夜半無人

星期日凌晨, 剛完成工作,
回想到幾年前, 我根本冇可能會在呢個時間工作.
想著想著, 我突然回憶幾年前的我係點樣過活...

那年頭還流行寫blog, 在網上可以見識到好多有趣既人寫一篇又一篇文章,
而家平台多左, 有質素既文章反而少左 (又未至於冇)...

然後, 我勾起條筋, 逐個click番好多已經冇更新既blog,
睇下大家近況

click 下click 下, 就去左一個一直唔想去既blog......

我一直都知有呢個blog既存在,
就連當事人都唔知我知.
因為我一直冇出聲,
一來係留番d私隱俾對方 (至於公開放上網仲算唔算係私隱呢個就不在此討論),
二來佢以前其實專用呢個blog來發洩對我既不滿.
仲要故意用外語寫恰我唔識.

好彩, 呢個世界, 有google translate~

雖然當年分手令大家去到生死不相往還既地步,
但人總要學會放底.
所以只此一次, 用呢個荒廢已久既blog去回應妳曾經所問的問題:

我很好, 不用擔心.
就算他日在街上我依然對妳視如陌路,
但我依然係由衷希望妳過得快樂的,
不要再放棄自己.

東莞的法式生活 5

當我第一日踏入呢間公司，我已經知道今次大撚鑊了。。。

架構上，全公司管理及行政都由法國人主理，每日都一大堆法國人行來行去，人數仲多過法國領事館，真係法國大餐。原本冇乜問題，但奇就奇在當中居然冇乜幾多個識中文...
需知道，外國人來中國打工，多少都係因為在本土搵唔到工，俗稱撈唔掂，黎得既都唔慌係乜野精英，仲要唔識中文就連日常生活都有問題，所以佢地主要都只能夠每日飲酒同呃女上床，真係貪你中國山明水秀咩~

管理層管中國人但唔識中文，響北京上海甚至香港都可以蒙混過去。但在東莞真係同獻世冇分別。

其實公司係有翻譯小姐的，但翻譯小姐就竟然唔駛做翻譯，而係做小姐，佢每日工作只係負責色誘老細，有時仲要唔著底衫褲...點解我知呢，咪就係因為我都見過囉...

翻譯小姐平日就坐在老細斜對面，每逢著短裙就有意無意咁戙高腳，老細又有意無意咁望兩眼。有次我行過見到以為自己眼花，後來同同事講起先知原來全公司都見過...

我老細同月經一樣，一個月先來東莞一次，每次帶堆錢來fing一個禮拜就走，舊錢夠分的話就皆大歡喜，唔夠的話就睇下邊個唔好彩(通常係供應商)，要等下個月再找數。所以公司門外長期都坐住各式各樣大漢等收數，場面非常壯觀。

另外老細每次來東莞仲有一個任務，就係炒人。呢樣野佢反而好公平，無論中國定法國人只要佢突然勾起條筋都會照炒，不分種族不分能力。

我既工作係經常要出差，一個星期得一兩日在公司。每次返到去行入office，想拎files睇下，都會變成玩photo hunt咁估下個file去左邊，因為原本跟file果個好大機會已經俾人炒左，而其他我又分唔清佢究竟係新同事定係收數佬...

雖則大家近排成日講"生於亂世有種責任"，但身在亂到九彩既公司，責任一詞就變成往生咒，愈負責死得愈快，每一個責任都係一個計時炸彈。我當只有兩條路揀，一係走; 一係留響度一齊亂。

咁當然，我係揀左後者，同佢地一齊鬥亂啦!

東莞的法式生活4

基本上, 我對東莞地勢可說係毫無認知,
就算以前工作要去東莞,都只係點對點, 唔會知道東莞原來大到離奇,
廿鳩幾個鎮, 由最東去最西要搭幾個鐘車...

情況有幾誇張呢? 就係我每次截車,個司機一聽到要跨鎮就會皺眉頭,唔係佢唔想去,而係通常唔識去。次次都搞到好似要去板門店咁,一過界就會俾人槍斃一樣 (而家我截車,講完地址見到佢笑晒似係搵到水魚咁我先會上車,至少,佢個笑容話係代表佢識路)。

所以,當個司機同我講厚街鎮係最方便,
我就只能信佢,反正住響邊個鎮對我來講都唔會有太大分別。

初到步的頭幾晚, 我都係住響"七天",因為我剩係聽過呢間連鎖酒店, 而且全國都有分店應該唔會差得去邊。一邊住一邊搵屋吧。

在我check-in其間, 個經理不停同我吹水,
而話題係不停同我講厚街有幾亂, 叫我一個人夜晚出街唔好四圍走,留意財物...

點知在我辦好晒手續諗住上房沖涼之際,佢又加多一句:
"留意財物,貴重野唔好擺響房入面"

咁即係點呀?! 貴重野帶出街又危險,擺響房又危險。咁我d貴重野擺去邊好呀? 擺上google cloud 呀?!

