戲區
(拿...touchdown落呢度的話的就唔玩喇...)

抽獎、拍賣、沙灘派對、駐場DJ打碟
(我開始幻想著冬天的比堅尼女郎, 只得腦袋灼熱...)

沙灘排球
(真係有比堅尼女郎!!!)

最最重要的, 是免費入場!!

(七人賽d飛太貴了吧~)

但有冇人可以話到俾我聽...

- 五人賽係點接界外球架呢?

係咪同七人賽一樣將個人抬高抬到飄色咁樣?

咁一跳就到底線囉?

- 會唔會有人裸跑架呢?

響沙灘裸跑點都比草地裸跑來得更名正言順哦~!

雜 絮

- 雖則地點係最乞我憎的博覽館,

雖則座位又衰到冇人有,

但點都好, 都係抵睇.

舞台機關仲多過平時睇舞台劇,

如果我係stage manager真係頭都痕撚埋.

而且仲要唱足兩粒鐘!

冇錯, 演唱會係應該唱歌,

而唔係抽獎玩遊戲與及棟篤笑的.

- 呢排大熱果幾套戲都睇晒,

但真係鍾意的, 只有"讓子彈飛"

更好睇的是內地網民對套戲驗屍一樣的解讀,

簡直嘆為觀止 (當然有d過份解讀係牽強左少少~)

"black swan"令我諗番起"capote",

一樣係主角出色, 但其他地方弱到hihi...

犯駁處處, 跳舞場面連"billy elliot"都不如.

"127 hours" 就同 danny boyle 平時一樣,

(平時係指 millions, 28 days later 果期, 唔係slumdog果期)

鏡頭撚得好, 冇多餘鏡頭, 去講一個普通到喊的故仔.

由於入場前老早知道個結局,

所以去到中段已經坐響度等佢鋸手...

如果唔知結局入場應該會好睇少少.

又, 一個人, 一舊石, 拍足粒半鐘而唔悶,

其實都好難得.

- 是日海報

爛片唔一定有爛海報的~

scream 又來了

- 黎緊最想睇的日本電影應該係呢套:

印尼印象 下

呢個集中講食, 但唔係食評,
我唔識得分佢用乜野料先係正宗, 點先叫夠火喉,
我係"雞有雞味魚有魚味"支持者,
乜野都擺入口的~

- 這是第一晚的宵夜,
剩係見到佢兜沙爹汁已經想食.
(好核突咩?! 挑~ winnie the pooh果兜咪又差唔多樣!)
串燒好細串, 蔡瀾話齋, 咁先好,
舖頭又唔駛燒咁耐, 可以做多幾轉生意,
客人又易入口,
一個人就已經KO一打,
剩番D汁仲可以用來蘸飯卷.
飽到飛天.



- 其中一晚去左當地華人團體的團年晚會,
食晚野同平時去飲的冇乜分別,
但多野睇好多, 唱歌跳舞甚至人妖都有得睇,
爭在未跳火圈.
(據說一圍價錢只需三千零蚊, 而有一半係俾晒呢D表演團)
而由於成晚都係當地華人圍內活動,
所以會見到好多適婚少女都會full gear上陣,
懶係春風拂檻露華濃咁, 四圍走來走去企圖物色番一個華人少男.
好一個相睇聖地~



- 去到印尼都有住家飯食!
而我以前一直以為印尼菜係凍食的,
去到先知, 只係平時香港果d餐廳擺到凍晒...
果桶黃薑飯真係想寄倉拎番香港!



- 印尼式自助餐,
唔係任食, 只係你一入去坐底,
佢就會擺晒所有食物飲品甜品響檯面,
想食邊碟就掂邊碟, 唔食就唔好掂.
但食食下我開始分唔到邊碟掂過邊碟未囉...



埋單之後諗住影下d食物,
番香港叫阿媽試下整,
點知右邊個哥仔異常合作,
chok晒樣俾我慢慢影之餘,
仲叫埋佢同事一齊來做佈景板.
非常之nice~
(同時睇睇佢地手上果d碟, 澳牛果班大帝追都追唔上)
邊個話印尼人好憎華人?!



- 呢個叫ote ote, 唔知中文叫乜,



大約係蠔餅 crossover 鍋貼咁上下.
好.食.到.癲!!

- 可惜番香港之後有一日特登去印尼餐廳覆桌ote ote,
點知由餡料到整法都唔同, 個餡只係薯蓉,
完全唔係果回事...

- 講開食, 又點少得食煙~
當地香煙約$11-12一包, 平香港幾倍,
但味道好獨特.

印尼人嗜甜, 果d土產汽水甜到要開水飲咁滯,
估唔到連煙都係, 每次抽完lam下個咀都有陣甜味,
再望下包煙, 原來焦油含量足足有25mg...
而平時香港買到的"綠luck", 含量只係
8mg...

印尼印象 外傳

話說, 當日出發之前, 知道印尼係用圓腳插蘇的.
咁我去機場之前, 就走左去買萬能插,
買到之後, 就好順理成章的行去巴士站,
見到有架巴士埋站就上, 好正常~
點知, 呢個原來係惡夢既開始...
因為我上果架車, 係E字頭的!!

上車冇耐就發覺唔係好對路,
兜下兜下電話隨即響起來,
問我究竟去左邊,
我望出街, 連我自己都唔知響邊!!

時為14:45, 司機話我知呢度叫東涌,
離機場大約十分鐘路程.
當然, 呢個係一個大話,
而櫃位係三點鐘截check-in...

我企響車頭, 已經開始盤算飛機走左我應該點算好,
一方面就不停打電話叫地勤姐姐等埋我.

我有諗過中途衝落車截的士, 但馬路上鬼影都唔多隻,
唯有信巴士司機.
可惜, 司機信得過, 個車站信唔過.
因為E車個站係停響機場最底層,
換言之我落車仲要跑上去離境大堂...!
當時, 已經超過三點.
我開始絕望.

但絕望還絕望, 都一樣係要跑,
然後我用盡平生追波既氣力跑去櫃位(兼負磅廿多磅),
一衝入去見到遠處某counter三個地勤好焦急咁望住我,
有理冇理我都覺得佢地係等緊我, 衝左埋去先算.

當佢地其中一位問我:"你係咪J生?"
我如釋重負, 幾乎跪響地下哭出來.
因為我知道自己冇去錯counter仲上到機.
點知

佢地用15秒時間幫我搞到張boarding pass之後, 略帶羞澀的送上一句:
"唔好意思, 我諗你要再跑...因為boarding要去xxx (我已經唔記得個名...), 要轉車哦"

屌__! 而家玩amazing race嗎?!