但佢冇理我,繼續響度依依哦哦。咁我唯有攬住我既財物出去食飯。

講開食, 厚街其實算係咁,有好多台灣菜館(因為多台灣廠佬), 味道甚至可能比台灣更地道。
想要經濟實惠的話可以幫襯木桶飯, 其實即係香港的碟頭飯,分別只係用碟上定用桶上。
港式茶餐廳都有,但一般比較貴。
唔係因為佢好食d,因係在大陸,任何行業加上香港兩個字就可以賣貴幾蚊......

而就在'七天'屈左幾日之後, 我終於搵到一個比較像樣的住宿:
情侶酒店!

東莞的法式生活 3

工廠位於郊區, 附近除左工廠以外, 就只有寥寥幾間士多,
平時所有工人放工之後, 多數會聚集在士多門外,
成堆人睇一部電視, 你媾下我, 我媾下佢, 打打檯波咁就一晚.
(對, 內地士多門外好多時總會有幾張波檯, 仲要係露天, 真係別有一番風味.
咁當然, 最大風味就係來自幾錢一度啦~)

每一日士多為左留住客人, 都會各出奇謀, 由地攤遊戲到收費按摩椅到抽獎都有!
最離奇有夾公仔機, 但裡面唔係放公仔, 而係香煙.
你以為成件事係騙案, 覺得根本冇可能夾到, 點知其門如市, 班工人晚晚排晒隊玩,
一玩就幾十蚊 (大陸煙一般只係十蚊一包), 然後乜都夾唔到又嘻嘻哈哈返過去睇電視。

呢種生活,過一兩晚還可算新奇有趣,
但若然要晚晚係咁,我自問冇可能頂得順。

所以,我就逃離宿舍 (對, 我有宿舍的,但我一晚都冇住過),
跳上一輛看起來代表著希望的三輪車, 用極爛的普通話同司機講:
"帶禾去附賤最惹鬧的地方!"

然後司機用頗純正的廣東話回答: "你香港人黎架?......附近最熱鬧的話, 應該係得厚街咋wor..."

厚街? 個名咁熟口面既?......

哦......國際知名果個中國性都!!

東莞的法式生活 2

有咁耐風流有咁耐折墮, 我身邊朋友個個去外地工作,
 就算唔係歐洲都至少係北京, 甚至非洲 (其實都幾好),
但我, 只係分配到東莞...
而東莞, 九成半都係工廠, 換句話說, 我搖身一變做了一個"廠佬"...... 

工廠係由法國人所開, 每朝返工入 office 就成堆法國人同你 bonjour,
都算得上係 MNC 黎架~
...可惜, 你有幾可見過外國人搞廠係成功?
 外國人上大陸搞廠唔緊要, 但唔好學人做管理嘛,
外國人係管唔掂中國人的,
仲要係出名懶過鬼的法國佬就更加係有攪住一齊落油鑊之況味! 

好喇好喇, 做廠都算喇, 做金屬又好做波鞋又好做假鳩都好, 間間廠都係差不多,
(題外話: 我曾經的確去過性玩具廠見工, 當你 interview 果陣遇上漂亮的HR姐姐,
佢一坐底就用溫婉既語氣問你: '你知唔知乜野叫vibrator?'
你明明係知, 但又好想答唔知, 希望佢會從唔知邊個部位抽個vibrator出來教導你一番, 
當中的混濁思緒真係令人難以忘懷~)
但咁混亂既廠就真係第一次見,
首先, 我出入係唔需要打卡的, 唔係因為我高級, 而係因為冇人幫我整 staff card.
原本負責果個聽講早前俾人炒左, 而新黎果個又唔知點整...
再者, 每當我想搵一個file來睇睇, 都要望齊每一個人, 估一大輪'究竟邊個有file呢?'
原因, 同上.
真係每日都玩killer一樣新奇刺激好玩...... 

返工頭一兩日我都仲有幾毫子雄心壯志, 希望可以搞好間公司,
但幾日之後, 我就改變決定,
決定以法國人為榜樣, 同佢地鬥hea!!

東莞的法式生活

多年以來, 我好少在網上談及工作,
一來我唔係好想人知我做乜, 二來我上網本係為左娛樂,
日頭已經在工作, 夜晚都仲要講工作就未免太悲情.

但今次, 我決定講一次.

當你每日出街偵查身邊有冇邊個內地人痾屎痾尿,日鬧夜鬧內地人乜乜柒柒之際,
我已經隻身遠赴大陸,
真正的 if u can't beat them, join them!
即係, 睇AV, 係無助你打倒日本軍國主義的,
與其上 facebook 鬧, 倒不如直接上大陸鬧呀嘛~

而故事, 應該由某一日我去見工講起...
話說某日, 有個香港人打電話來約我interview,
我跟住個地址搵上門, 發現呢間所謂公司係冇門牌冇招牌,
只有一扇木門, 仲要冇鎖,
我輕輕咁推開道門, 立時有三對眼望住我, 而成間公司亦係得呢三個職員,
另外仲剩低有一個眼尾都唔望下我既鬼佬, 叫老細.
正當我覺得呢次唔係遇上騙案就係拍緊鬼片, 打算寒暄幾句轉身就走之際,
一直對住部電腦打坐有如石佛一樣既鬼佬終於望下我,
仲叫左我入房傾幾句. 同一般的interview唔同, 成個過程我係冇填過任何form, 冇人問過我拎任何工作/學歷證明 (早知我話自己係博士畢業),
全程只係我不停鳩吹, 阿鬼佬就不停jot note寫寫寫,
佢寫完一大輪, 就終於肯抬頭望下我,
問: "如果我要你聽日去中國報到, 你第一件事會做乜野?"

"梗係叫個雞先啦!"
"我會搵屋囉..." 我誠實如忠犬的答.
"哦...咁我陣間叫人俾個地址你, 你上去報到順便搵屋啦"
"em......你咁樣係咪即係請我呀?"
"係呀...你可以返去了"
如此這般, 我就九唔搭八地變成佢公司既駐中國大使,
可惜我打開地址一看, 地址唔係我最想去既北京/上海, 而係東莞, 最混亂的東莞......

豪情3D

港產片我自問都睇唔少,
(我連羅守耀既戲都入場睇! 如果你想屌我唔支持本土電影的話, 我唔介意你拎歷年入過場既票尾來同我比對一下邊個支持得多D),
亦成日都好想好似某網站咁, 經常推祟港產片,
但奈何, 每次睇完我都想屌...

上次"金雞"我都已經費事提, 今次"豪情"更加係挑戰底線...
唔係道德底線, 係地底泥果條線...

一開場見到852電影有份製作已經知出事...
需知道852電影係何小姐心血, 852有份參與, 即係代表何小姐將會佔戲甚重...
(黎緊郭子健的"全力扣殺", 852都係有份參與......)
而你入得場睇"3D豪情", 我諗你唔會因為想睇何超儀架可?
此乃敗筆一.

導演李公樂,
雖則近年都拍左唔少爛片, 但睇"福伯", 睇"十分鍾情"果個一個shot直落既故仔,
同埋"師奶唔易做",
睇得出其實佢係比較有heart既一個導演,
所以今次就算都係拍爛片, 佢間中都會撚幾個唯美鏡頭,
但成件事, 反而變得好唔搭調了......

(以下含劇情...... 不過你睇到呢度都唔打算入場架啦)

講番劇情, 基本上係冇乜既 (同金雞比就叫有囉),
斷截禾蟲咁一幕又一幕濕濕絮絮駁埋杜汶澤肉搏各女優,
笑位已經唔好笑, 又悶,
諗住佢會夠鹹啦, 點知仲淡過我一路睇一路流既汗,
肉搏場面可謂非常求其, 除衫露兩點 un 兩 un 就當係一場...
既然係咁, 駛乜要搵女優呢???

當然, 我知 budget 好緊要, 但我寧願你貴精不貴多囉.
搵埋成堆又老又醜又脫得扭擰咁算係點?!
香港觀眾真係咁易呃??

更可笑既係連杜汶澤都一樣只露兩點,
成鳩日著住條底褲, 籮都冇露過, 你學人話訓身?! 你知唔知醜??

最撚火滾係搵埋夕樹舞子, 佢當紅果陣(九十年代)我都已經嫌佢老,
你而家走來仲搵佢?!
okok, 我當你係乜春集體回憶, 咁你叫佢出場講兩句笑話咪算囉.....

(請自行放大呢幾隻字)
你老味做乜要叫夕樹舞子扮學生妹?!?!?!

睇住佢殘到成個阿婆咁仲響度扮活潑, 我反而有d想流淚......

到結局, 就精彩了... 杜汶澤打av怪獸,
而幾隻av怪獸就係果幾個女優笠晒怪獸頭套所扮演既......

...情節係咪覺得好熟口面呢......
冇撚錯, 呢場戲竟然係同世紀爛片"富春山居圖"同出一轍!!
又係幾個主角笠晒頭套大戰, 而你完全唔知邊個打邊個!!!
我頂你個肺, 笠左頭套你話佢係李嘉欣都得架啦!
不如搵我去拍啦, 一樣架咋

一盒LEGO一個故事

耐唔耐都會有人問我: "你究竟有多少盒LEGO?"

其實, 我係答唔到, 因為一來我從來冇刻意數過,

二來我都唔知點數......

冇盒既計唔計? 二手又計唔計? 玩到剩番塊板既又計唔計??

咁, 唯有約略咁講下部份我記得既收藏...

(若果你係打算睇下我d lego有幾貴有幾大的話, 可以skip了,

因為我最鍾意買埋d古撚怪怪既細set的)

 #6660 

呢架車, 我真係唔記得幾時買, 因為真係好舊, 舊到盒都冇...

大概係我細個果陣好鍾意呢架車所以keep到而家,

因為佢個轆係有避震的說!

 #6414

呢盒經典既地方, 係我當年在ebay剛興起的時候上網買的,

仲要係二手,

因為我本人其實好鍾意呢個paradisa系列 (當年粉紅色磚仲係好罕有),

所以死都要個德國賣家賣俾我,

而結果...運費係仲貴過盒野本身...

#3739

呢盒係 lego第一盒由 fans 創作而大量生產的 lego,

屋仔細細但內籠極之齊全.

亦係引導 lego 近年不停推出熱賣 modular building 系列 

(盒盒千鳩幾蚊果隻呢)的雛型.

由於此set係可以由中央向外打開,

而我, 係試過用呢一set收埋禮物在內, 

然後等人打開果一刻來示愛的......

 #9293

教育系列, 即係放在學校俾小朋友用來分辨

"呢個係警察叔叔, 果個係咕喱, 你第日大個想做邊個呀?"

呢盒曾經出過兩次, 分別係96年同99年,

而兩款既分別, 係96年仲有已絕版的電單車,

99年版變晒做三個轆!!

好可惜, 我手上就只得99年版本...

#7655

呢盒......其實我想賣 (有意者可email聯絡我)

咁呢盒野點黎架呢?

係有一日有個朋友排左半日隊搶番黎, 

以為我一定鍾意(但又唔係送俾我),

但其實我本人並唔係太鍾意starwars的.

又唔好意思推...

 #5938

係咪覺得好熟口面?

因為lego前前後後唔同年代都出過呢個造型, 

永遠打開都有隻死屍彈出來.

雖則係好冇創意, 但我每次又死死氣地去買...

而家應該至少有5盒類似的東東...

#6709

話說十幾年前, 香港仲未有好多人沉迷lego,

玩lego的來來去去都係果一小撮人.

然後某日, 其中有人爆料, 話搵到個寶藏,

有好多陳年lego在賣.

當年, 果個寶藏, 就係仲係好純樸的 - 澳門!

咁之後既兩個月, 就幾乎全澳門既倉底lego都俾人掃晒.

而呢盒就係當年我在下環街市搜掠得來的.

(係, 街市有lego賣, 問你死未?! 當年仲要仲葡銀付款!!)

 #6427

"下?! 路牌都拎出黎賣?!"

而呢句, 正正就係呢盒野罕有既地方!

離譜哩~

 #2928

飛機特別版,

唔係隻飛機特別,

而係要在某些特別航班上先買到,

仲要分航空公司 (唔同公司有唔同貼紙附送),

而呢盒, 係我某次搭日航時意外發現到的,

攪到我即時大叫出來, 嚇到我身邊d朋友以為我墜機,

然後見到我在機上買玩具之後, 就不停叫空姐俾多個兒童餐我食...=.=

但據聞而家飛機上已經再冇lego賣......

 #1854

這是一盒lego跟天窗工程公司velux合作的宣傳品lego,

好多人以為係非賣品, 但其實係可以買的.

而且仲要係你估唔到咁方便...上velux.com就買得到!

仲要免運費!! (當年在未有順豐既世界黎講, 好難得的了!)

#7416

呢盒原本冇乜好講, 隻船又醜樣, 公仔又醜樣.

但我近排發覺當中果兩隻船民公仔炒價甚豐.

原來...當中的中國船民曾被投訴帶有歧視成份,'

攪到呢個系列就只得一個下場, 極速被停產~

 #1815

先前講過, 我其實係好鍾意paradisa系列,

因為佢果d用色實在太姣太前衛 (所以當年銷情很差),

所以呢盒, 其實我買左兩盒,

其中一盒送左俾當年心儀的一個女子,

而佢... 就以為呢盒野好平, 當係老翻玩具咁玩.

點解我知呢? 就係因為我事後響佢屋企見番呢盒野,

而所有磚, 都舖晒麈......

真係肉都赤埋!

her (觸不到的她)

- 入場只有一個原因, 就是 spike jonze!

- 點解 spike jonze 咁吸引, 可能因為佢太神經吧,
例如佢在拍緊"her"既同時, 其實正在監製另一套爛片"bad grandpa"...
 (jackass 班底你大概都知係乜戲吧~)...
真係唔到你唔服!

- 或者係我期望過高, 今次係有少少失望,
雖則拎左奧斯卡最佳劇本, 但冇想像咁出色.
大概呢個故事交俾舊拍檔 charlie kaufman 的話, 會虛幻多兩倍又抑鬱多三倍~

- 雖然講唔上極品, 但戲依然亮麗,
美術鮮艷細緻, 配合冷酷的環境,
非常養眼.

- 而呢套咁冷酷既戲, 其實係在上海拍的.
留心的話, 會見到男主角在高鐵站落車~

- spike jonze 其實好鬼希治閣, 經常在自己電影裡面出現,
咁今次響邊呢? 冇錯, 就係tv game裡面經常講粗口果個大頭公仔!

- 相比剩係出聲的scarlett johansson, amy adams 演出更加可親.

- 劇本拎到奧斯卡, 但勁好聽的the moon song反而拎唔到...

KANO

魏德聖繼續延續其原住民故事, 去到今次仲要挑戰很難拍的運動電影.

還要是沒有太大速度感的棒球題材, 講真, 幾牙煙.

雖則佢今次名銜是監制, 但我始終認為佢有插手部份導演工作.

至少, 在片長上, 跟上兩套, 是一樣的咁長~

近年棒球電影其實唔少, 

由掛羊頭賣狗肉的"無野之城"到講管理的"money ball"到講jackie robinson事蹟的"42"都有.

以上三套都有共通點, 就係都係主要講球場以外既故事. (都話運動電影難拍架啦~)

而KANO卻係少數講比賽的棒球電影,

竟意外拍得不俗, 某幾場的確令人熱血沸騰,

故事本身亦夠戲劇性,

但若然對棒球賽則多點補充就更好, 畢竟, 唔係每個人都睇棒球大的.

至於演員, 應該有部份本身真係運動員, 所以預左演技麻麻,
但我睇好戲份最重的曹祐寧, 有前途呀~

BTW, 香港版的主題曲幾好聽, 雖則我只懂陳柏宇而不知誰是VnP.

失憶大道 Mulholland Drive

- 一直好想講呢套戲, 但又唔知點講,
因為呢套戲實在係近代十大教材級奇片之一......

- 劇情'表面上'是咁的:
rita 交通意外之後失憶, 其後遇上女演員 betty, 然後betty熱心幫忙rita尋找記憶......

- 由於導演 david lynch 從來無對套戲作任何解釋, 全世界觀眾都陷於估估下行列,
甚至有好多人睇完成套戲都唔知佢正在做乜春......

- 但其實, 呢套戲, 係要掉轉來睇的, 因為實際劇情, 其實係咁:
成套戲既頭四分之三部份, 其實係 betty 既夢境, 而套戲最後果半粒鐘, 先係現實.
而最後果半粒鐘, 每一件道具, 每一個演員, 每一個動作,
都在解釋 betty 點解會發個咁既夢......

死未?!

由於網上有太多深入解讀, 我唯有講一d膚淺d既~

(以下含內容)

- betty 夢境內有部份演員既演技係極之浮誇, 例如 lollipop 女與及肥佬姦夫,
而呢幾個演員都有一個共通點, 就係在現實中係唔存在既,
呢樣, 亦都解釋左現實中的 betty 本身並唔係一個好出色既演員.
handle 唔到一d現實中唔存在既角色.

- 夢境內每一個電影界人仕都盛讚 betty, 表達出現實中 betty 係好渴望成為出色演員.

- 夢境內殺手錯漏百出, 證明 betty 其實對殺手並不信任.

- 夢境內有d角色收場好慘, 例如導演 adam, 因為呢d人都係 betty 現實中所憎恨的.

- 現實中 betty 提及過既跳舞比賽, 其實就在夢境的第一幕已經出現,
表達出跳舞係 betty 一生中最大的成就.

國際電影節刨馬仔時間

- (日本) 白雪公主殺人事件
中村義洋以往幾乎所有電影都未在香港上過, 而佢既紀錄亦算良好
 (因為次次都係改篇伊阪幸太郎小說), 所以相對來講係幾抵睇,
不過佢今次唔再係改篇伊阪幸太郎, 而係湊佳苗小說.

- (以色列/美國) 發條網
一套講述中國網絡成癮治療中心的紀錄片,
高登仔必睇!

- (丹麥) 性上癮 (前/反篇)
雖則呢套已肯定會在香港上畫,
不過在電影節, 就可以在同一晚睇晒上下兩集 (全片加埋四粒鐘),
但你頂唔頂得順 lars von trier 就閣下自理~

- (羅馬尼亞) 布加勒斯特夜未央
簡單來講, 就係before sunrise/sunset 的變種,
又係由開場講講講講到散場, 分別係, 導演前作鏡頭甚至唔多會郁...
估計呢套都係咁上下.
鐘意既就好鐘意, 討厭既就好討厭.

- (美國) 永生情人
jim jarmusch自上次"我係殺手年終無休"大跌watt俾人插到反艇之後,
今次又再挑戰自己, 拍殭屍片!

- (埃及) 一切從廣場開始
埃及紀錄片. 講乜? 就梗係講 莉花革命~

- (奧地利) 神乎其技漢尼卡
挑釁大師米高漢尼卡的專訪電影, 究竟佢會被導演挑死, 定係挑死個導演?

一代神作: 天機 - 富春山居圖

(注意: 本文含嚴重劇透... 不過冇乜所謂, 含唔含都睇唔明架啦~)

呢套戲, 已經唔係就咁用一個"爛"字就可以形容.

首先講講背景先:

導演係孫建君, 編劇係孫建君, 電腦特技係孫建君, 剪接係孫建君, 投資者亦都係孫建君...

而故事其實好簡單, 只係講兩幅國寶富春山居圖同埋剩山圖俾幾班人偷來偷去,

咁劉德華飾演的香港緝私科特工(?!)就要從壞人手上拎番國寶番黎...

故事集合鬥智, 歷險, 科幻, 武打, 靚人靚景, 愛情, 甚至情慾於一身,

但每一個範疇都只能夠用錯!撚!晒!三個字去概括.

而由於荒謬位太多, 訊息量太大, 愈是分析劇情只會愈頭痛,

所以只能point by point咁約略講講:

- 好多人話opening果段極膠CG係抄james bond,
但其實係更似向the girl with the dragon tattoo致敬. (但效果當然是差九倍)

- 如果有留意八九十年代港產片, 經常會見到好多操印度口音,
得幾句對白而又同劇情冇乜關係既鬼佬茄哩啡, 我好懷疑導演很愛九十年代電影,
因為呢套"天機" 就有大量呢d鬼佬!!

- 而比呢班鬼佬更九十年代果個, 是劉德華! 佢每一個表情動作, 都極之"夏日fiesta"~
導演仲唔係向九十年代致敬?!

- 我已經唔問一個香港特工/警探點解無啦啦去大陸追查國寶了,
但有冇人可以話俾我聽點解一個特工/警探係經常要深入賊竇偷賊贓,
仲要偷唔到, 而唔係拘捕壞人?!

- 場口經常無里頭地飛來飛去, 一時外國一時大陸一時唔知響邊度,
甚至突然sharp cut,亦靠大量字幕去提醒大家而家做緊乜,
咁樣做, 原因只得一個, 就係剪接根本剪唔埋!

- 戲中的劉華經常出現在一個高科技基地裡頭, 對住一大堆虛擬螢幕篤來篤去,
甚至有時行到半路中途都要番去篤兩篤, 因為佢個高科技基地係要用來打message...
但, 佢明明身上係有電話的, 仲要係nokia贊助.
即係點?! 即係nokia電話連send message都send唔到, 要返基地篤篤篤?!
難怪nokia就黎執...

- 而戲中的林志玲及張靜初有如鬼魂一樣, 完全可謂自出自入~
無論當時場戲做緊乜, 佢兩位鍾意入鏡就入鏡,

- 例如其中一場, 講劉華偷偷摸摸千辛萬苦倒吊潛入博物館, 點知幾分鐘之後,
你又見到張靜初大搖大擺咁行入博物館, 冇錯係行!入!去! 究竟邊個先係特工呢?!

- 張靜初飾演這個保險公司保安經理, 幾幅名畫俾人偷完再偷都好似唔關自己事, 算~
自己送上門俾人捉, 都算! 而呢個保安經理去到結局突然宇宙最強變得勁好打,
仲好打過劉華你叫我點樣接受?!

- 林志玲就更加神奇, 佢有本事在劉華一面在杜拜的一間酒店房偷畫時,
在隔離個廁所浸泡泡浴...而劉華又為左睇佢沖涼, 又突然畫都唔偷...
至於點解林志玲會無啦啦響人地間房出現? 冇人知!
又點解林志玲無啦啦響人地間房沖涼? 冇人知!!

- 故事一開波就出晒飛機大炮, 甚至飛碟去搶名畫, 中途又舞刀弄槍.
點知到結局正邪大對決,劉華大戰佟大為, 係突然斯文到玩劍擊....

仲要突然換衫! 仲要戴埋面罩!!
咁, 由於劍擊衫係一式一樣,
所謂的高潮戲就變成兩條蒙面蛋散唔知邊個打邊個地互篤.........=.=

- 講完一大輪, 當你以為成套戲只係圍威喂咁拍成, 就錯了,
導演據說花了兩年製作, 耗資超過一億, 場面浩大, 加埋杜拜實景拍攝,
大量華衣美服 (除了佟大為, 衣著很娘!), 大量後期CG打造而成!
每一part都非常認真, 雖則
全世界都發覺導演唔識拍戲,
係得導演自己唔知...

佢用一個好認真既態度, 去完成一件大家都覺得好鳩既事,
這, 就是cult~!

比利時 之 安特衛普

- 就算原定行程中沒有安特衛普, 

這裡的中央車站(Antwerp Central)也值得下車逗留一會,

被譽為歐洲最美的車站之一, 樓高四層,

頂層是古蹟, 下層卻是走科幻路線,

好很迷~

幾乎所有往返比利時王荷蘭各城市的列車都會稍停此站,

只要手持即日車票 (thalys車票除外), 就可在此站中途下車,

吃個午飯拍個照才再繼續行程~

- 相對布魯塞爾及布魯日,

安特衛普就是特別前衛,

滿街璧畫畫個不亦樂乎.

漂亮與否見仁見智, 但心思是少不了,

例如上圖的幾幅都是樓高幾層的畫作,

不是拿著噴漆在街上跑跑噴噴就可成事.

- 在現代美術館(M HKA)之內

- 另一個museum, MAS 水上博物館,

展品非常麻麻, 但其外型及景觀卻是一流~

三面環河, 從正面看就似在水中央一樣

(可惜當時河上有工程, 拍不到出水照...)

- 走到樓上還可360度看到安特衛普全景

荷蘭。比利時。杜拜 雜絮

- 在阿姆斯特丹下塌的旅館,

我明明book單人房, 但一入去就見到三張床,

我番落去同receptionist姐姐寒暄問點解會有三張床

佢望一望我, 答

"幾好呀~ 咁你可以帶新朋友來過夜呀~"

答完仲對我單了一下眼... o.<

荷蘭真可愛~

(FYI, 今次我其實係一個人去, 雖則每次講出黎都冇人信...)

- 今次旅程最大遺撼之一就係遇上 van gogh museum 裝修!!

但職員好快就提供一個浪漫行程補數:

"拿我地用一條紅繩將舊館同新館連埋一齊,

只要係跟住樹上既紅繩就會去到新館,

步行十分鐘左右就到~"

然後, 下圖就是佢所講的紅繩,

看見冇?!

  

但我行左三分鐘就唔見左條繩...

結果我行多半個鐘都去唔到,

要截車再不停問路先去得到...=.=

- 傳說中的magic mushroom!

可買返屋企自行栽種,

但後果自負.

- 阿姆斯特丹的eye film institute,

呢部係紀念品機,

只要係"隊"部手機入去,

就會有條影片送俾你,

睇落好低能, 

但唔止我, 現場好多老外玩呢部機都玩得好開心~

- 呢度原本應該係鹿特丹的一個市集,

但我去到果陣就只見到... 空地一塊...

當日仲只係得零度左右(仲勁大風),

好辛苦先行得過對面...

- 歐洲大部份的廁所都要收費,

而呢間就係廁所+精品店,

當然所賣精品全部都同廁所有關,

就連男裝衛生巾都有得賣!

可即買即用(!!)

- 各大火車站都有此類locker,

方便抵用,

背囊友必用!

點解要講呢個呢,

係因為香港其實都有同款locker, 如紅磡站,

但費用竟然比歐洲貴得多...

(例: 最大果格,香港係HKD$70 per 2 hours,

而比利時都係約HKD$70......per 7 days!)

- 其實此行主要目的係去"廟思淫" (又係每次講出黎都冇人信...),

而竟然有朋友突然捐出museum pass一張!

真係慳好多!

特別鳴謝C小姐仗義捐出.

冇錯~ museum pass上面係寫小姐, 但...who fucking cares?!

- 荷蘭火車有好多款, 幾乎每次乘搭都唔同,

而呢款包箱型算係最好坐(價錢一樣),

見上圖兩位訓得好辛苦?

望埋下圖

其實可以變床,

仲可以熄燈及閂門,

只要你夠厚顏~

(但我只係厚顏了一個站, 去到rottendam就將座位擺番整齊~因為好多人!!)

- 住hostel有樣好, 就係不時發現溫馨之處,

好多人臨走時會將剩餘物資放在common kitchen益下家,

看, 連老抽都有!

如果英國是food hell,

荷蘭至少都算係food grave,

沙律醬撈薯條已經係荷蘭最受歡迎食品之一......

(另外仲有可樂餅, 但唔夠薯條飽肚)

- 搭A380的好處!!

- 話說因為種種原因, 我去到杜拜果陣已經係凌晨兩點幾,

而這個號稱不夜城的杜拜機場在出閘後竟然係冇食肆...

(有costa cafe, 但佢同我講只剩coffee沒有cake)

左問右問之下, 要去到職員專用小食部,

仲要同好多夜班員工鬥搶先搶到上圖果個麵包...

我突然覺得自己好淒涼...

- 冷氣巴士站在香港人眼中沒甚特別,

但在杜拜, 簡直就是綠洲!

就算唔搭巴士都要入去坐下,

如果唔係真係會中暑. 

- 我唔否認, 當我在街角轉出突然看見呢個環境,

我係有想過逃跑的...

- 去杜拜旅遊, 好多人會跟 local tour 搭成個鐘車由城內出去沙漠玩,

我沒有.

因為我住果間酒店樓下已經係沙漠(但我明明在城內)......~

比利時的朱古力

(見到我寫食物, 係咪覺得世界就來末日呢?!)

只要步進布魯塞爾大廣場 (brussels central的那個), 

就發被沿途的精美朱古力店殺得措手不及,

首先, 別要買那些無名的朱古力禮盒,

包裝可能很精緻, 但價錢比有名的品牌平不了多少.

不妨走多兩步, 有大量名牌等著你:

Neuhaus - 比利時皇室御用四大品牌之一, 亦是發明 praline 的始祖,

送禮穩妥之選, 價錢中上.

Galler - 亦是四大之一, 名氣或許不及 Neuhaus 甚至 港人極為熟悉的 Godiva,

但包裝較為時尚, 沒有其他品牌的土氣形象, 價錢亦算合理.

Leonidas - 門市極多, 價錢相對實惠, 需要"派街坊"的話, 首選~!

(但其實香港也有門市)

Godiva - 相比之下, 價錢及品質不上不下的Godiva就處境尷尬,

在現場所見亦不見得特別受歡迎.

而且香港有大量門市, 我實在找不到在比利時購買 Godiva 的理由...

Côte d'Or - 英國有合家歡的Cadbury, 比利時就有Côte d'Or.

亦是比利時皇室御用品牌之一, 但價錢極平宜,

深受當地居民歡迎, 在各大超市有售.

值得一提的是, Côte d'Or 跟 Cadbury 一樣, 早已被 Kraft 收購~

(在香港要找 Côte d'Or 的話, 要到免稅店)

Pierre Marcolini - 沒有甚麼"皇室"銜頭, 全比利時亦只得十間分店,

但價錢及品質俱為上等, 甚至被台灣人奉為神級朱古力!

有興趣的可到Sablon區總店朝聖~

p.s. 如果不用追捧名牌, 市內亦有大量小店售賣 pralines,

如在布魯塞爾 (brussels), 一盒自選大約十八粒朱古力大概$150港幣左右...

但在布魯日 (brugge) 市內小店購買的話, 價錢只需$80左右~

一個故事 - 年 宵

年宵市場對好多人黎講係熱點節目,
但對店員黎講只係一年一度的災難...
明明每日都係賣同樣既貨, 卻又每日都要將貨品搬來搬去, 朝行晚拆;
仲要應付一堆又一堆你明明唔識佢, 但佢又會覺得你欠左佢的講價客;
還有最難應付, 來混吉的一群...

佢地已經係連續第三晚企響檔口前望住d貨眼光光,
點解店員會認得? 因為那個女人每次都會帶同一位智障小朋友,
而佢倆在遊人如鯽的市場裡面總會得到大量空間,
唔係佢地爭番黎, 而係個個都避開佢地,
空間大到店員都曾經懷疑, 智障其實係咪會傳染架呢?!
總之, 每次見到佢地, 就如見到摩西, 好易認~

由於兩人從來都冇提出過任何議價或問題,
店員就由得佢地看個夠, 做少一樣得一樣, 樂得清閒.
但都來到年廿九, 每晚這樣望, 會望到過年嗎?

店員出於好奇, 就開始對那位小朋友釋出善意:
"你睇中邊隻呀? 平d賣俾你丫~"

小朋友望著店員良久, 還是覺得毛公仔比較耐看,
就轉眼望向店員身後的毛公仔, 沒有答話.

"其實係我想買." 說這句的, 是女人, 亦即是小朋友的媽媽. "我想問下你地d公仔夠唔夠軟熟?"

"當然軟熟啦~ 好好攬架! 妳想買俾個仔攬哩~"

"唔係, 我買來俾佢打的. 佢每晚都要同我打一輪先肯去訓, 但佢開始長大, 我亦開始唔夠佢打, 所以要買d軟熟既公仔等大家打果陣都冇咁痛..."

店員被這個突如其來的答案打亂了, 一時之間不知道應該如何接上去...
但他想了一想, 就直接爬上檔口的頂部, 將一個原先只用來招徠客人的特大版毛公仔摘下來,
遞給太太.

"就這個吧~ 應該夠打!~"

"咁大個, 要多少錢?!"

"二十了就可以了, 別再講價哦~!"

站站停下最後也空等 布魯日 下集

在市面上, 很難找到比利時的旅遊書, 

就算有, 也大多依附在荷蘭的旅遊書之內,

有關布魯日 (Brugge) 的, 就更只有4-6頁左右介紹.

然而, 布魯日卻是整個比利時旅遊之中最不能錯過的城市!

地理上, 比利時被荷蘭, 德國, 法國, 甚至英國所包圍著,

每一個國家都比她有特色有名氣,

所以比利時往往被忽略為 "有閒才去" 的國家.

而首都布魯塞爾更加是一個爛透的城市.

但依然, 無論如何, 到上述國家旅遊時, 

有時間的話真的值得抽1-2日去拜訪這個中世紀小鎮.

乘搭 "intercity"火車由阿姆斯特丹出發到布魯日約需4小時,

需中途在安特惠普 (antwrap) / 布魯塞爾 (brussels) 轉車,

(乘搭 "thalys" 火車的話會更快, 但票價貴且限時上車, 亦同樣要轉車)

火車站門外有巴士站到達各區, 但不怕倦的話, 步行是更好的選擇.

因為布魯日真的是一個小小的小鎮哦~

至於行程, 其實是沒有的~

甚至建議是亂走 (但請謹記回酒店的路),

每條橫街窄巷都有其特色.

這個古城的舊, 不是粉雕出來的假古董,

幾乎每一幢建築物都是切切實實的百年老店,

卻又保養的宜.

只需買個麵包, 隨處找個地方坐坐,

彷彿就置身於中世紀時代, 期特武士騎著白馬來城堡打救你 (!!).

若硬是要找些活動的話,

市內只有三幢高層建築:

兩座教堂及一幢鐘樓,

除了用來認路之外, 亦可到裡面走走.

當中鐘樓有入場限制, 每次鐘樓內只可同時容納80人 (古董來嘛~),

遇上旅遊旺季的話得需排隊等候入場.

入場後可爬上鐘樓的頂層, 近距離細聽每隔十五分鐘就打出的報時音樂,

亦可飽覽布魯日的全景.

沒錯, 是用爬的, 因為其樓梯既窄且深,

雖說高度只得幾百米,

亦會把你弄得氣來氣喘~

另外, 值得一提的是, 比利時到處也是朱古力,

忍得到的話就別在布魯塞爾買伴手禮,

因為布魯日朱古力小店的價錢, 只是布魯塞爾的一半!!